Əhəd Abıyev rəqibini ittiham etdi; Icra başçısının müavini və aclıq edənlər onun mövqeyini bölüşmədi
Rayonun deputatı Nəriman Əliyev baş verənlərə münasibət bildirməkdən yayındı
Masallı Ziyalıları Ictimai Birliyinin sədri Məmmədağa Eynullayev üzvü olduğu hakim Yeni Azərbaycan Partiyasından (YAP) çıxarılıb. Bu barədə “Azadlıq”a YAP-ın Masallı təşkilatının sabiq sədri, hazırda partiyanın Siyasi Şurasının üzvü Şirvan Əbilov məlumat verib. Onun sözlərinə görə, bu qərar partiyanın rayon təşkilatının dünən keçirilən iclasında qəbul edilib.
O, könüllü YAP-a üzv olub
Şirvan Əbilov Məmmədağa Eynullayevin YAP-a üzv olmasının tarixçəsini də danışıb: “O, partiyaya üzv olmaq üçün mən təşkilatın sədri olanda müraciət edib. Müraciətin tarixini də deyə bilərəm: 2005-ci il yanvarın 2-i. Açığı Məmmədağa Eynullayev sabit mövqeli adam olmadığına görə, onun partiyaya üzv olmasının əleyhinə idim. Lakin onun həmin vaxt icra hakimiyyətində işləməsi və ilk partiya təşkilatından gəlməsini nəzərə alaraq müraciətinə baxdım. Fevralın 12-də onun YAP-a üzv olması barədə qərar qəbul edildi. Məmmədağa Eynullayev sizin qəzetinizə bildirib ki, guya o, zorla partiyaya üzv edilib. Bu tamamilə yalandır. Onun özü könüllü surətdə ərizə yazaraq YAP-a üzv olmaq istəyib”.
Şirvan Əbilov Məmmədağa Eynullayevin yazdığı ərizənin surətini də redaksiyamıza təqdim edib.
O, Masallı Ziyalıları Ictimai Birliyinin keçirdiyi aclıq aksiyasına da münasibətini açıqlayıb: “Mən onların addımını təqdir etmirəm. Əgər Masallıda problem var idisə, Qəzənfər Ağayevin fəaliyyəti qənaətbəxş deyildisə, niyə Məmmədağa Eynullayev bunu icra hakimiyyətində hüquq şöbəsinin müdiri işləyəndə demirdi?!”
Məni vətəndaşlıqdan çıxarmayıblar ki?!
Məmmədağa Eynullayev isə “Azadlıq”a açıqlamasında YAP-dan çıxarılmasını təəccüblə qarşılamadığını deyib: “Sizin qəzetinizə bildirmişdim ki, məni YAP-ın rayon təşkilatının iclasına dəvət ediblər. Təxmin edirdim ki, orada mənim məsələm müzakirə ediləcək. Ona görə də təəccüblənmirəm. Məni partiyadan çıxarıblar, vətəndaşlıqdan çıxarmayıblar ki?! Mən yenə də həmin əqidədəyəm və mübarizəmi aparıram”.
YAP-a könüllü üzv olması barədə deyilənlərə gəlincə birlik sədri bildirib: “Mən icra hakimiyyətində işləyəndə yeganə şəxs olmuşam ki, YAP-a üzv olmamışam. 2005-ci ildə dedilər ki, hamı YAP-a üzv olmalıdırlar. Mən də məcburi ərizə yazmalı oldum”.
O, əlavə edib ki, icra hakimiyyətində işləyən zamanlarda da Qəzənfər Ağayevə qarşı mübarizə aparıb: “Mən bu barədə dəfələrlə danışmışam. Demişəm ki, icra hakimiyyətində işləyəndə də Qəzənfər Ağayevin qanunsuz əməllərinə qarşı mübarizə aparmışam. Prezident Administrasiyasına dəfələrlə ondan şikayət etmişəm. Iclaslarda dəfələrlə onunla mübahisəm olub. Elə buna görə də işdən çıxarılmışam. Özü də Qəzənfər Ağayev məni çox cəsarətsiz şəkildə işdən çıxarıb. Yəni, mən bülletendə olanda işdən çıxarılmışam. Sadəcə bu adamlar danışmağa söz tapa bilmir. Ona görə də heç bir məntiqə söykənməyən söhbətlər edirlər. Baxın, deputat Elmira Axundova deyir ki, köşk sahibləri ziyalı ola bilməz. Niyə? Onların arasında ali savadlı, kifayət qədər intellektual, ziyalı keyfiyyətlərinə malik insanlar var”.
Biz bu adamın saxtakarlığından bezmişik
Məmmədağa Eynullayev aclıq aksiyasının davam etdiyini bildirib. Onun sözlərinə görə, aksiyaya dəstək verənlərin sayı artdıqca təzyiqlər də artır: “Konkret olaraq aksiyaya dəstək verən Xanəli Eynullayev çalışdığı Lürən kənd orta məktəbinin direktoru tərəfindən təzyiqlərlə üzləşib. Ondan aclığı dayandırmaq tələb olunub. Xanəli Eynullayev buna etiraz etdikdə icra başçısının müavinləri Isa Nuriyev və Nəsir Muxtarlının yanına aparılıb. Orada ona bildiriblər ki, aksiyaya dəstək verməməsi barədə ərizə yazsın. Lakin o, bundan imtina edib”.
