«Cəlilabad prokuroru məni heç bir əsas olmadan həbs etdirib»
Hazırda həbsdə olan Alışov Şahin Alış oğlu həbsxanadan “Azadlıq”a vasitəsilə baş prokuror Zakir Qaralova müraciət edib. Şahin Alışov müraciətində əsassız yerə həbs olunduğunu bildirir: “2015-ci il noyabr ayının 11-də Faiq adlı müştərim mənə zəng edərək Əliağa adlı bir nəfəri Cəlilabad rayonuna aparıb-apara bilməyəcəyimi soruşdu. Bildirdim ki, 80 manat müqabilində bu işi görərəm. O, Əliağanın telefon nömrəsini mənə verdi. Əliağa ilə zəngləşərək vaxtı və görüş yerimizi müəyyənləşdirdik.
Danışdığımız vaxtda Əliağa ilə görüşüb Cəlilabada yola düşdük. Yolda Əliağa mənə rayona getmək səbəbini demədi. Mən də ondan bu barədə soruşmadım. Ümumiyyətlə isə mən taksi sürücüsü kimi hər gün bir neçə nəfəri müxtəlif yerlərə aparıram və səyahət zamanı müştərilərə sual verib onları narahat etmirəm. Biz Cəlilabad rayonu Qaravəndli kəndinin yanına çatanda Əliağa ayaqyoluna getmək istədiyini dedi. Mən maşını saxladım. Əliağa avtomobildən uzaqlaşandan bir neçə dəqiqə sonra mülki geyimdə olan 4-5 nəfər üzərimə hücum edib, qolumu burub məni yerə yıxmağa çalışdı. Kim olduqlarını bilmədiyim üçün onları maşını oğurlamaq istədiyini zənn etdim. Müqavimət göstərməyə çalışdım ancaq onlar məni yerə yıxaraq daha sonra özləri ilə birlikdə polis şöbəsinə apardılar. Bundan sonra onların polis əməkdaşı olduğunu başa düşdüm. Hətta şöbədə onlara dedim ki, niyə polis olduğunuzu demədiniz ki, mən də tabe olum? Polis şöbəsində bəlli oldu ki, mənimlə gələn Əliağa 6 kq narkotik alarkən saxlanılıb. Aydın oldu ki, əslində Əliağa maşından düşərkən narkotik almağa gedibmiş. Mən dindirmə zamanı bu işdən xəbərsiz olduğumu, Əliağanı birinci dəfədir gördüyümü və müştəri kimi rayona gətirdiyimi bildirdim. Əliağa da ifadəsində mən deyənləri təsdiqlədi. Və taksi sürücüsü kimi mənimlə Faiq vasitəsilə danışdığını bildirdi. Əslində ilk baxışdan da aydın idi ki, heç bir narkotik alıcısı tanımadığı taksi sürücüsünə ilk görüşdə əsl məqsədinin açıb deməz. Ancaq buna baxmayaraq Cəlilabad rayon prokroru taleyimin onun əlində olduğunu bildirdi. Məni də bu cinayət işinə qoşdu. Barəmdə Cinayət Məcəlləsinin 234.4.3 maddəsilə cinayət işi başlandı. 4 ay Bakı Istintaq Təcridxanasında saxlanılandan sonra Əliağa ilə üzləşdirilmək üçün Cəlilabad rayonuna aparıldım. Əliağa bildirdi ki, mənim onun narkotik alacağından heç bir xəbərim olmayıb. O, məni ilk dəfə rayona gələrkən görüb. Telefon danışıqlarının yoxlanılması zamanı da aydın oldu ki, Əliağa ilə mənim aramda əvvəllər hər hansı əlaqə olmayıb. Ancaq Cəlilabad rayon prokroru hər vəchlə məni də bu işə qatıb həbs etdirmək istəyir. Ortada əleyhimə heç bir sübut olmadan həbs müddətim daha 2 ay artırıldı. Mən 46 yaşındayam, yoldaşım yoxdur, 2 qız övladım var. Və onları böyütmək üçün bu günə kimi çox əzaba qatlaşmışam. Evim olmadığı üçün mən həbs ediləndən sonra ali məktəb tələbəsi olan övladlarım qohum evində qalırlar. Məndən başqa övladlarımın problemlərini həll edəcək ikinci bir adam yoxdur. Ona görə də xahiş edirəm ki, baş prokuror Zakir Qaralov Cəlilabad rayon prokrorunun özbaşnalığının qarşısını alsın”.
