Rumıniyada məhkəmə ölkənin Ticarət və Sənaye Palatasının keçmiş rəhbəri Mixail Vlasov barəsində 5 il azadlıqdan məhrumetmə cəzası çıxarıb. Vlasov vəzifə səlahiyyətlərindən sui-istifadə etməkdə və rüşvət almaqda ittiham olunurdu. «Assoşieyted Press»in məlumatına görə, bu, Vlasov barəsində yekun qərardır və ondan şikayət verilə bilməz. 2007-2014-cü illərdə Palataya rəhbərlik edən Mixail Vlasovun bir biznesmendən 1 milyon avro rüşvət istədiyi bildirilir. Bunun müqabilində Vlasov həmin biznesmenin məhkəmə işini yoluna qoymalı idi. Keçmiş məmur Buxarestdəki restoranların birində 200 min avro rüşvət alarkən yaxalanıb. Rumıniya son illər Avropa Birliyinin tələbi ilə korrupsiyaya qarşı mübarizəni gücləndirib. Hazırda ölkənin baş naziri Viktor Ponta ilə də bağlı korrupsiya iddiaları araşdırılır. Ponta korrupsiya ilə yanaşı, sənəd saxtalaşdırma, vergidən yayınma və çirkli pulların yuyulmasında da ittiham olunur.
Gültəkin
