Əli Kərimlin evinin qarşısındakı aksiyaları Cavid Qurbanovla yanaşı Azad Rəhimov da maliyyələşdirir
İctimaiyyətin etirazları davam edir
AXCP sədri Əli Kərimliyə qarşı hakimiyyətin apardığı kampaniya barədə yeni məlumatlar əldə etmişik. Dünənki sayımızda məlumat vermişdik ki, AXCP sədrinin yaşadığı binanın önündə hakimiyyətin təşkil etdiyi aksiyaları maliyyələşdirənlərdən biri “Azərbaycan Dəmir Yolları” QSC-nin sədri Cavid Qurbanovdur.
O, bunu müşaviri Həbib Misirov vasitəsilə edir. Həbib Misirov həm də bu aksiyaların koordinatorudur.
Yeni məlumatlarda isə bildirilir ki, aksiyalara maliyyə dəstəyi verənlərdən biri də gənclər və idman naziri Azad Rəhimovdur. Məlumatda həmçinin deyilir ki, hökumətyönlü gənclər təşkilatlarını bu aksiyalara səfərbər edilməsində Azad Rəhimovun da rolu var. Srağagün Əli Kərimlinin evinin qarşısına Idman Akademiyasının tələbərinin toplaşması da təsadüfi deyil. Həmin tələbələr Azad Rəhimovun tapşırığı ilə səfərbər olunub.
“Bu, qanuna və əxlaqa sığmayan addımlardır”
Hakimiyyətin törətdiyi bu biabırçılığa münasibət bildirən Ədalət Partiyasının sədri “Azadlıq”a bildirib ki, Əli Kərimlinin evinin qarşısında aksiya keçirmək düzgün deyil. Ilyas bəy bu tip toplantıları qanuna və əxlaqa zidd hesab edir: “Ümumiyyətlə, bu cür aksiyaları düzgün hesab etmirəm. Bu, qanuna və əxlaqa sığmayan addımlardır”.
Vəkil Fuad Ağayev isə 20 il öncəki bir hadisəni yada salıb. O, deyib ki, Milli Məclisin deputatı bir regiondan gələn şəxs haqqında mənfi fikir söyləmişdi: “Etiraz olaraq deputatın evinin qarşısında həmin regionun nümayəndələri yığışmışdı. Toplaşan adamların xeyli hissəsi həbs olundu və cinayət məsuliyyətinə cəlb edildi. Sonra da məhkəmə oldu. O zaman keçirilən piket iştirakçılarının ətrafda yaşayanları elə də narahat edəcək hərəkətləri olmamışdı. Həmin hadisə ilə indikini tutuşdurun. Ona görə də əlavə şərhə ehtiyac görmürəm”.
Ələsgər Məmmədlinin fikrincə, hər hansı formada bir şəxsə qarşı təşkil olunmuş aksiyaların keçirilməsi azadlıq çərçivəsində qiymətləndirilə bilməz: “Məqsədli və siyasi təqiblərə yönəlmiş bir təşkilatçılıqla başa gələn və bayağı, əhəmiyyətsiz, əsası olmayan aksiya mahiyyət etibarilə azadlığı və aksiyanı gözdən salmağa xidmət edir. Bu baxımdan heç bir əlaqəsi olmayan Qarabağ hadisələriylə bağlı siyasi rəqibi, siyasi müxalif partiya rəhbərinin hədəfə alınması ölkədə ehtiyac olan milli həmrəyliyin, milli şüurun birliyinin zəruriliyinə böyük kölgə salır. Ayrı-ayrı şəxslər belə aksiyalar təşkil edir və bu tip təşkilatçılıqla konkret hədəfin müəyyən olunması, həmin şəxsin cəmiyyət içində ”gözdən salınması” əslində bu aksiyaları təşkil edənlərin gözdən salınması deməkdir”.
Ənvər Əliyev hesab edir ki, döyüş bölgəsində baş verən son hadisələr vaxtı sözügedən aksiyaların olması düzgün hərəkət deyildi. O, Qarabağ hadisələri, şəhidlərin timsalında müxalifətin milli birliyinin yarandığını deyib: “Təəssüf ki, bəzi şəxsləri təlimatlandırıb ortaya atdılar. Buna çox təəssüflənirəm. Bakıda 35 min erməni arvadı yaşayır və ola bilsin bu tip aksiyalar lazımıydı. Lakin Əli Kərimliyə qarşı bu addımın atılmasını, müəyyən adamların və qüvvələrin belə toplantılar təşkil etməsini düzgün hesab etmirəm. Bizim çox gözəl işlərimiz var, inanıram ki, qələbə bizimlə olacaq və bu cür böyük məqsədin fonunda belə xırdalıqlara varmaq olmaz. Ona görə də mən məlum aksiya təşkilatçılarının bu hərəkətiylə razı deyiləm”.
