Samir Əliyev: “Artıq həssaslıq artıb və hökumət vəziyyətin ağırlığını anlayıb, real islahatlara getməlidir”
Dünya Bankı makroqitisadi sabitliyin təmin olunması məqsədilə islahatların aparılması zamanı Azərbaycan hökumətinə əhalinin həssas təbəqələrinə qarşı diqqəli olmağı tövsiyyə edir. Bu barədə Dünya Bankının Avropa və Mərkəzi Asiya üzrə baş iqtisadçısı Hans Timmer Buxarestdə video-konfrans zamanı bəyan edib. “Azərbaycan hökumətinə tövsiyyələrimiz 5 bənddən ibarətdir. Birincisi – monetar siyasətin dəyişilməsi, valyutanın çevik məzənnəsinə keçid, buna artıq nail olunub və həmin siyasətdə balansın əldə olunmasıdır ki, çətin məsələdir”, – deyə H.Timmer bildirib.
Onun sözlərinə görə, nəinki Azərbaycan, həm də neft-ixracatçıları digər ölkələr üçün vacib olan ikinci məsələ – maliyyə, o cümlədən bank sektorunun stabilləşməsidir.
“Neftin qiymətinin kəskin dəyişilməsi və ardınca gələn devalvasiya banklar üçün böyük problemə çevrilib, bu da problemli kreditlərin artımına gətirib. Bu vəziyyətin həlli üçün sxemlər tapmaq zəruridir ki, onlar dövlət büdcəsinə böyük yük olmayacaq”, – deyə H.Timmer vurğulayıb.
İqtisadçının toxunduğu üçüncü məsələ, neft və qeyri-neft gəlirləri arasında balansla davamlı ortamüddətli büdcələşdirilmədir.
“Dördüncü tövsiyyə – gəlirlərin şəffaf və ədalətli bölüşdürülməsinə nail olmaqdır. Məqsəd milli gəlirlərin azalmasından əsas yükün əhalinin daha həssa təbəqəsinin üzərinə düşməməsidir”, – deyə H.Timmer bildirib.
Onun sözlərinə görə, beşinci tövsiyyə hökumətin diqqətini yeni iş yerlərinin yaradılması, rəqabətlə bağlı vəziyyətin yaxşılaşması məqsədilə islahatların aparılması, digər sahələrdə də maliyyəyə biznesin çıxışına yönəltməyə aiddir. “Bütün bu çağırışlar üzrə Azərbaycan hökuməti ilə işləyirik. Maliyyə, büdcə proqnozlaşdırılması, özəl sektor, rəqabət sahələrində Azərbaycanla çox sayda komandalarımız çalışır”, – deyə H.Timmer bəyan edib.
Bəs, böhranın getdikcə dərinləşdiyi bir zamanda hakimiyyən prblemi həll etmək üçün verilən məsləhətlərə riayət edəcəkmi?
İqtisadçı Samir Əliyev bildirdi ki, Dünya Bankı neçə ildir ki, Azərbaycan hökumətinə tkliflərini verir. Və bu təkliflərin əsas mahiyyəti odur ki, iqtisadiyyat mümkün qədər liberallaşdırılmalı, dövlətin iqtisadiyyatda rolu azaldılmalıdır: “Dünya Bankı daim kommunal sektorun özəlləşdirilməsini, büdcə yükünün azaldılmasını daim qabardır. Eyni zamanda korrupsiyanın azaldılması da təkliflərdən biridir. O cümlədən korrupsiyaya qarşı real mübarizənin vacib olduğu qeyd edilir. Maliyyə sektorunda islahatların aparılması dəfələrlə vurğulanıb. Neftin qiyməti yüksək olanda bu təkliflər hökumət üçün o qədər də cəlbedici görünmürdü. Hökumətə bu təkliflər o qədər də maraqlı gəlmirdi. Amma indi situasiya elədir ki, artıq həssaslıq artıb və hökumət vəziyyətin ağırlığını anlayıb, real islahatlara getməlidir”.
S.Əliyev ona da vurğuladı ki, istər Dünya Bankı olsun, istər Beynəlxalq Valyuta Fondu olsun bu təşkilatların təkliflərinin əsas qayəsi iqtisadiyyatda liberallaşmanın aparılmasıdır.
Xəyal
