Xalq bələdiyyə seçkilərinə getmədi; hakimiyyət rüsvay oldu
Bələdiyyə seçkiləri gözlənildiyi kimi total saxtakarlıqla müşahidə olundu. Baxmayaraq hakimiyyət hələ seçkidən əvvəl əsas problemi həll etmişdi. Müxalifət partiyaları seçkiyə buraxılmamışdı. Iqtidar düşünürdü ki, bu halda arxayın şəkildə seçkini keçirə bilər və bütün dünyaya “ədalətli seçki” nümunəsi göstərə bilər. Lakin Azərbaycanda seçkilərin hansı qaydada keçirildiyini bilən vətəndaşlar səsverməyə getmədi. Bələdiyyə seçkiləri ölü bir sükutla keçdi. Hakimiyyət də rüsvay olmamaq üçün saxtakarlıq üsullarına əl atdı və bununla ikiqat rüsvay oldu. Indisə keçək saxtakarlıq faktlarına və qanun pozuntularına.
Demokratik Təşəbbüslər Institutunun yaydığı məlumatda bildirilir ki, 9 saylı Binəqədi birinci seçki dairəsin bir şəxs tərəfindən seçki qutusuna 1-dən artıq seçki bülleteninin atılması halına 5 dəfə rast gəlinib.
16 saylı Yasamal ikinci seçki dairəsi – 1 və 18 saylı məntəqədə karusellər olub. Və karuseldə iştirak edən secicilərin əlindəki mürəkkəb ultrabənövşəyi lampadan istifadə olunmur. 18 saylı məntəqə ilə 27 saylı məntəqədə hər iksində karusel, birnəfərə 3-4 bülleten verilir. 18 saylı məntəqədə komissiya üzvləri tərəfindən namizəd Zakir Cəfərova səs vermək üçün seçicilərə kütləvi təzyiq müşahidə olunub. 18 saylı məntəqədə seçki qutusunun kilidi qırılmış vəziyyətdədir.
19 saylı Nərimanov birinci seçki dairəsi 4 saylı seçki məntəqəsində mürəkkəb və ultrabənövşəyi lampalar yoxlanılmayıb. 3 saylı seçki məntəqəsində secicinin seçki bülleten alması haqqında secici siyahısında başqasının adının qarşısına imza qoyması faktı müşahidə olunub. Eyni zamanda topa bülleten atılma faktı müşahidə olunub.
33 saylı Xətai birinci seçki dairəsinin 14 saylı seçki məntəqəsində səsvermə vaxtında başlamayıb, məntəqə sədri vəzifə bölgüsün elan etməyib. Həmin məntəqədə gün ərzində karusel müşahidə olunur, seçicinin barmağında mürəkkəbin yoxlanılması yerinə yetirilmir, dəfələrlə secici iradəsinə təsir etmə halları müşahidəcilər tərəfindən qeydə alınıb.
***
Eyni zamanda 14 saylı seçki məntəqəsində seçici bülletenlərinin yuxarı sol küncünün öncədən kəsilməsi faktı da müəyyənləşib. 33 Xətai 7 saylı məntəqədə səsverməyə dair hec bi təlimat məntəqədə asılmayıb. Seçki bülletenlərinin sayılması həyata keçirilməyib, möhürlənib yoxlanılması haqqında akt tərtib olunmayıb. Məntəqə sədri seçki bülletenlərinin ümumi sayın müşahidəcilərə elan eləməyib. Səsvermə otağı MSK nın müəyyənləşdirdiyi sxemə uyğun olunmayıb. 8 saylı məntəqədə topa bülleten atılıb. Həmin dairənin ərazisindəki seçki məntəqəsində MSK-nın möhürünü tanımadığı üçün MnSK müşahidəçini seçkini müşahidəyə buraxmaq istəməyib.
41 Sumqayıt birinci və 44 saylı Sumqayıt – Xızı seçki dairəsinin məntəqələrində seçki qutusuna topa bülletenlər atılması, 1 şəxsin bir neçə şəxsin yerinə səs verməsi halı müşahidə olunub.
***
56 saylı Xaçmaz seçki dairəsində 3-4 saylı məntəqələrdə hərbiçilərdən istifadə edərək karusel təşkil olunub. Nabran qəsəbəsindən Xudatda yerləşən seçki məntəqələrinə səsvermək üçün seçicilər gətirilir. 29 saylı seçki məntəqəsində polis səsvermə otağının girişində dayanaraq 100 metrlik məsafədə dayanma prinsipinə əməl olunmayıb.
