Bu gün Bakı Ağır Cinayətlər Məhkəməsində Rabitə və Yüksək Texnologiyalar Nazirliyinin sabiq Aparat rəhbəri Vidadi Zeynalov və digərlərinin cinayət işi üzrə məhkəmə prosesi davam etdirilib.
Hakim Əfqan Hacıyevin sədrliyi ilə prosesdə şahidlər ifadə verib.
Şahid Ramiz Quliyev “Azərpoçt” MMC-də təmir-tikinti işləri ilə məşğulduğunu bildirib. Onun sözlərinə görə, nazirlik tərəfindən tikinti işlərinə ayrılan vəsaitin 35 faizi geri qaytarılıb.
“Azərpoçt”un 1 saylı filialının rəisi olmuş Əsgər Quliyev “Azərpoçt” MMC-nin baş direktoru Qəmbər Bəybalayevə pul vermədiyini deyib.
“Azərpoçt” MMC-nin baş direktor müavini olmuş şahid Sübhan Kazımovun deyib ki, tenderlər nazirlik tərəfindən göstərilən şirkətlər arasından keçirilib.
Cəfər Namazov isə qeyd edib ki, “Transservis” MMC-nin şirkətinin rəhbəri vəzifəsində çalışıb. Onun sözlərinə görə, 2010-cu ildən tapşırıq əsasında Rabitə və İnformasiya Texnologiyaları Nazirliyi ilə əməkdaşlığa başlayıb: “Bir nəfərin xahişi ilə bizim şirkəti ilk olaraq poçt şöbələrinin təmiri işlərinə başladı. Sonradan “Aztelekom”la əməkdaşlıq etdik. Orda təmir-tikinti işləri üçün ayrılan pulların 35 faizini baş mühasib Oqtay Rüstəmova verirdik. Bizə təxminən “Aztelekom” işi ilə bağlı 50 min manat ayrılmışdı və bunun 35 faizini Oqtay Rüstəmova verirdim. Sonradan bildim ki, verdiyim pullar qanunsuzdur”.
O. Rüstəmov isə şahidin dediklərini təkzib edib və ondan pul almadığını bildirib.
Proses dekabrın 30-da davam etdiriləcək.
