ABŞ Hərbi Hava Qüvvələrindən planla bağlı məlumat sızıb
ABŞ münaqişə yaranacağı halda İranın nüvə obyektlərinə hərbi zərbə endirilməsi ilə bağlı plan hazırlayıb. “Bloomberg” agentliyinin yaydığı xəbərə görə, bunu ABŞ Hərbi Hava Qüvvələrinin Baş Qərargah rəisi Norton Şvarts deyib.
Şvarts bildirib ki, İrana endiriləcək zərbə dağıdıcı olacaq. Planda İsrail qırıcılarını havada yanacaqla təmin etmək, SEPAH və ETTELAAT-ın bazalarına zərbələr endirmək kimi detallar da əksini tapıb.
“Washington Post” qəzeti isə yazıb ki (lent.az), Pentaqon ABŞ Hərbi Hava Qüvvələrinin istifadəsində olan “Bunker-baster” bombalarının Qum şəhəri yaxınlığında, Ford dağlıq ərazisində yer altında yerləşən uran zənginləşdirmə zavodunu dağıda biləcəyinə əmindir.
