Cavid Hüseynov: “Bilsəydim ki, məsuliyyətsizlik eləyəcəklər, onu öz hesabıma oradan çıxarıb başqa yerə aparardım…”
Jurnalist Rasim Əliyevin döyülərək öldürülməsilə əlaqədar həbs olunan futbolçu, “Qəbələ” klubunun keçmiş kapitanı Cavid Hüseynov yanvarın 26-da məhkəmə qarşısına çıxarılıb. O, bibisi oğlu Elşən İsmayılov da daxil olmaqla, Rasim Əliyevi döyüb öldürməkdə təqsirləndirilən beş nəfərin məhkəməsində şahid qismində ifadə verib. Kürdəxanıdakı 1 saylı istintaq təcridxanasında saxlanılan Cavid Hüseynovun əlləri qandallı olub.
Futbolçu ifadəsində bildirib ki, bibisi oğlunun digərlərilə birlikdə Rasim Əliyevi döyməyə getməsi barədə məlumatı olmayıb. Bu haqda hadisədən bir neçə saat sonra xəbər tutub: “Heç Rasimin mənim barəmdə “facebook“da yazdığı statusdan da xəbərim yox idi. Evdə idim, bibim oğlu Elşən “Whatsapp“a mesaj göndərdi ki, Rasim Əliyev adlı şəxs sənin haqqında belə bir şey yazıb. Mən də dedim, söhbətin başını burax, jurnalistdir, qoy yazsın, işin olmasın. Elşən dedi ki, “mən Rasimlə danışmışam, məsələyə mən də qarışmışam, çünki mənim anamı söyüb“. Elşəndən Rasimin nömrəsini alıb, ona zəng elədim. Uzun danışdıq, söhbətimiz mülayim keçdi. “Facebook“da belə bir status yazmasının səbəbini soruşdum, dedi ki, “yunan jurnalist həmkarıma hörmətsizlik eləmisən“. Mən isə o hərəkətdə heç bir hörmətsizlik etmədiyimi bildirdim“.
“Dörd yaşımda atam şəhid olub“
Cavid Hüseynov qeyd edib ki, onun Yunanıstandakı oyundan sonrakı jesti yanlış anlaşılıb: “Məndə vətənpərvərlik uşaqlıqdan olub. Qardaşımın altı, mənim dörd, bacımın isə iki yaşı olanda mənim atam Qarabağ müharibəsinə yollanıb, şəhid olub. Evimizdə həmişə Azərbaycan bayrağı olub. Həmin oyun zamanı tribunada yunanların bizim bayrağımızı təhqir etməsi mənə pis təsir elədi. Oyundan sonra jurnalistlərə müsahibədəki əl hərəkətim də yanlış anlaşılıb. Mənə Türkiyə ilə bağlı sual verdilər. Çünki kürəyimə Türkiyənin bayrağını da salmışdım. Mən həmin hərəkətlə Azərbaycan–Türkiyə qardaşlığına işarə eləmişdim. Bunu da telefon danışığımızda Rasimə izah elədim. Onu başa salandan sonra məndən üzr istədi. Ona dedim ki, mümkündürsə, yaz ki, “Cavidlə danışdım və səhv anladığım üçün ondan üzr istəyirəm“. Sonra Elşənə zəng eləyib dedim ki, heç nəyə ehtiyac yoxdur, Rasimlə danışıb məsələni bağladıq. Sonradan Elşəngilin Rasimlə görüşməyə getməsini, aralarında nə baş verdiyini bilməmişəm“.
“Yolda polislər məni saxladı…”
Bundan sonra məşqə yollandığını deyən futbolçunun sözlərinə görə, oradan çıxanda meneceri Səbuhi ona hadisə barədə internetdə yayılmış məlumatları çatdırıb, jurnalistlərin məsələ ilə əlaqədar ona zəng etdiyini bildirib: “Elşənə zəng elədim, dedi ki, “Rasimlə görüşdüm, ona bir təpik vurdum“. Elşəni xeyli danladım. Çünki məni saymamışdı. Elşənə dedim ki, necə vurmusansa, Rasim xəstəxanaya düşüb. Ardınca isə bir insan kimi xəstəxanaya getdim. Xəstəxanada Rasimlə görüşdüm. Rasim dedi ki, “sənin bibioğlun məni çay içməyə dəvət elədi və döydü“. Orada Rasim dedi ki, telefonu və pulqabısını götürüblər. Ondan üzr istəyib çıxıb getdim. Səhəri gün Qəbələyə gedirdim, yolda qardaşım Almaniyadan zəng elədi ki, Rasim ölüb. Tez Elşənə zəng elədim ki, özünə vəkil tut, get, təslim ol. Yolda polis məni saxlayıb, geri qaytardı“.
Cavid Hüseynov jurnalistin ölümündə hakimləri də məsuliyyətsizlikdə ittiham edib: “Mən Rasimlə danışanda hər şey yaxşı idi. Bilsəydim ki, məsuliyyətsizlik eləyəcəklər, onu öz hesabıma oradan çıxarıb başqa xəstəxanaya aparardım“.
Cavid Hüseynov mərhum jurnalistin anası Teyfurə Əliyevanın suallarını cavablandırarkən vurğulayıb ki, onun Rasimlə dəfələrlə telefonla danışması barədə deyilənlər həqiqətə uyğun deyil: “Mən onunla yalnız bir dəfə danışmışam“.
Cavid Hüseynovdan sonra digər şahidlər – Nihad Abbaslı və Ramin İmranov da dindirildi. Nihad Abbaslı da futbolçunun əmisi oğludur və Elşən İsmayılov polisə təslim olmağa gedərkən onunla birlikdə olub.
Ramin İmranov isə döyülmənin şahidi olub: “Yaxınlaşıb kömək eləmək istəyəndə Rasim durub qaçdı. Yerdən maşının açarını, saatı, qəpiklərini yığıb o biri səkidə ona verdim. Soruşdum ki, xəstəxanaya aparım? Dedi ki, yox, özü gedəcək. Maşınına əyləşib getdi“.
Məhkəmə prosesi fevralın 2-də davam edəcək.
Xatırladaq ki, Rasim Əliyev avqustun 8-də Bayıl qəsəbəsində bir qrup şəxs tərəfindən döyüldükdən sonra xəstəxanaya yerləşdirilib və avqustun 9-na keçən gecə orada dünyasını dəyişib. Bu cinayət işi ilə əlaqədar altı nəfər həbs olunub. Onlardan beşi – Elşən İsmayılov, Camal Məmmədov, Arif Əliyev, Kənan Mədətov və Samir Mustafayev CM–nin 126.3-cü (qəsdən sağlamlığa ağır zərər vurma, zərərçəkmiş şəxsin ölümünə səbəb olduqda) maddəsi ilə ittiham olunur. Cavid Hüseynovun işi isə ibtidai istintaqın sonunda ayrılıb. O, CM–nin 307.1 (ağır cinayətin hazırlanmasını və ya törədilməsini bilərək həmin cinayət barəsində xəbər verməmə) və 307.2-ci (qabaqcadan vəd etmədən ağır cinayəti gizlətmə) maddələri ilə təqsirli bilinir. Bu gün onun işi üzrə də məhkəmə prosesi başlayır.
Aytən Məmmədova
