Biz Rüfət Səfərovu həm dəyərli hüquqşünas, həm də sözün əsl mənasında vətənpərvər bir insan kimi tanıyırıq. O, mütərəqqi düşüncəli, haqqı-ədaləti qoruyan ləyaqətli bir gəncdir. Ölkədə baş verən haqsızlıqlara, rüşvət və korrupsiyaya, habelə kütləvi hüquqsuzluğa qarşı etiraz edərək
işlədiyi prokurorluq orqanından istefa vermişdir. Nə qədər qəribə olsa da, R.Səfərova qarşı məhz rüşvət və korrupsiya ittihamı ilə 10 yanvar 2016-cı i tarixində başdan-ayağa saxta sübutlarla cinayət işi qaldırılmışdır.
Təbii ki, R.Səfərovun bu hərəkəti bəzi səlahiyyət sahiblərinin hiddətinə səbəb olmalıydı və oldu da.
O,tamamilə absurd ittihamlarla 9 il həbs cəzasına məhkum edildi. Hətta Lənkəran Ağır Cinayətlər Məhkəməsi işə baxarkən müdafiəçi B.Bayramova təzyiqlər edilmiş, – müdafiə çıxışına hazırlaşmaq üçün vaxt istənilsə də buna imkan verilməmişdir; üstəlik, vəkil haqqında xüsusi qərar çıxarılacağı ilə hədələnmişdir.
Eyni zamanda, təqsirləndirilən R.Səfərov son söz üçün vaxt istəsə də hakim buna razılıq verməmişdir. Bu məhkəmə tarixində görünməmiş bir hadisə idi. Bu isə, öz növbəsində, AR-nın tərəfdar çıxdığı beynəlxalq konvensiyalara və Azərbaycan respublikası qanunvericiliyinə birbaşa ziddir.
Məqsədi və vəzifəsi ədaləti təsbit etmək və onun müdafiəsində dayanmaq olan ölkənin məhkəmə sistemi ədalətsiz, qanunsuz və ancaq nonsens kimi dəyərləndirilməli olan bir hökm çıxarmışdır.
Hesab edirik ki, bu, təkcə azad düşüncəyə, müstəqil demokratik təfəkkürə malik olan gənc bir hüquq işçisinə qarşı yox, eləcə də özünü hüquqi dövlət elan edən ölkənin demokratik imicinə böyük bir zərbədir.
Biz, Müdafiə Komitəsinin üzvü olan ictimai xadimlər, jurnalistlər, hüquqşünaslar bu sayaq aşkar haqsızlığa qarşı öz qəti etirazımızı bildirir və ümid edirik ki, həm ölkə rəhbərliyi, eləcə də hüquq müdafiəçiləri bu qanunsuz hökmün absurdluğunu dərk edərək yol verilmiş bu haqsızlığıntezliklə aradan qaldırılmasına yardımçı olcaqlar. Əminik ki, ölkədə fəaliyyət göstərən diplomatik korpuslar, o cümlədən insan hüquq və azadlıqları ilə məşğul olan beynəlxalq təşkilatlar da bu məsələnin ciddiliyinin fərqində olacaqlar.
Müdafiə Komitəsi bəyan edir ki,R.Səfərovun konstitusiyada təsbit edilən hüquqlarının pozulmasıazad sözə və müstəqil düşüncəyə malik vətəndaşa qarşı cəza tədbiridir.
Ölkə təkcə iqtisadi deyil, həm də siyasi böhran qarşısındadır. Sosial-iqtisadi, siyasi və psixoloji reallığın belə mürəkkəb bir məqamında məhkəmənin sifarişlə azad düşüncəyə qənim kəsilməsi, habelə müstəqil yaşam tərzi seçmiş mübariz bir gəncin 9 il azadlıqdan məhrumetmə cəzasına məhkum edilməsi yolverilməzdir.
Müdafiə Komitəsi Azərbaycan Respublikasının Konstitusyasında nəzərdə tutulan məqbul qanuni-hüquqi vasitələrdən istifadə edərək Rüfət Səfərovun azad olunmasına səy göstərəcək, bu istiqamətdə bütün zəruri addımları atacaqdır.
Eldəniz Quliyev – Azrbaycan Ziyalılar Birliyinin sədri, kinodramaturq
Bəhruz Bayramov – hüquqşünas
Vidadi Mirkamal – hüquqşünas, ədliyyə generalı
Mətləb Mütəllimli – hüquqşünas
Namizəd Səfərov – hüquqşünas
Müzəffər Baxışov – hüquqşünas
Yalçın İmanov – hüquqşünas
Qurban Məmmədov – hüquqşünas
Oqtay Gülalıyev – hüquq müdafiəçisi
Pərviz Həşimli – Siyasi və Mülki hüquqlar Müdafiə Mərkəzinin rəhbəri, keçmiş vicdan məhbusu
Şahvələd Çobanoğlu – jurnalist
Əvəz Zeynallı – jurnalist, keçmiş vicdan məhbusu
Zümrüd Yağmur – yazıçı
Rüstəm Behrudi –şair
Məmməd İsmayıl – şair
Səadət Cahangir – şairə, jurnalist
