Әli Kərimli: "Cəmil Həsənli ötənilki 6 dəqiqəlik çıxışları ilə bu oğru hakimiyyəti necə ifşa edibsə, hələ də tüstüsü təpəsindən çıxır"
Fevralın 20-də hakim Aqşin Əfəndiyevin sədrliyi ilə Yasamal rayon məhkəməsi ötən ilin sentyabr ayında baş vermiş avtomobil qəzası hadisəsi ilə bağlı Milli Şuranın sədri Cəmil Həsənlinin qızı Günel Həsənliyə hökm oxuyub. Heç bir tutarlı hüquqi əsas göstərmədən məhkəmə Günel Həsənlini 1 il 6 ay müddətinə azadlığının məhdudlaşdırılması ilə bağlı qərar verilib. G.Həsənli məntəqə tipli həbsxanada cəza çəkməyə məhkum edib. Məsələ burasındadır ki, bu iş üzrə şikayətçi yoxdur və cinayət işi hüquq-mühafizə orqanlarının təşəbbüsü ilə fakt üzrə qaldırılıb.
Cəmil Həsənli məhkəmənin qərarını özünün siyasi fəaliyyətinə görə qızının cəzalandırılması kimi şərh edir.
“Hələ 2014-cü ilin oktyabr ayının 2-də Daxili İşlər Nazirliyinin mətbuat xidməti baş vermiş hadisə ilə bağlı yalan məlumat yaymış və qəsdən faktları saxtalaşdırmışdı. Lakin məlumatın yalan olduğu faktlarla (o cümlədən foto materialla) ortaya qoyulduqda, nazirlik bu yalan məlumata görə ictimaiyyətdən üzr belə istəmədi. Məsələyə, hüquqi don geyindirmək üçün Ədliyyə Nazirliyinin ekspertiza institutu hadisə ilə bağlı tibbi və texniki rəy vermiş, hər iki rəy qəsdən baş vermiş hadisəni “ağırlaşdırıcı” məcraya yönəltmişdir. Hadisə zamanı heç bir ağır, az ağır zərər yetirmə halları olmadığı halda ekspertizanın tibbi rəyində bu az ağır zərər yetirmə kimi təfsir edilmişdir. Halbuki Günel Həsənli hadisə baş verən kimi zərərçəkmiş 86 yaşlı Ədilə xanım Səlimovanı Respublika Klinik xəstəxanasına aparmış və klinikada müayinədən sonra onda hər hansı sınıq, ağır və az ağır xəsarət izləri olmadığı üçün Ədilə xanım evinə buraxılmışdı. Eyni zamanda bu barədə xəstəxananın qeydiyyat kitabında müvafiq qeydlər edilmişdi. Texniki ekspertizada isə ekspertlər yalnız sürücünün məsuliyyəti məsələsinə toxunmuş piyadanın məsuliyyəti məsələsini isə məqsədli şəkildə diqqətdən kənarda qoymuşlar. İşdə vəkil kimi çıxış edən Fəxrəddin Mehdiyev bu ekspertiza rəyləri ilə bağlı vəsatətlə çıxış etsə də, lakin onun qaldırdığı heç bir vəsatət hakim Aqşin Əfəndiyev tərəfindən təmin edilməmişdir. Yeri gəlmişkən məhkəmə prosesi başlayanda Ədilə xanım Səlimova öz təşəbbüsü ilə məhkəmə prosesinə gəlmiş və onun baş vermiş hadisə ilə bağlı Günel Həsənliyə qarşı heç bir iddiasının olmadığın həm şifahi, həm də yazılı formada bildirmişdi. Məhkəmə prosesində dindirilən bütün şahidlər bu hadisədə Günel Həsənlinin günahının olmadığını qeyd etmişdilər. Hökm oxunarkən işdə ölüm, sınıq, ağır xəsarət hadisəsinin olmadığı, zərərçəkən kimi təqdim olunan Ədilə Səlimovanın hadisə baş verdiyi gündən indiyə qədər aktiv hərəkətdə olduğu, Günel Həsənlinin himayəsində iki azyaşlı uşağın olması, onun birinci dəfə məhkəmə qarşısına çıxarılması nəzərə alınmamışdır”, – deyə Cəmil Həsənli bildirir.
Milli Şura sədri hakimin qərar çıxarmaq üçün xeyli tərəddüd içində olduğunu da xatırladıb: “Hakim fevralın 19-da səhər saat 10:45-də hökmü elan etmək üçün müşavirəyə getsə də, saat 12-də məhkəmə zalına qayıtmamış və məhkəmə prosesini həmin gün saat 16-ya keçirmişdir. Lakin saat 16-da da hakim hökmü elan etməyə hazır olmamış, prosesin vaxtını fevralın 20-si saat 12-yə təyin etmişdir. Fevralın 20-də oxunan hökmdə Günel Həsənli 1 il 6 ay müddətinə məntəqə tipli müəssisədə cəza çəkməyə məhkum edilməklə yanaşı, sürücülük hüququndan da məhrum edilmişdir. Belə bir sərt qərar baş verən hadisə ilə adekvat olmayıb, mənim müxalif mövqeyimlə bağlıdır. Birinci dəfə deyil ki, Azərbaycan məhkəmələri valideynlərin siyasi mövqeyinə görə onların uşaqlarını cəzalandırırlar”.
***
