Eldəniz Quliyev: “Son illərdə Azərbaycanın imicinə bu qədər zərbə vuran addım atılmamışdı”
Milli Şura üzvü, “EL” hərəkatının Ali Məclisinin sədri Eldəniz Quliyev Moderator.az-a açıqlamasında AXCP qərargahının partladılması və bu partiyanən üzvü olan gənc fəalların həbsi barədə danışıb. E.Quliyevin fikrincə, son proseslər bir daha təsdiq etdi ki, hakimiyyət indiki məqamda AXCP-ni digər müxalif partiyalardan daha təhlükəli hesab edir və onu daha çox neytrallaşdırmağa çalışır:
“Bu gün hakimiyyət AXCP-ni digər müxalif partiyalardan daha təhlükəli hesab edir. Bunu heç kim inkar edə bilməz. Çünki bu, kor-kor, gör gördü. AXCP qərargahının partladılması, bu partiyanın gənc fəallarının həbsi bunu bir daha sübut etdi. Son illər hakimiyyətin atdığı və Azərbaycanın imicinə bu qədər kölgə salan bir addım olmamışdı. İqtidarın Ukrayna olaylarından götürdüyü “ibrət” bundan ibarət oldu ki, heç kimə, ən əsası isə demokratik qüvvələrə qətiyyən başını qaldırmağa imkan vermək olmaz! Yəni həmin dəqiqə o baş əzilməli, məhv edilməlidir. Bu sayaq dərəbəylik nümayişi hakimi-mütləqlərin aqoniyası kimi yozulmalıdır”.
