Əli Kərimli: “Qəti şübhə eləmirəm ki, onları bu qədər müddətdə həbsdə saxlamaq mümkün olmayacaq”
«Nardaran işi» üzrə beş aydır davam edən məhkəmə prosesi yekunlaşır. Dekabrın 26-da Bakı Ağır Cinayətlər Məhkəməsində bu iş üzrə dövlət ittihamını müdafiə edən prokuror Nəsir Bayramov çıxış edərək, 18 nəfər təqsirləndirilən şəxslərin hamısına ağır cəza istəyib.
https://www.youtube.com/watch?v=lxCn8SXIrwk&feature=youtu.be
Prokuror təqsirləndirilən şəxslərdən «Müsəlman Birliyi» Hərəkatının sədri, ilahiyyatçı Taleh Bağırova ömürlük, Abbas Hüseynova 20 il, Cabbar Cabbarova 19 il, Rasim Cəbrayılova 17 il, AXCP sədrinin müavini Fuad Qəhrəmanlıya 11, Ramin Yarıyevə 10 il, qalan 12 nəfərin (Zakir Mustafayev, Cahad Babakişizadə, Şamil Abduləliyev, Aqil Quliyev, Abbas Quliyev, İbrahim Xudaverdiyev, Etibar İsmayılov, Bəhruz Quliyev, Əli Nuriyev, Əlibala Vəliyev, Fərhad Balayev və Abbas Tağızadə) hər birinə 15 il həbs cəzası verilməsini təklif edib.
Nardaranda saxlanılan digər təqsirləndirilən şəxslərdən fərqli olaraq, Ramin Yarıyevə daha az cəza istənilməsinin səbəbi budur ki, o, həbs olunarkən yetkinlik yaşına çatmayıb. Qanun isə bu halda 10 ildən artıq cəza verilməsini qadağan edir.
«DÖZÜMLÜ OLUN»
Prokuror çıxışında iddia edib ki, Taleh Bağırov və o biri təqsirləndirilənlərə verilmiş ittihamlar məhkəmədə də sübuta yetirilib. Amma dövlət ittihamçısı məhkəmədə araşdırılmış sübutlardan yalnız Baş Mütəşəkkil Cinayətkarlıqla Mübarizə İdarəsinin əməkdaşlarının ifadələrinə istinad edib. Təqsirləndirilən şəxslərin həbs olunarkən və ondan sonra BMCMİ-də işgəncələrə məruz qalmaları haqda söylədiklərinin təsdiqini tapmadığını deyən prokuror istintaqdakı ifadələrindən imtina edən şahidlərə isə belə münasibət bildirib: «O şahidlərin 16-sı həbs olunub hazırda cəza çəkən məhkumlar, qalanları da təqsirləndirilən şəxslərin tanışları, kənd camaatı idi. Ona görə də, onların məhkəmədəki ifadələrinə tənqidi yanaşılmalıdır».
Prokurorun çıxışından əvvəl Taleh Bağırov məhkəməni izləməyə gələn özünün və digər təqsirləndirilən şəxslərin yaxınlarına, özəlliklə, analara müraciət edib: «Xahiş edirəm, hansı cəzanı istəmələrindən asılı olmayaraq, ağlamayın. Belələrinin qarşısında sınmayın. Dözümlü olun. Şəxsən mən özümə ömürlük gözləyirəm. Əgər bundan daha ağır cəza – edam olsaydı, Azərbaycan hökuməti görərdi ki, hətta ölümə də gülə-gülə gedən oğullar var. Biz bu zalım rejimdən xilas olmaq, xalqımızın azad olmasını istəyiriksə, qurban verməyi də bacarmalıyıq».
Təqsirləndirilən şəxslərin vəkilləri müdafiə çıxışına hazırlaşmaq üçün məhkəmədən vaxt istəyib. Məhkəmə onlara yanvarın 9-na qədər vaxt verib.
AXCP sədri Əli Kərimli Nardaran məhbuslarına belə ağır cəza istnəilməsinə feysbul səhifəsində münasibət bildirib. Ə.Kərimli yazıb:
“Nardaran işi” üzrə məhkəmədə prokuror ittiham olunanlara ömürlük də daxil olmaqla, çox ağır cəza tələb etdi. Rejim görünməmiş qəddarlığa əl atır. Baxmayaraq ki, cinayət işi məhkəmədə tamamilə ifşa olunmuşdu, prokuror Tale Bağırzadəyə ömürlük, digərlərinə isə 15-20 il arası həbs cəzası istədi. Ən təəccüblüsü, yalnız feysbuk statuslarına görə ittiham olunan Fuad Qəhrəmanlıya 11 il azadlıqdan məhrumetmə cəzası istənildi. Görünür, Fuad bəy rejimi çox yandırıb.
Qəti şübhə eləmirəm ki, günahsız insanları bu qədər müddətdə həbsdə saxlamaq mümkün olmayacaq. Rejimin bugünkü qəddarlığı isə onun nə qədər həyəcan və qorxu içində olmasının göstəricisi, öz xalqına necə nifrətlə yanaşdığının sübutudur. Günahsız yerə həbs edilən bütün insanlarımız Allahın köməyi ilə eyni gündə azad olacaqlar.
