Saday Şəkərli
Qərib bülbül misalıyam,
qürbət qəfəsim, qəfəsim,
vətən, şeir misrasıyam,
nədən çatışmır nəfəsim?
. . .
Şirin dünya dəryadımı,
qərq eyləmiş Fərhadımı,
yox eşidən fəryadımı,
quyulardan gəlir səsim.
. . .
Ayğır atlarım nallıdı,
sınmış ürəklər, xallıdı,
yerdə qolum qandallıdı,
göydə tapılmır bir kəsim.
. . .
Neynirəm bu qərib baxtı,
yaş gözlərdən damıb axdı,
vətən bir quru budaqdı,
bir budaq…bəsimdi, bəsim…
