Vəkillər bu həbsin arxasındakı gerçək səbəbləri bir daha açıqladılar
MTH-in məqsədi Pərvizdən Nağıyev qardaşları və Cavid Qurbanov, eləcə də Əli Kərimlinin əleyhinə ifadə almaq olub
Ötən ilin sentyabrından həbsdə olan jurnalist və hüquq müdafiəçisi Pərviz Həşimlinin məhkəməsi yekunlaşır. Artıq məhkəmə istintaqı başa çatıb. Bakı Ağır Cinayətlər Məhkəməsində hakim Novruz Kərimovun sədrliyilə keçirilən dünənki məhkəmə iclasında dünən prokuror çıxış edərək, həm Pərvizə, həm də bu iş üzrə digər təqsirləndirilən Təvəkkül Qurbanova 9 il həbs cəzası istəyib.
Prokurordan sonra vəkillər çıxış edib. Pərviz Həşimlinin vəkili Elçin Sadıqov çıxışına belə başlayıb: “Daha bir saxta və siyasi ittihamlar üzrə “məhkəmə istintaqı”nı tamamladınız…”
Vəkil bildirib ki, ilk gündən ittiham mövqeyi tutan, müdafiə tərəfinin təqdim etdiyi vəsatətlərin heç birini təmin etməyən məhkəmənin hansı qərar verəcəyi onlara bəri başdan aydındır: “Biz başa düşürük ki, qərarları əslində, məhkəmə vermir, məhkəmə siyasi qaydada müəyyən edilmiş qərarı hökm şəklinə salıb elan etmək vəzifəsini daşıyır. Bu məqsədlə məhkəmə bizim vəsatətlərimizin heç birini təmin etmədi. Bu yolla, gələcəkdə öz qanunsuz və əsassız hökmünü pərdələməyə və ittihamedici sübutların saxta olduğunu gizlətməyə çalışırdı. Belə məhkəmələri çox görmüşük”.
Azərbaycanda jurnalistikanın ağır sənət olduğunu deyən vəkil P.Həşimlinin həbsində də onun sənətinin əsas rol oynadığını vurğulayıb. Onun sözlərinə görə, jurnalistin həbsinin arxasında onun MTN əleyhinə yazılar yazması, milli təhlükəsizlik nazirinin keçmiş müavini, hazırda Baş Prokurorluğun Korrupsiyaya Qarşı Mübarizə İdarəsinin rəisi olan Əli Nağıyev və onun qardaşı ilə tanışlığı, eyni zamanda, deputat Javid Qurbanovla həmyerli olması, həmçinin Azərbaycan Xalq Jəbhəsi Partiyası Ali Məclisinin üzvü olması dayanır: “2013-cü ilin oktyabrında keçirilməsi planlaşdırılan prezidenti seçkiləri ərəfəsində artan siyasi çəkişmələr zamanı Pərviz MTN əməkdaşları tərəfindən bir neçə dəfə təqib və təyziqlə üzləşdi. Pərviz daim izlənildiyini hiss etdi. Bununla bağlı ABŞ-ın Azərbaycandakı səfirliyinə və Prezident Adminstrasiyasının rəhbəri Ramiz Mehdiyevə yazılı müraciət etdi. Üstəlik, MTN-nin Antiterror Mərkəzinin rəis müavini İlqar Əliyev Pərvizdən hakimiyyətdə təmsil olunan müəyyən şəxslərdən pul alıb AXJP sədri Əli Kərimliyə ötürdüyü, Əli Kərimlinin ölkədə qeyri-sabitlik yaratmaq istəməsi barədə ifadə tələb edərək, əks təqdirdə, onu həbs edəcəkləri ilə hədələmişdi”.
E.Sadıqov P.Həşimlinin həbsinin ilk günlərində baş verənlərdən də danışıb. Onun sözlərinə görə, həbs edilərək MTN-ə aparılan P.Həşimli orada da MTN-nin istintaq idarəsinin rəis müavini Sahib Ələkbərovun təzyiqlərinə məruz qalıb: “O, Pərviz Həşimlidən “silahları Əli Kərimliyəmi gətirmişdin?”, – deyə soruşub. Bundan sonra Pərviz Həşimova psixoloci və fiziki işgəncə və təzyiqlər edilərək, ondan silahları Əli Kərimli üçün gətirməsi barədə ifadə almağa çalışıblar. Pərviz Həşimlini dindirən şəxslər onun üzərinə qışqırır, söyüşlər söyür, onu təhqir edir, zorlamaqla hədələyirdilər. Şapalaqla başına, üzünə, yumruqla və dizləriylə qarın boşluğuna vururdular. Pərviz Həşimlidən MTN-nin keçmiş nazir müavini Əli Nağıyev və “Azəryolservis”in sədri, deputat Javid Qurbanovun Pərviz vasitəsilə Əli Kərimliyə pul ötürməsi, silahları Əli Kərimlinin sifarişilə onun üçün gətirdiyini etiraf etməsini tələb edirdilər. Ondan həmçinin MTN-ni tənqid edən yazılarını Əli Nağıyevin sifarişilə yazdığını etiraf eləməsini tələb edirdilər. Pərviz Həşimli bildirdi ki, Əli Nağıyevin qardaşı Vəli Nağıyevlə dostluq münasibəti var. Javid Qurbanovla ünsiyyət saxlayır. Həmin şəxslərin Əli Kərimliyə pul ötürmələri barədə onda heç bir məlumat yoxdur”.
