Heç şübhəsiz ki, bu adamlar bacarıqlıdır, pul qazanmağın, xüsusən də sadə vətəndaşlardan qazanmağın yollarını yaxşı bilir. Bir millətin sərvətini talayıb, özünü müxtəlif qanunsuz yollarla əldən salmaq sadə hadisə kimi görünməsin sizə. Əlbəttə, hər gün intiharın müxtəlif formalarını reallaşdıran insanlarımız bu işin nə qədər zəhmət tələb etdiyini, göründüyündən daha qəliz iş olduğunu təsdiqləyən praktik nümunələrdir. Qanunsuzluğu nümayişkaranə, insanlara acıq verilirmiş kimi edən bu sistem, ənənəvi taktikada heç bir dəyişiklik etməsə də, pul qazanmağın, xalqın cibinə girməyin yeni yollarını müəyyənləşdirmək baxımından öz üzərində ciddi işləyir, şəraitə uyğun islahatlar aparır, yeni-yeni yollara baş vurur.
Ədalət naminə, son tapıntıları daha mütərəqqidir, təhlükəsiz və birbaşa qanuna istinad etməklə qazanc əldə etməyin ən son üsuludur. Bütün hallarda vətəndaşların soyulmasına xidmət edən bu yenilikdə, ənənəvi olmayan bir hal var: soyğunçuluğun qanuna istinadən həyata keçirilməsi. Görünən odur ki, bütün qanunsuz yollar, kələk insanların talanması üçün yetərli olmayıb, məhsuldarlıq ya aşağı düşüb, ya da inkişafda deyil. Bu yeniliyi zəruri edən digər səbəblər də ola bilər, amma bunun deyildiyi kimi insanların təhlükəsizliyilə yaxından-uzaqdan heç bir bağlılığı yoxdur. Vətəndaşının əhəmiyyətli hissəsi çörək dalınca ölüm düşərgələrinə qaçan bir hakimiyyətin keçiddən istifadə etməyən üç-beş vətəndaşın narahatlığını yaşaması, təhlükəsizliyini düşünməsi gülüş doğurur. Əgər səmimidirlərsə, o zaman biz həm də ərzaq təhlükəsizliyimizin təmin olunmasını istəyirik. Məsələn, mən yediyim ətin eşşək əti olmamasından əmin olmaq istəyirəm. Mən, mənə verilən qazın təkcə təmizliyindən əmin olmaq istəmirəm, həm də istənilən hava şəraitində onun davamlılığının təmin olunmasını istəyirəm. Statistikaya nəzər salsaq, bir ayda qazdan zəhərlənərək ölənlər, 10 ildə piyada keçidlərində ölənlərdən dəfələrlə çoxdur. Bəs bu insanların məsuliyyəti kimin üzərindədir? Siyasi təminatları qoyaq kənara, iş, ərzaq, enerji təhlükəsizliyi təmin olunmayan bütöv bir toplumun keçid təhlükəsizliyinin davasını döymək səmimi görünmür axı.
Bəli, hazırda Azərbaycan ərazisində qanunların işlədiyi yeganə məkan metro kənarlarıdır. Hətta operativlik və qanuna istinad baxımından hakimiyyətin yenilik kimi təqdim etidiyi “Asan xidmət” də bu ərazinin kölgəsində qalar. Təəssüf ki, bütün Azərbaycanı bu məkana yerləşdirmək mümkün deyil. Heç olmasa bütün vətəndaşlarımıza bir günlük olsa da, Azərbaycan ərazisində qanuna istinad olunan, onun tələblərinə uyğun hərəkət etməyin mümkün olduğu məkan göstərərdik. Amma buna baxmayaraq, insanları bu ərazilərdən intensiv istifadəyə çağırmaqda səmərə var. Bütün hallarda yaranmış fürsətdən yetərincə istifadə etmək lazımdır. Düzdür, həmin ərazilərdəki keçidlər, piyada keçidlərindən daha çox ticarət mərkəzini xatırladır. Sərbəst hərəkət üçün imkan yoxdur. Amma bir yerdə ki qanuna istinadla cibinə girənləri məyus emək imkanın var, bu haqqı sənə tanıyırlar, niyə imtina etməlisən bu fürsətdən? Hazırkı vəziyyətdə ölkədə işlək qanunlara əməl etməklə səni gözləyən təhlükədən yayınmağın həzzini yaşamaqdan gözəl nə ola bilər?
Dəyərli vətəndaşlarımız, keçidlərdən istifadə edin. Sizi cərimələməklə əlavə qazancın ən asan yolunu tapan insanları məyus edin. Bu həm də sizdən yığılan pullardan qidalanan məmur balalarının maşınının təkərləri altında qalmaqdan sığortalanmaq deməkdir.
