Hökumət məsələnin beynəlxalq səviyyədə araşdırılmasından narahatdır
Baş nazirin müavini səs-küy doğuran narkotik məsələsinə görə qapalı müşavirə keçirdi
Avqustun 14-də Azərbaycan Respublikası Baş nazirinin müavini, Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Dövlət Komissiyasının sədri Əli Həsənovun yanında Dövlət Komissiyasına üzv olan aidiyyəti orqanların məsul şəxslərinin iştirakı ilə qapalı iclas keçirilib.
Komissiyadan Modern.az saytına bildirilib ki, iclasda cari ilin iyul ayının 11-də Gürcüstan Respublikası Daxili Işlər Nazirliyinin ölkədə külli miqdarda (2.800 litrə yaxın yuyucu maddədə həll edilmiş 588 kq 885 qr heroin, 11 kq 759 qr morfin və 2 kq 201 qr kodein) narkotik maddənin saxlanılması və bu narkotik maddənin Azərbaycan Respublikası ərazisindən tranzit olaraq keçməsi barədə olan ilkin məlumat üzrə aidiyyəti orqanlar tərəfindən aparılan araşdırmanın nəticələri müzakirə edilib. Toplantıda araşdırmanın davam etdirilməsi, görülən işlər barədə Dövlət Komissiyasının mütəmadi olaraq məlumatlandırılması barədə müvafiq tapşırıqlar verilib.
Iclasda qeyd edilən məsələnin Azərbaycan Respublikası Prezidentinin gündəlik nəzarətində olduğu vurğulanıb.
Xatırladaq ki, Gürcüstan hüquq-mühafizə orqanlarının bundan öncə yaydığı məlumatda bildirilmişdi ki, araşdırma nəticəsində məlum olub ki, yük maşını Gürcüstana Azərbaycan sərhədindən daxil olub və Gürcüstan-Türkiyə sərhədinə doğru gedirmiş. Ilkin nəticələrə görə narkotik maddənin tərkibi 80 faiz təmiz heroindən ibarətdir.
Bu əməliyyat beynəlxalq aləmdə rezonansa səbəb olub. Əsas diqqət 3 ton heroinin Azərbaycn sərhəddindən necə keçməsidir. Azərbaycan hakimiyyəti hələ ki, buna aydınlıq gətirməyib. Əməliyyatdan az sonra isə məlumat yayılıb ki, bu məsələnin beynəlxalq səviyyədə araşdırılmasına başlayıb.
Əli Həsənovun qapalı toplantı keçirməsi də Azərbaycan hökumətinin bu araşdırmalardan doğan narahatlığından irəli gəldiyi bildirilir.