69 saylı Cəlilabad-Masallı-Biləsuvar seçki dairəsinin 15 və 26 saylı seçki məntəqələrində 1 şəxs 1 neçəsinin yerinə səs verməsi, qutuya topa bülletenlərin atılmasına rast gəlinir. 6 saylı məntəqədə Musa adlı namizəd təşviqat aparır. 4 və 6 saylı məntəqələrdə kabinəyə çox saylı adam daxil olur.
89 saylı Göyçay-Ağdaş seçki dairəsində 1 , 5, 6 saylı seçki məntəqələrində seçki məntəqəsi daxili və xaricində təşviqat materiallarına rast gəlinib. 9 saylı məntəqədə müşahidəçilərin fəaliyyəti üçün şərait yaradılmayıb. 6 və 5 saylı məntəqələrdə istifadə olunmamış qeydiyyatdan çıxmış vəsiqələri ləğv olunmayıb, aktlaşdırılmayıb. Seçki qutularının kilidlənməsi aktlaşdırılmayıb və nömrələri qeyd olunmayıb. Seçki bülletenləri sayılıb elan olunmayıb.
95 saylı Tərtər seçki dairəsi 12 saylı seçki məntəqəsində polis səsvermə otağının içərisində oturub. 13 saylı seçki məntəqəsində (Əskipara kəndi) topa şəkildə bülleten atılması müşahidə olunub. 25 saylı seçki məntəqəsində (Kolanı kəndi) bülletenlər əvvəlcədən kəsilərək hazır vəziyyətdə olub.
107 saylı Qazax seçki dairəsi üzrə 5 saylı seçki məntəqəsində topa bülleten atılır, Hüseynbəyli kəndində yerləşən məntəqədə başqalarının yerinə dəfələrlə səsvermə halı müşahidə edilib. Həmçinin 10 saylı seçki məntəqəsində topa bülleten atılıb.
112 saylı Qax seçki dairəsi məntəqələrində də karusel halları müşahidə edilib.
113 saylı Şəki şəhər seçki dairəsinin 15 və 28 saylı məntəqələrində karusel müşahidə olunub.
***
Daha bir saxtakarlıq faktını Meydan TV üzə çıxarıb. Meydan TV-nin 15 saylı Yasamal birinci Seçki Dairəsinin 12 saylı məntəqəsindən hazırladığı videosüjetdən görünür ki, bir qadın qutuya topa şəklində bülleten atır. Jurnalist həmin qadından kimliyini soruşarkən məntəqə sədri və üzvlərinin hücumuna məruz qalır. Bu video sosial şəbəkələrdə ciddi müzakirəyə səbəb olub. Hakimiyyətin nəzarətində olan KIV-lər videonun bir gün əvvəl hazırlandığını iddia ediblər. Buna əsas kimi isə videonun “Youtube” sosial şəbəkəsinə dekabrın 22-də yükləndiyini göstəriblər. Lakin mütəxəssislər bildirir ki, “Youtube” sosial şəbəkəsi videonun 22 dekabrda yüklənməsinin göstərilməsi saat fərqi ilə əlaqədardır. Bu sosial şəbəkə ABŞ-da qeydiyyatdan keçib və orada yükləmələr məhz ABŞ vaxtı ilə göstərilir. Bundan başqa məntəqənin sədri Gülmira Yusifova videonun seçki günü çəkildiyini etiraf edib. Lakin o, iddia edib ki, qutuya topa bülleten atan qadını jurnalist özü ilə gətiribmiş. Gülmira Yusifovanın yalan danışdığı videosüjetdən də görünür. Əgər həmin qadını jurnalist özü ilə gətirmişdisə, o zaman nədən məntəqə üzvləri onun qutuya topa bülleten atmasının qarşısını almayıblar? Bundan başqa nə üçün onu ifşa edən jurnalistə hücum çəkmişdilər?
***
Bələdiyyə seçkilərində maraqlı hadisələrdən biri də Biləcəridə baş verib. Seçicilərdən biri Biləcəri qəsəbəsində yerləşən seçki məntqələrinin birində səs verərkən yaşadığı məhəllənin sosial problemini seçki bülletininə yazaraq qabartmaq istəyib. Bunun üçün sözügedən seçici bülletenin aşağı küncünə “Çox xahiş edirəm. Seçki qabağı yox seçkidən sonra da bizim Peykanlıya gəlin. Yol hazırdı, tək xahişimiz 92 massivinin fəaliyyətini bərpa etməyinizdir”, sözlərini yazaraq öz xahişini bu yolla ifadə edib və bülletenin fotosunu çəkərək sosial şəbəkələrdə paylaşıb.
Sonda “Fikrimi ancaq belə çatdıra bilərəm. Sədrin qəbuluna düşmək həmişəki kimi çətindir Biləcəridə”, – qeydini yazan seçici öz mobil telefonun nömrəsini yazmağı da unutmayıb(brifinq.com).