Icra başçısının müavini Nəsir Muxtarlı “Azadlıq”a deyib ki, Masallıda hər hansı aksiya keçirilmir və Məmmədağa Eynullayevin söylədiklərinin heç bir əsası yoxdur: “Biz artıq bu adamın saxtkarlığından bezmişik. Dəfələrlə mətbuatı rayona dəvət etmişik ki, buyurun, gəlin görün Masallıda hər hansı aksiya keçirilirmi? Sadəcə bir nəfər oturub evində, hər yerə yalan məlumatlar verir, ictimaiyyəti çaşdırır. Mən sizdən xahiş edirəm, gəlin rayona görün burada onun dedikləri baş verirmi? Yalandan siyahılar verir, guya xeyli adam aksiyaya qoşulub. Indi həmin adamlar onun bu saxtakarlığından prokurorluğa müraciət etmək niyyətindədirlər”.
Məmmədağa Eynullayev hər hansı saxtakarlığa yol vermədiyini, söylədiklərinin fakt olduğunu bildirib: “Mən heç kimin adını yalandan yazmamışam. Bu adamların imzalı müraciətləri var ki, aksiyanı dəstəkləyirik. Indi onlara təzyiq altında başqa şey yazdırıblarsa, burada mənim nə təqsirim var?!”
Əhəd Abıyev ittiham edir
Bu arada Masallının sabiq deputatı, hazırda Daşkəsənin icra başçısı vəzifəsində çalışan Əhəd Abıyev “Yeni Müsavat”a açıqlamasında rayonda baş verənlərin arxasında yerli məmurlardan birinin dayandığını iddia edib: “O adam uzun müddətdir Masallıda böyük vəzifədədir. Pensiyaya getmək yaşı çoxdan çatıb, hələ xeyli əvvəl getməli idi. Lakin nədənsə qaldı. O adam həddən artıq varlanıb. Qanunsuz yollarla, qaranlıq əməllərlə milyonların sahibi olub. Masallının bütün icra başçılarını müxtəlif oyunlar quraraq özündən asılı vəziyyətə salıb. Bundan sonra da istədiyini edib və edir. Həmin şəxs cinayətkar şəbəkə ilə, Iranda müəyyən qüvvələrlə əlaqəlidir. Nəinki Masallını, bütün cənub regionunu qarışdıran odur. Mən onun əməlləri, hansı işlərin sahibi olduğu barədə onun rəsmi tabe olduğu nazirə də demişəm. Nazir özü də o adamı işdən götürmək istəyir. Amma çətinlik çəkir. O şəxs icra hakimiyyətində işləmir. Ancaq icra hakimiyyətinin işçilərini də nəzarəti altında saxlayır. Onun gizli şəkildə müəyyən müxalifətçilərlə də əlaqəsi var. Keçmiş OMON-çu Elçin Əmiraslanovun qohumudur. Onun rayonda yeganə qorxduğu adam mən olmuşam. Barəmdə şayiələri də o yayır və yazdırır”.
Icra başçısının nəzərdə tutduğu məmur kimdir?
Məmmədağa Eynullayev Əhəd Abıyevin fikirlərini bölüşməyib. O, bildirib ki, keçirdikləri aksiya sifariş xarakterli deyil və heç kimin şəxsi maraqlarına xidmət etmir.
Qəzənfər Ağayevin müavini Nəsir Muxtarlı da yerli məmurlardan kiminsə bu məsələlərdə rolu olduğuna inanmadığını deyib.
Apardığımız araşdırmalar nəticəsində isə bəlli olub ki, Əhəd Abıyevin nəzərdə tutduğu şəxs Masallıda su-kanal idarəsinin müdiri Maşallah Kərimovdur. Bu şəxslə Əhəd Abıyev arasında uzun müddətdir ki, savaş gedir. Maşallah Kərimov əvvəllər icra hakimiyyətində birinci müavin postunda çalışıb. Məhz Əhəd Abıyevin səyi nəticəsində o vəzifəsindən uzaqlaşdırılıb. Yerinə Əhəd Abıyevin qardaşı Nadir Abıyev təyin edilib. Maşallah Kərimovun da Abıyevlərə zərbəsi gecikməyib. YAP-ın yerli təşkilatının seçkili orqanlarının formalaşdırılması ilə bağlı keçirilən toplantılarının birində Idarə Heyətinin və sədrin müavini olan Nadir Abıyev sıravi üzvə qədər kiçilib. Onun yerinə isə Maşallah Kərimov təyin edilib. Həmin vaxt təşkilatın sədri olan Seyfəddin Əliyevin “Maşallah Kərimov mənim idealımdır” deməsi Abıyevləri daha da qəzəbləndirib. Hazırda Abıyevlərlə Kərimov arasında ədavət davam edir. Bu baxımdan rayonda da hamı düşünür ki, Əhəd Abıyev Maşallah Kərimovu nəzərdə tutub.
Maşallar Kərimov isə “Azadlıq”a bildirib ki, onun rayonda baş verənlərlə heç bir əlaqəsi yoxdur: “Heç bu məsələlərdən məlumatım yoxdur”.
Sonda qeyd edək ki, Masallıda baş verənlərlə bağlı rayonun deputatı Nəriman Əliyevin də mövqeyini öyrənməyə çalışdıq. Dünən gün ərzində onun mobil telefonuna dəfələrlə zəng vurduq. Lakin telefonu açmadı. Deputatın köməkçisi də bu işdə bizə yardımçı ola bilmədi.
Seyid
