ABŞ-Azərbaycan münasibətlərində “bəzi dairələr” axtarışına çıxanların məntiqi
Azərbaycan hakimiyyəti bütün dünyanı inandırmağa çalışır ki, qatıq qara rəngdə olur. Hamının bildiyi həqiqəti öz yalanları ilə dəyişdirmək cəhdi hakimiyyətin hobbisinə çevrilib. Bugün Azərbaycan – ABŞ münasibətlərinin hansı səviyyədə olduğu heç kimə sirr deyil. Münasibətlərdəki soyuqluğu, gərginliyi hiss etmək üçün siyasətçi olmağa da ehtiyac yoxdur. Hakimiyyətin nəzarətində olan mətbuat orqanları, telekanallar, hökumət təmsilçiləri son dövrlər fəaliyyətlərini ABŞ-ın tənqidi üzərində qurublar. Amma bugünlərdə mətbuata açıqlama verən PA ictimai-siyasi məsələlər şöbəsinin müdiri Əli Həsənov sübut etməyə çalışıb ki, ABŞ-Azərbaycan münasibətləri dostluq-qardaşlıq səviyyəsindədir: “Biz ABŞ ilə Azərbaycan arasında gərgin münasibətlər müşahidə etmirik. Azərbaycanla ABŞ arasında iqtisadi, siyasi, sosial və digər sahələrdə əməkdaşlıq davam edir. Bəzi dairələr bu münasibətləri kəskinləşdirməyə çalışırlar, onlar ABŞ mediasında ara-sıra Azərbaycanla bağlı neqativ yazılar dərc etdirirlər. Həmin materiallar bir qayda olaraq gerçəkliyi əks etdirmir və ikitərəfli münasibətləri korlamaq istəyən ayrı-ayrı mərkəzlərin sifarişləri əsasında hazırlanır və yayımlanır: Biz bunların qarşısını almağa çalışırıq və düşünürük ki, ABŞ hökuməti də buna çalışır”-deyə Əli Həsənov bildirib.
Görəsən, bu “bəzi qüvvələr” kimdir, nədir? Tərəflər bir-birinə qarşı rəsmi səviyyədə etirazlarını ifadə edirlər, sonra da bunu hökumətimiz “bəzi qüvvələrin fəaliyyəti” kimi təqdim edir.
Yəqin, Əli Həsənovun yaddaşında problem yaranıb. Ona görə də bəzi xatırlatmalara ehtiyac duyuruq.
İlk dəfə ABŞ-ın Azərbaycandakı keçmiş səfiri Riçard Morninqstar “Azərbaycan hakimiyyəti monalit deyil” proqnozunu verdi. Bundan sonra Azərbaycan hakimiyyəti Morninqstarı arzuolunmaz şəxs elan etdi və səslənən fikirləri onun öz fəaliyyəti kimi təqdim etməyə çalışdı. Amma bundan sonrakı proseslər də göstərdi ki, səfir ABŞ hökumətinin mövqeyini ifadə edib. Ardınca ABŞ prezidenti Barak Obama Azərbaycan kimi ölkələri demokratiyaya təhdid kimi göstərdi, ABŞ dövlət katibi Con Kerri İlham Əliyevlə telefon danışığında Azərbaycanla bağlı narahatlığını ifadə etdi və öhdəliklərə əməl olunmasının vacibliyiin xatırlatdı. Daha sonra ABŞ konqresində Azərbaycanla bağlı dinləmələr keçirildi, sanksiyalar məsələsi gündəmə gəldi. ABŞ-ın əsas siyasi İnstitutları Azərbaycandakı vəziyyəti kəskin tənqid etdi. Hətta məsələ ABŞ-la da yekunlaşmadı. Avropa Parlamentində Azərbaycanla bağlı qətnamə qəbul edildi, Avropa Şurasının prezidenti Azərbaycanda sistem dəyişikliyinin zəruri olduğunu dilə gətirdi. Avropa Birliyinin komissarı “Azərbaycanda bıçaq sümüyə dirənib” başlıqlı məqalə yazdı. ABŞ mətbuatı “İlham Əliyevin iki üzü” başlıqlı məqalə ilə çıxış etdi. və.s
Bunun qarşılğı olaraq məhz Əli Həsənov ABŞ-la münasibətlərin dözülməz həddə çatdığını bildirdi. PA rəsmisi Novruz Məmmədov “ ABŞ korrupsiyanın, qanunsuz həbslərin, zorakılığın vətənidir” söylədi. YAP-çı deputat Siyavuş Novruzov ABŞ prezidentinin erməni lobbisinin təsiri altında olduğunu ifadə etdi. Hakimiyyətin nəzarətində olan qəzetdə “ Obamanın iki üzü” başlıqlı məqalə dərc olundu. PA rəhbəri Ramiz Mehdiyev geniş məqalə yazdı və ABŞ-ı xəyanətkar adlandırdı. Ardınca ABŞ departamentinin maliyyələşdirdiyi “Azadlıq radiosu” möhürləndi. Son olaraq İlham Əliyev Züqanovla görüşdə ABŞ-dan şikayətlərini dilə gətirdi.
Bütün bunlardan sonra Əli Həsənov iddia edir ki, münasibətlər gözəldi və “bəzi dairələr” aranı qızışdırır.
Çox maraqlıdır, Barak Obama, Con Kerri ABŞ-da QHT-rəhbəridir, yoxsa İlham Əliyev, Əli Həsənov, Novruz Məmmədov, Ramiz Mehdiyev vətəndaş cəmiyyətinin üzvləridi?
Belə çıxır ki, adını sadaladığımız adamlar ABŞ və Azərbaycanda 5-ci dərəcəli adanmlardı. Və ya Əli Həsənəov “bəzi dairələr” deyəndə, Barak Obamanı, İlham Əliyevi, Con Kerrini, Ramiz Mehdiyevi nəzərdə tutur.
Əks halda belə yanaşma olduqca primitiv və absurddur. Hər iki ölkənin rəhbərləri səviyəsində ittihamlar səsləndirilri, hər iki ölkənin səlahiyyətliləri mövqe ifadə edir, nəticədə Əli Həsənov “münasibətlərdə gərginlik hiss etmirik” qənaətinə gəlir.
Artıq “bəzi dairələr” ifadəsi də “analoqsuz inkişaf”, “ anti-milli qüvvələr”, “bizim öz yolumuz var” ifadələri kimi “zibillik” məhsuluna çevrilib.
Bəlkə də Əli Həsənovun yumor hiss həddindən artıq güclü olduğuna görə dövlərlərin mövqeyini “bəzi dairələr” kimi təqdim edir. Amma bu qətiyyən gülməli deyil, ağlamalıdır.
Akif
