“The Guardian” yazır ki, Barack Obama ABŞ prezidentliyinə ehtimal olunan respublikaçı namizəd Donald Trump-ı indiyədək ən kəskin tənqid atəşinə tutub.
Obama Trump-ın Orlando qətliamına reaksiyasını “Amerika dəyərlərinə xəyanət” adlandırıb.
Donald Trump Orlando qırğını üçün bütün müsəlmanların məsuliyyət daşıdığını bəyan etmişdi.
Barack Obama Donald Trump-ın “təhlükəli zehniyyəti” barədə xəbərdarlıq edərək deyib ki, namizədin çıxışları “Amerika demokratiyasının təbiəti üçün təhlükə təşkil edir”.
“İndi bizə ehtimal olunan respublikaçı namizəd təklif verir ki, bütün müsəlmanların Amerikaya mühacirət etməsinə qadağan qoyaq… O deyir ki, zorakılıqda bütöv bir dini icmanın əli var – deyib Obama, – Belə münasibət bizi harayadək apara bilər? Orlando qatili, San Bernardino qatillərindən biri, Fort Hodd qatili – onların hamısı ABŞ vətəndaşları olublar. İndi deyirsiniz biz bütün Amerika müsəlmanları ilə fərqli rəftar edək? Onların hamısını müşahidə altına alaq?..”
“The Guardian” yazır ki, Obama Orlando qatilinin “İslam təliminin internetdən alınmış və təhrif olunmuş informasiyası ilə radikallaşdığını” desə də, bundan bir qədər də irəli gedərək “Trump-ın özünü real təhlükə” adlandırıb.
“Biz əvvəllər tariximizin belə məqamlarından keçmişik. O zaman biz qorxumuzdan çıxış edərək davranırdıq və sonra peşman olmuşduq, – deyib prezident “Makkartizm” dövrünə işarə ilə, – Biz o vaxt görmüşdük ki, hökumətimiz öz vətəndaşlarımıza inanmır və sonralar bu, bizim tariximizin xəcalətli hissəsinə çevrildi”.
Xəyanət
ABŞ prezidenti bildirib ki, müsəlmanlara Trump-ın təklif etdiyi yanaşma, “nə İŞİD-i daha az təhlükəli edəcək, nə də müttəfiqlərin sayını artıracaq”“Bu ölkə din azadlığı üzərində qurulub. Biz burda adamları din sınağına çəkmirik. Biz bu dəyərlərdən əl çəksək, onda müdafiə etməyə çalışdığımız şeylərə xəyanət etmiş olarıq. Mən bunun baş verməsinə yol verməyəcəyəm” – deyib Obama.
ABŞ prezidenti bildirib ki, müsəlmanlara Trump-ın təklif etdiyi yanaşma, “nə İŞİD-i daha az təhlükəli edəcək, nə də müttəfiqlərin sayını artıracaq”.
“The Guardian” yazır ki, “radikal İslam ekstremizmi” Washington-da illər boyu siyasi debatların mərkəzində olub. Respublikaçılar bu termindən istifadə etmədiyinə görə Barack Obamanın “zəifliyini” həmişə tənqid ediblər.
Bu cür münasibətdən hiddətini gizlədə bilməyən Obama deyib ki, onun bu ifadədən çəkinməsinin siyasi korrektliklə heç bir əlaqəsi yoxdur, lakin “ekstermizmin məğlub edilməsi” ilə bütün mənalarda əlaqəsi var.
Prezident deyib ki, bütün müsəlmanların mənfiliklərlə təqdim edilməsi yalnız terrorçuların işinə yarayar və onların “Amerika müsəlmanlara nifrət edir” ritorikasının isbatına kömək edər.
Bush da Obama kimi edirdi
“The Guardian” yazır ki, Obamadan əvvəlki prezident George W Bush da 11 sentyabr terrorunun ardınca belə bir mövqe tutmuşdu. O faciədən 6 gün sonra məscidə yollanmış və orada “İslamın sülh demək olduğunu” bəyan etmişdi.
Obama respublikaçıları Trump-ın “qorxulu zehniyyətindən aralı durmağa” çağırıb.
ABŞ prezidenti bu çıxışında da Amerikada silahlar üzərinə nəzarət qoyulmasının zəruriliyindən danışıb.
O deyib ki, “Orlando, San Bernardino kimi qətliamların qarşısının alınmasında polsilərə kömək etməyi arzulayırıqsa, bu qətliamları törədənlərin əlinə silah keçməsinin qarşısını almalıyıq”.
Obama bəyan edib ki, silahlara nəzarət hər bir faciənin qarşıasını almasa da, məntiqlə yanaşılsa, onların sayını azalda bilər.
ABŞ prezidenti deyib ki, “Trump-ın mülahizələri onun ali baş komandanlıq üçün yararsız adam olduğunu göstərir”.
(bbc azəri)
