Səudiyyə Ərəbistanı Tehrandakı səfirliyinə hücumdan sonra diplomatlarını İrandan təxliyyə etməyə başlayıb.
Bu barədə “Əl-Ərəbiyyə” telekanalı məlumat yayıb.
Qeyd olunur ki, diplomatlar artıq Dubaya yola salınır. İlkin məlumatlara görə, təqribən 50 əməkdaş təxliyyə olunub.
Səudiyyə Ərəbistanının Xarici İşlər naziri Adil əl-Cübeyr İranla diplomatik münasibətlərin dayandırıldığını və İran diplomatlarına ölkəni tərk etmək üçün 48 saat vaxt verildiyini bəyan edib.
İki ölkə arasında münasibətlər ərəb dövlətində şiə təriqətindən olan alim Nimr ən-Nimr də daxil olmaqla “terrorçuluq və ona təhrikçilikdə” ittiham olunan 47 nəfərin edam edilməsindən sonra gərginləşib.
Yanvarın 3-də İranda etirazçılar Səudiyyə Ərəbistanının Tehrandakı səfirliyinə hücum edərək binada yanğın törədiblər, həmçinin səfirliyin daxili müəssisəsini dağıdıblar. Hücumdan sonra polis 40 nəfəri saxlayıb. (report.az)
