Siqaret qutularının üstündəki tarixlər rəsmi izahatı alt-üst etdi
Ötən ilin dekabrın 21-də olan devalvasiyadan sonra siqaret məhsullarının qiyməti təqribən 50 faiz qaldırıldı. Yanvarın 8-də siqaret çəkənlər daha bir sürprizlə üzləşiblər. Siqaretin qiymətlərində 20-30 faiz artım müşahidə olunub. Bu dolların yenidən bahalaşması ilə əlaqələndirilir.
Bazarda böyük pay sahibi olan şirkətlərdən biri “Japan Tobacco İnternational Baku”dan bildirilib ki, tütün məmulatlarının bahalaşmasına səbəb dolların real məzənnəsinin artımı ilə bağlıdır.
Məlum olduğu kimi, tütün məmulatlarının istehsalı idxala bağlı olan prosesdir. Artıq uzun müddətdir davam edən dolların bahalaşması bu sahəyə təsir etməkdədir.
İqtisadiyyat və Sənaye Nazirliyindən isə bildiriblər ki, hazırda tütün məmulatlarının bahalaşması ilə bağlı araşdırma aparılır və gün ərzində ictimaiyyətə bahalaşmanın səbəbləri və araşdırmanın nəticələri açıqlanacaq.
Maraqlı məqamlardan biri də ondan ibarətdir ki, hal-hazırda satışda olan siqaretlərin demək olar ki, hamısının istehsal tarixi ən azı 2-3 ay bundan əvvələdir. Deməli, həmin məhsullar anbarlardan satış məntəqələrinə göndərilib.
Əməkdaşımızın satış məntəqələrində olan siqaretlərin üzərində olan istehsal tarixlərinin fotolarını təqdim edirik.
İqtsadçı-ekspert Vahid Məhərrəmovun araşdırmasına görə: “Son illərdə Azərbaycanda siqaret çəkənlərin sayı həddindən artıq çoxalıb. Dünyada istehsal olunan siqaretlərin sayını siqaret çəkənlərin sayına böldükdə, digər ölkələrdə adambaşına düşən siqaret qutusunun sayı 40 ədəd olduğu halda, ölkəmizdə bu göstərici rəsmi statistikaya görə 53 ədəddir. Amma bəzi mənbələrdən aldığım məlumata görə, bu rəqəm 74 qutudur. Halbuki 10 il əvvəl tələbat 20 qutu olub”.
