Bakının Nəsimi rayonu, Cavadxan küçəsi, 5 ünvanında fəaliyyət göstərən “Moskva” univermağından oğurlanan qızıl-zinət əşyalarının məbləği açıqlanıb.
Hüquq-mühafizə orqanlarından verilən məlumata görə, qarət zamanı univermaqdan ümumilikdə 300 min manatlıq qızıl-zinət əşyaları oğurlanıb.
Hazırda hüquq-mühafizə orqanları əməkdaşları faktla bağlı əməliyyat axtarış tədbirlərini davam etdirir. Məlumata görə, oğurluq hadisəsilə bağlı univermaq işçiləri də daxil olmaqla 10-dan artıq şəxs Nəsimi rayon Polis İdarəsinin 19-cu Polis Bölməsində dindirilsə də, hələlik bu hadisə ilə əlaqədar saxlanılan olmayıb.
Məlumatda o da qeyd olunur ki, univermaq Daxili İşlər Nazirliyinin Baş Mühafizə İdarəsinin əməkdaşları tərəfindən mühafizə olunur. Hadisə vaxtı mühafizəçilərin yatdığı ehtimal edilir.
***
Bakının Nəsimi rayonunda ticarət mərkəzindən oğurluq edilib.
APA-nın məlumatına görə, hadisə Cavadxan küçəsi 5 ünvanında yerləşən “Moskva” univermağında baş verib.
Gecə saatlarında univermağa gələn naməlum şəxslər qapını sındırmaq yolu ilə içəri daxil olublar. Oğrular ticarət mərkəzindən xeyli miqdarda qızıl-zinət əşyalarını götürərək hadisə yerini tərk ediblər. Ticarət mərkəzinin mühafizəçisi hadisə zamanı yatdığından, oğurluqdan xəbəri olmayıb. O, hadisədən xəbər tutduqdan sonra polisə məlumat verilib.
Hadisənin baş verən əraziyə və nəzarət kameralarına polis tərəfindən baxış keçirilib. Nəsimi Rayon Polis İdarəsinin 19-cu Polis Bölməsinin əməkdaşlarının keçirdiyi əməliyyat nəticəsində hadisəni törətməkdə şübhəli bilinən iki nəfər saxlanılıb. Dəstənin bütün üzvləri tutulmadığı üçün saxlanılan şəxslərin adı açıqlanmır. Oğurluqda iştirak edən digər şəxslərin axtarışları davam edir.
Faktla əlaqədar Nəsimi Rayon Polis İdarəsində Cinayət Məcəlləsinin 177-ci (Oğurluq) maddəsi ilə cinayət işi başlanılıb. Araşdırma aparılır.
