“Quyulardan çıxan karbohidrogenlərin yanması dənizə neft sızması ehtimalını sıfıra endirir”.
“Günəşli” yatağındakı 10 saylı dərin dəniz özülündə baş vermiş qəza xeyli sayda insan itkisi ilə yanaşı, bir sıra başqa problemlərə də yol açıb. Bu problemlərdən biri də ekoloji tarazlığın pozulması ilə bağlıdır. Yanğın hələ də söndürülməməsi bu problemi daha da aktuallaşdırır.
Ekologiya və Təbii Sərvətlər Nazirliyinin Mətbuat Xidmətindən Femida.az-a daxil olan məlumata görə, dənizdə çirklənmə, platformanın ətrafında neft ləkələri yoxdur:
“Xəzər dənizindəki “Günəşli” yatağının 10 saylı stasionar dərin dəniz özülündə baş vermiş yanğın hadisəsindən sonra ətraf mühitə mümkün təsirlərin öyrənilməsi məqsədi ilə Ekologiya və Təbii Sərvətlər Nazirinin göstərişi əsasında nazirliyin mütəxəssislərindən ibarət Ekspedisiya Qrupu yaradılıb. Qrupun tərkibinə Xəzər Kompleks Ekoloji Monitorinq İdarəsinin, Milli Hidrometeorologiya və Ətraf Mühit üzrə Milli Monitorinq departamentlərinin mütəxəssisləri daxil edilib”.
“Hazırda 7 quyuda yanğın davam edir”…
“Qeyd edək ki, “Günəşli” yatağının 10 saylı stasionar dərin dəniz özülündə istismara verilən 30 quyudan 28-i qəza baş verənə qədər işlək vəziyyətdə olub, 1 neft və 1 qaz quyusu işləməyib. İstismar edilən 28 quyudan 21-i qaz-lift üsulu ilə işləyən neft, 7-si isə qaz quyusudur. Neft quyuları qaz-lift üsulu ilə işlədiyindən qəza zamanı quyulara qazın vurulması dayandırılıb. Bu səbəbdən neftin su mühitinə düşmək ehtimalı yoxdur. Hazırda yanğının davam etdiyi digər 7 quyudan 4-ü qaz, 3-ü isə qaz-kondensat quyularıdır ki, 4 qaz quyusundan çıxan təbii qaz tam yandığı üçün atmosfer havasına zərərli təsiri nisbətən azdır. Yəni bu, ölkədəki istilik elektrik stansiyalarında yandırılan qazın atmosferə atdığı karbon birləşmələrindən ibarətdir. Yalnız 3 qaz-kondensat quyusundan müəyyən qədər kondensat sızması ehtimalı dəyərləndirilir. Lakin bu quyulardan çıxan karbohidrogenlərin yanması dənizə neft sızması ehtimalını sıfıra endirir və yuxarıda qeyd edildiyi kimi karbohidrogenlər yandıqda daha az zərərli maddələrə çevrilir”.
“Neft ləkələri yoxdur”…
“Ekspedisiya Qrupu ilkin müşahidələr aparır, sudan və atmosfer havasından nümunələr götürülməkdə davam edir. Vizual müşahidələr göstərir ki, dənizdə çirklənmə, platformanın ətrafında neft ləkələri yoxdur. Bununla belə, təhlillər üçün sudan və atmosferdən nümunələrin mütəmadi olaraq götürülməsi üçün tədbirlər görülür və nazirliyin laboratoriyalarında araşdırılması, ekspedisiya tərəfindən hadisə yerində digər tədbirlərin həyata keçirilməsi, Xəzərin canlı mühitinə təsirin müəyyən olunması təmin edilir. Təhlillərin nəticəsi barədə ictimaiyyətə əlavə məlumat veriləcək”.
Qeyd edək ki, Dekabrın 4-də baş verən güclü tufan saat 17.40 radələrində “Günəşli” yatağındakı 10-cu dərin dəniz özülündə qaz xəttini sıradan çıxarıb, nəticədə yanğın baş verib. Hadisə baş verən vaxt “Günəşli” yatağındakı 10-cu platformada 63 nəfər olub. Onlar xilas olmaq üçün platformanın kənarlarından asılmış xilasetmə qayıqlarına miniblər. Lakin kəskin hava şəraiti, güclü külək və iri dalğalar nəticəsində qayıqlardan biri cırılaraq dənizə düşüb.
Hazırda “Günəşli” yatağındakı 10-cu dərin dəniz özülündə yanğın davam edir.
(femida.az)
