Rafiq Manaflı: “Qarabağda erməninin, rusun qabağından dovşan kimi qaçaraq AXCP sədri Əli Kərimlinin pəncərəsinin altında xoruzlanan düşük bir hakimiyyət var”
AXCP sədri Əli Kərimlinin evinin qarşısında hakimiyyətin təşkil etdiyi gülünc aksiyalara ictimaiyyətin təpkisi davam edir. Ölkənin əksər ictimai-siyasi xadimləri, fəalları hakimiyyətin bu düşük hərəkətini pisləyib. Milli Şuranın Koordinasiya Mərkəzinin üzvü Rafiq Manaflı da feysbuk səhifəsində etirazını kəskin şəkildə bilirib. R.Manaflı yazır:
“Xalq müharibə istəyirdi.
Bu siyasətdən uzaq hakimiyyətdən fərqli olaraq, xalq çoxdan əmin olmuşdu ki, müharibə ilə itirilmiş torpaqları danışıqlarla geri almaq mümkün deyil. Torpağını qaytarmaq istəyirsənsə mütləq vuruşa hazır olmalısan.
Və xalq, son 20 ildə bu iqtidara, bu bütün düşmənlərimizin dostu, öz xalqının düşməni olan rejimə qarşı içində damla-damla yığılıb okeana çevrilmiş qəzəbi, kini, nifrəti yönəltmişdi erməniyə qarşı. Nə erməni, nə rus, nə PKK – heç kim onun qarşısında dura bilməyəcəkdi. Öz hakimiyyətimiz dayandı. Məlum oldu ki, lazım gəlsə deyib od püskürənlər, o odu yalnız öz xalqına püskürə bilirlər. Kənardan biri «pıqq» eliyən kimi qorxudan dilləri tutulub kəkkələyirlər.
Xalqının dayağını, dəstəyini alan, bütün varlığı ilə onun yanında olduğunu hiss edərək sürətli həmlələrlə torpağını işğaldan azad edən, zəfərlə yürüyən ordunu dayandıran hakimiyyət cinayətkardır, düşməndir. Leya Yunusla Rauf Mirqədirovdan düşmən düzəltməklə deyil ki.
Göründü ki, bu hakimiyyətə qalib xalq lazım deyil. Özünə inamını qaytarıb qəddini düzəltmiş, qürurlu xalqı idarə etmək, məğlub durumda olaraq aşağılıq kompleksi yaşayan əzik-büzük xalqı idarə etmək deyil. Qalib xalq heç kimə, heç bir halda özü ilə son 20 ildə davranılan kimi davranmağa icazə verməz.
Budur, hakimiyyətin torpaqlarımızın işğaldan azad olunmasının qarşısını almaqla törətdiyi dövləti cinayətin səbəbi.
Və bu 4 gün göstərdi ki, bu hakimiyyətlə qələbə yoxdur, qəddini düzəltmək, qürurlanmaq yoxdur. Siyasi, iqtisadi, sosial islahatlar yoxdur. Haqq-ədalət yoxdur. Qarabağda erməninin, rusun qabağından dovşan kimi qaçaraq AXCP sədri Əli Kərimlinin pəncərəsinin altında qərarlaşıb xoruzlanan düşük bir hakimiyyət var.“
