Türkiyənin xarici işlər naziri Əhməd Davudoğlu İstanbulda keçirilməsi planlaşdırılan “Suriya xalqının dostları” adlı ikinci görüşün gündəliyi barədə açıqlama verib. Əhməd Davudoğlu bildirib ki, bu görüşdə Suriya xalqına bu ilin əvvəlində Tunisdə keçirilən ilk toplantıda olduğundan daha çox dəstək ifadə olunacaq. Onlarla ölkənin nümayəndələrinin qatılacağı toplantının əsas məqsədlərindən biri iki hissəyə ayrılmış Suriya müxalifətini Bəşər Əsəd rejiminə qarşı alternativ çıxış yolu tapa bilmək üçün birliyə sövq etməkdir. Digər bir məqsəd isə Suriya rəhbərliyini humanitar yardımın çatdırılmasına icazə verməyə məcbur etməkdir. Əhməd Davudoğlu qeyd edib ki, beynəlxalq ictimaiyyət Suriya xalqının azad və ədalətli seçki, şəffaflıq, qanunun idarəsi, mətbuat azadlığı və sərbəstliyi tələblərini dəstəkləyir. Görüşdə həmçinin “Suriya xalqının dostları”nın Tunisdə keçirilən ilk görüşündən bəri müşahidə olunan vəziyyət nəzərdən keçiriləcək. Türkiyənin xarici işlər nazirinin sözlərinə görə, Suriya BMT və Ərəb Ölkələri Liqasının xjüsusi nümayəndəsi Kofi Ənanın sülh planını yerinə yetirmədiyi halda baş verəcəkləri qərara almaq BMT Təhlükəsizlik Şurasının işidir.
Suriyanın keçmiş səfiri və müxalifət nümayəndəsi Bəssam İmadi bildirib ki, böhranın ən yaxşı həlli Suriya daxilində bufer zonanın yaradılmasıdır. Bəssam İmadi Suriyada zorakılığa son qoyulması üzrə diplomatik cəhdlərin məhdud nəticələri olacağını güman edir.
