Əli Kərimli “İsmayıllı məhkəməsi”nə qatıldı və partiya fəalları ilə toplantı keçirdi
AXCP sədri Əli Kərimli fevralın 11-də Şəkiyə səfər edib. O, Şəki Ağır Cinayətlər Məhkəməsində İsmayıllı hadisələrinə görə mühakimə olunan ReAL sədri İlqar Məmmədov, Müsavat başqanının müavini Tofiq yaqublu və digərləri ilə bağlı prosesə qatılıb.
AXCP sədri proses zamanı yaranan imkandan istifadə edərək İlqar Məmmədov və Tofiq Yaqublu ilə görüşərək hal-əhval tutub, fikir mübadiləsi aparıb. Əli Kərimli digər məhbusların yaxınları ilə də görüşüb.
AXCP lideri məhkəməyə qatılmazdan öncə prosesdə iştirak üçün Şəkiyə getmiş ReAl hərəkatının rəhbərləri ilə birgə çay süfrəsi arxasında fikir mübadiləsi aparıb.
Məhkəmədən sonra isə Əli Kərimli AXCP-nin yerli fəalları ilə görüşüb. Yerli fəallar partiyanın sədrini elə məhkəmə binasının qarşısında gözləyərək qarşılayıblar. AXCP Şəki rayon şöbəsinin sədri Əli Abdullayev başda olmaqla 50-yə yaxın cəbhəçi ilə kiçik gəzinti olub. Daha sonra yaxınlıqdakı çay evlərindən birində partiya sədri ilə fəallar söhbət ediblər. AXCP-yə yeni qoşulan üzvlər partiya sədrinə Milli Şuranın gələcək fəaliyyəti, o cümlədən partiyayla bağlı suallar ünvanlanıb.
AXCP sədri həmçinin “Azadlıq” radiosu üçün kiçik müsahibə verib.
