Mahal İsmayıloğlu: «Əli İnsanovun on illik sınmamağının arxasında təbii ki, bir siyasi fəaliyyət dayanacaq»
Sabiq səhiyyə naziri Əli Insanovun məhkəmə iclaslarında I.Əliyevin ünvanına sərt mesajlar səsləndirməsi onun mübarizəsini sona qədər davam etmək niyyətində olduğunu göstərir. Ekspertlərin fikrincə, Ə.Insanov azadlığa çıxdıqdan sonra siyasi fəaliyyətə qoşulacağı istisna deyil. Ə.Insanovun Milli Şuraya dəstəyi, tərəfdarlarına müxalifətə qoşulmaq, demokratiya uğrunda mübarizə aparmaqla bağlı çağırışı birmənalı qiymətləndirilmir.
Ə.Insanov hələ nazir işləyən zaman hakimiyyətdəki Qərbi azərbaycanlılar qruplaşmasının lideri sayılırdı. Bu baxımdan Ə.Insanovun azadlığa çıxmasından sonra siyasi fəaliyyətə qoşulması ətrafında hakimiyyətdən narazı xeyli vətəndaşın toplaşması ilə nəticələnə bilər.
Əslən Qərbi Azərbaycandan olan Mahal Ismayıloğlunun fikrincə, hadisələrin indiki ssenarisindən söyləmək olar ki, Ə.Insanov ətrafında baş verənlər artıq elə bir məqama çatıb ki, hakimiyyətin əleyhinə işləyir: “Tam çılpaq bir formada görünür ki, bu adama qarşı səbəbi bəlli olmayan bir qəzəb var. Əli Insanov artıq on ildir ki, hakimiyyətlə mübarizə aparır. On illik sınmamağın arxasında təbii ki, bir siyasi fəaliyyət dayanacaq. Amma o siyasi fəaliyyətin kimlə olacağını zaman göstərəcək. Azərbaycanda hazırkı məqamda ciddi siyasi dəyişikliklərə ehtiyac var”.
