Anar Məmmədli, keçmiş vicdan məhbusu
Cəbhə xəttində baş vermiş döyüşlərdə insan itkiləri, orduya ictimai nəzarət və sosial medianı zəbt edən psevdovətənpərvər çıxışlar çoxumuzu narahat edir. Bu olaylarla bağlı müzakirələrdə, o cümlədən hakim partiyanın AXCP sədrinin evi qarşısında təşkil etdiyi aksiyalarda yer alan gənclərin baxışları və intellektual səviyyəsi isə bir ayrı nigarançılıq yaradır.
Məsələ burasındadır ki, müzakirə və çağrışlarda hansı tərəfdə yer almasından asılı olmayaraq, gənclərin məntiqi, tənqidi və rasional arqumentlər irəli sürməsi və mübahisələndirməsini arzu edərdik. Ancaq hiss olunur ki, ölkədə çox çirkin məqsədlər naminə idarə olunan və ya buna məcbur qalan gənclər yetişir. Acınacaqlı haldır ki, belələrinin sayı durmadan artır və bu cür gənclərin ibtidai, arxaik və məhdud görüşlü dəyərləri ölkədə vətəndaş cəmiyyəti, demokratik institutlar və sosial rifahın formalaşmasında ciddi təhlükə yaradır. Məsələ heç də milli və ya dini kimlik üzərindən abstrakt gündəm yaratmaqla cari ictimai-siyasi mövzulardan süni olaraq yayınmaqdan getmir. Ən ağrılısı bu cür qrupların siyasi hakimiyyətin əlində demokratik dəyərlərin yayılmasının qarşısının alınmasında təbii resursa çevrilməsindədir. Bu adamlar kitabdan, mütaliədən və ədəbiyyatdan uzaq görünürlər.
Və bu cür gənclər ilə bağlı üzüntü yaşayarkən yaşıdlarının tam əksi olan işıqlı və parlaq fikir gənclərimizi düşünürəm. Belə parlaq baxışlı gənclərimizdən birini – İlkin Rüstəmzadəni yalnız həbsdə olarkən 13 saylı cəzaçəkmə müəssisəsində tanıdım.
İndi son hadisələrlə bağlı müzakirələri izlədikcə İlkinin iqtisadiyyat, ədəbiyyat, fəlsəfə və incəsənətlə bağlı mühakimələrini və təhlillərini xatırlayıram. İlkinin həbsi onun ali təhsilini başa vurmasına mane oldu. Bununla da o iqtisadiyyat üzrə təhsilini davam etdirmək imkanından üç ildir ki, məhrumdur. Ancaq əminəm ki, İlkin azadlıqda olsaydı indi Qərb ölkələrinin birində hansısa akademik mərkəzdə çalışırdı və ya təhsil alırdı. İlkin həm də yardımlaşmağı, paylaşmağı və təmənnasız olaraq insanlar üçün çalışmağı bacaran gəncdir və bu keyfiyyətləri ilə o ictimai mənafe naminə çalışan hüquq müdafiəçisi də ola bilər. İndi İlkinin intellektual bacarıqlarını xatırladıqca, habelə son hadisələri saf-çürük etdikcə onun timsalında intellektual gəncliyin azlıqda qalmasına üzülməmək olmur. Ölkəmizin parlaq gələcəyi üçün təhsilli, aydın fikirli və humanist gənclərin – İlkinlərin azadlıqda olması gərəkdir.
