Baş dəmiryoçu haqlarını tələb edən keçmiş dəmiryolçularla görüşdən qaçdı; polis onları ərazidən uzaqlaşdırdı
Aprelin 19-da 20-dən artıq keçmiş dəmiryolçu Azərbaycan Dəmir Yolları QSC-nin qarşısında aksiya keçiriblər. Bu barədə redaksiyamıza keçmiş dəmiryolçular özləri məlumat veriblər. Onlar bildirib ki, dünən saat 8-də “Azərbaycan Dəmir Yolları” QSC-nin qarşısına toplaşıblar. Keçmiş dəmiryolçular qurumun rəhbbəri Cavid Qurbanovla görüşmək istəyiblər. Lakin onlara imkan verilməyib. Sərnişindaşıma deposunun rəisi Elyar Muradov dəmiryolçuları hədələsə də, onların binanın qarşısından geri çəkilməyib.
Cavid Qurbanov maşını ilə binanın arxasından içəri keçmək istərəyrək onun qarşısını kəsiblər. Cavid Qurbanov əli ilə onları qəbul edəcəyinə işarə edib. Lakin keçmiş dəmiryolçular bir saatdan artıq gözləsələr də, Cavid Qurbanov onları qəbul etməyib. Əksinə nəqliyyat polisini əraziyə cəlb edərək keçmiş dəmiryolçuları oradan uzaqlaşdırıblar. Keçmiş dəmiryolçular bildirib ki, polislərə göstərişi Elyar Muradov verib. Lakin keçmiş dəmiryolçular aksiyaları davam etdirəcəklərini deyiblər. “Biz tələblərimiizin yerinə yetirilməsini istəyirik. Bu məqsədlə də aksiyaları davam etdirəcəyik.
Hər gün toplaşacağıq”, – deyə keçmiş dəmiryolçular bildirib. Qeyd edək ki, bundan əvvəl keçmiş dəmiryoçular Cavid Qurbanova müraciət ünvanlamışdılar. Həmin müraciətdə deyilirdi: “Cənab sədr! Siz dəmiryoluna yeni təyin olunandan bir ay sonra sizin qəbulunuzda olduq. Dəmiyolunda, əsasən də sərnişindaşıma departamentində uzun illər boyu baş alıb gedən məmur özbaşınalığı, rüşvətxorluq, bizə qarşı olan ayrı-seçkilik və pullarımızın zaman-zaman bu məmurlar tərəfindən qanunsuz yollarla mənimsənilməsi barədə sizə faktlar dedik. Elə həmin görüşdə bizə çatışmazlıqlar barədə tapşırıqlar verdiniz. Əsas məsələ bizə aid olan pulların mənimsənilməsi haqda komissiya yaradıb bütün şikayətlərin, ərizələrin alınıb işin araşdırılmasını tapşırsanız da, bugünə kimi məsələ öz həllini tapmayıb. Çünki verdiyiniz tapşırığa əsasən, komissiyanın sədri Əlirza Süleymanov və qeyri üzvlərin hamısı bu qanunsuzluqların və mənimsəmələrin bir nömrəli iştirakçısı olub.
Biz tərəfimizdən seçilən iki nəfər nümayəndə isə adları siyahıda yer alsa da, fəaliyyətlərinə şərait yaradılmadı. Yoxlamalarda etirazlarına heç bir məhəl qoymadan, komissiyanın son aktına, bizim nümayəndənin imzası olmadan yəqin ki, sizə təqdim ediblər. Bundan bir il keçməsinə baxmayaraq biz dəfələrlə etiraz etsək də, sizin müavininiz Əlirza Süleymanov, departamentin sədri Elyar Muradov sizinlə təkrar görüşməyə imkan vermirlər. Bir ildən çoxdur ki, dəfələrlə ərizə yazıb, sizinlə görüşmək istəsək də, nədənsə ərizələrə Elyar Muradov cavab vermir. Bir neçə dəfə sizin maşının qabağına çıxıb arxa qapıdan sizinlə görüşmək istəsək də, ya Əlirza Süleymanov, ya da Elyar Muradov polisləri çağırıb bizə hədə-qorxu gəliblər. Ölkə başçısı İlham Əliyev sizi bizə sədr təyin edib ki, siz də köhnə rəhbərlər kimi bizə yuxarıdan aşağı baxasınız? Biz bir qrup araqarışdıran deyilik.
Dövlət əleyhinə heç bir hərəkət etmirik, qanunları pozmuruq. Sadəcə olaraq öz haqqımızı istəyirik. Bir sədr kimi, bu sizin vəzifyənizdir. Nəyə görə hər dəfə sizinlə görüşmək istədikdə polis çağırıb bizi Əlirza Süleymanovun kabinetinə aparıb hədə-qorxu gəlir?! Cavid müəllim, siz məmursunuz və cənab prezident dəfələrlə söyləyib ki, məmurların bir nömrəli vəzifəsi fəhləni qəbul edib dinləməkdir. Əksinə, idarə etdiyiniz qurumda sizə tabe olmayan bəzi məmurlar köhnə əməllərini gizlətmək üçün haqqımızda sizə yalan məlumatlar verirlər.
Bu hadisələrlə bağlı ölkə başçısına, baş nazirə və dövlətin bütün qurumlarına məktub ünvanlamışıq. Hətta aksiya keçirmək üçün Hacıbala Abıtalıbova da müraciət etmişik. Hacıbala müəllim bizi qəbul edib təmkinli olmağı və gözləməyi təklif etdi. Söz verdi ki, bu məsələni lazım gəlsə ölkə başçısına qədər qaldıracaq və əvvəlcə sizə məktub ünvanlayıb bizi qəbul etməyi xahiş edib. Heç bir nəticə olmadı. Sonra baş nazirin müavini Abid Şərifoa müraciət ünvanlandı. O da sizə müraciət edərək bizi qəbul etməyi xahiş edib.
Deyəsən, biz ancaq ölkə başçısına müraciət etməliyik. Bəlkə onun xahişini yerə salmazsınız. Ancaq bu xahişləri ənənəvi olaraq Elyar Muradov qəbul edib və ismarıc göndərərək nümayəndələrimizi öz otağında yox, 7.04.2016-cı ildə deponun rəisi Rəhman Əbişovun otağında qəbul edib ənənəvi sözlərini çatdırdı: “Mənim sizə verəcək heç nəyim yoxdur. Hara gedirsiniz gedin. Hara yazırsınız yazın, xeyri yoxdur. Bu gün də sizi ona görə qəbul etdim ki, gedib Cavid müəllimə sizinlə görüşüb məsələni həll etməyim barədə məruzə edim”. Sizdən xahiş edirik, bizi qəbul edin və dinləyin. Haqqımız bərpa olunmayınca bu aksiyadan əl çəkməyəcəyik. Ətrafınızda köhnə qalıq məmurların öz cinayətlərini gizlətməsi üçün onlara şərait yaratmayın. Bu, çox pis nəticə verəcək. Haqqımız bərpa olunmasa, kütləvi şəkildə idarənin qarşısında özümüzü yandıracağıq. Məsuliyyət sizin olacaq”.
Bir məqamı da qeyd edək ki, Cavid Qurbanov AXCP sədrinin evi qarşısında təşkil olunan aksiyaları maliyyələşdirən şəxslərdən biridir. İndi buyurub onun idarəsi qarşısında haqlı olaraq aksiya keçirən keçmiş dəmiryolçulara cavab versin.