Vəkil deyib ki, MTN-nin əsas məqsədi cinayətlərin üstün açmaq yox, curnalisti şərləməkdir: “İş materiallarından görünür ki, MTN-nin Təvəkküllə Hüseynin Biləsuvar ərazisində görüşmələrindən xəbəri tam şəkildə olub. Əgər həqiqətən MTN-nin məqsədi cinayətin üstünün açılması olsaydı, o zaman MTN əməliyyat keçirərək, silah alveri ilə məşğul olan Təvəkkülü və Hüseyn adlı şəxsi həbs edə bilərdi. Silahlar həqiqətən Pərviz üçün gətirilirdisə, o zaman Pərvizi də həbs etmək imkanı ola bilədri. Bu da onu göstərir ki, ya Hüseyn və Rza adlı şəxs uydurmadır, ya da ki, MTN-nin onları ifşa etmək niyyəti açıq-aşkar yoxdur. MTN-nin İstintaq İdarəsinin rəis müavini Təhsin Ağayev heç bir məhkəmə qərarı olmadan Pərvizin telefon danışıqlarını “Bakcell”dən əldə edib. Bu onu göstərir ki, MTN-nin istənilən şəxsin mobil telefon danışıqlarını əldə etmək imkanı var və mobil operatorlar MTN-ə həmin telefon danışıqlarını məhkəmə qərarı olmadan verir. Hesab edirik ki, Təvəkkül Qurbanovla Rza adlı şəxsin uydurma danışıqları məhz MTN-də yazılıb. Ona görə ki, həmin telefon danışıqlarının mətni bizim ibtidai istintaq zamanı tanış olduğumuz mətnlə eyni deyil və istintaq həmin danışığın mətnini dəyişib. Qeyd edilməlidir ki, bunları etmək üçün MTN-nin kifayət qədər texniki imkanları var”.
Keçirilən axtarış və istintaq prosesi zamanı saysız-hesabsız qanun pozuntularına yol verildiyini deyən vəkilin sözlərinə görə, curnalist Bakı Apellyasiya Məhkəməsinə də ləyaqəti alçaldan üsulla gətirilib: “Onun əlləri saxlandığı kamerada arxadan qandallanaraq başına qara torba keçirildi. Onu sürüyə-sürüyə apardılar. Torbanı yalnız məhkəmə binasında açdılar. Pərviz Həşimlinin belə davranışla bağlı məhkəmə heyətinə şikayəti də cavabsız qaldı. Bu məhkəmə baxışı zamanı da Pərviz Həşimli ilə konfidensial ünsiyyət saxlamağa maskalı şəxslər imkan vermədilər”.
Vəkil Pərviz Həşimli barəsində bəraət hökmü çıxarılmasını istəyib.
Daha sonra vəkil Bəhruz Bayramov çıxış edərək ittihamların tamamilə əsassız olduğunu, sübuta yetirilmədiyini bildirib: “Əgər Pərviz Həşimli Təvəkkül Qurbanova pul vermişdisə, o zaman niyə bir dənə də olsun, telefon zəngi yoxdur? Bütün zənglər Təvəkkül tərəfindən edilib. Bundan başqa, ittiham verilsə də, cinayətin motivi yoxdur ki, silah Pərvizin nəyinə lazım ola bilərdi? Tapança ilə yazı yazacaqdı? Həmçinin cinayət işinin materiallarında Pərvizin Gəncədə Təvəkkülə 15 min dollar verməsi qeyd edilib. Halbuki, baş prokurorun müavini Rüstəm Usubovun imzası ilə həbs-qətimkan tədbirinin uzadılması ilə bağlı məhkəməyə təqdim olunan təqdimatda qeyd olunurdu ki, guya Pərviz 12 min dollar Gəncədə, 3 min dollar isə Bakıda verib. Hesab edirəm ki, əvvəlki sənədlər dəyişdirilərək saxtalaşdırılıb və belə bir ziddiyyət ortaya çıxıb”.
B.Bayramov onu da qeyd edib ki, Pərviz Həşimlinin evində axtarış aparılan zaman evdən götürülən təhlükəsizlik kameralarının yaddaş kartının alınması ilə bağlı məhkəməyə və MTN-ə edilən müraciətlər nəticəsiz qalıb: “Halbuki, həmin yaddaş kartı Pərvizin günahsız olduğunu tam sübut edəcəkdi”.
Vəkil məhkəmədən ədadlətli qərar çıxarılmasını xahiş edib.
Vəkil Fariz Namazlı da müvəkkilinə qarşı edilən qanun pozuntularını yada salaraq, məhkəmədən Pərvizə bəraət verilməsini istəyib.
Məhkəmə prosesi mayın 14-də davam edəcək.
