SOCAR-ın xalqı necə borca salır?

Yoxsulluqla amansız mübarizə aparan xalqımız bu səhəri də neqativ bir xəbərlə açdı. Avropa futbol çempionatına sponsorluğa 120 milyon manatı yenicə xərcləmiş Dövlət Neft Şirkətimiz (SOCAR) indi də Avstriya bankından 250 milyon dollar kredit aldı. Ötən il “Qazprombank”dan 489 milyon dollar, Azərbaycan Beynəlxalq Bankından 1 milyard 291 milyon manat, 2014-cü ilin dekabrında isə Kanadadan 3.3 milyard dollar kredit almışdılar. Böhrandan əvvəl də SOCAR-ın xarici borcu 6.9 milyard dollar idi. Lakin SOCAR dayanmaq bilmir. Avropa Yenidənqurma və İnkişaf Bankı (EBRD), Asiya İnkişaf Bankından 2 milyard dollar, Koreyanın «Eximbank»ından isə 1 milyard avro kredit almaq istəyir. Fikirləşirsiniz ki, bəs SOCAR bu qədər borcun altından necə çıxacaq? Əlbəttə, bizim hesabımıza. Ya büdcədən, Mərkəzi Bankdan kömək ediləcək, ya da yanacağın qiyməti qaldırılacaq. İndi əmin oldunuz ki, dünyada (?) futbolun, cüdonun və s. inkişafı adı ilə dağıdılan, korrupsiya layihələrilə mənimsənilən pullar bizim pullardır?