«Putin Soçidə separatçı liderləri İlham Əliyevlə yanaşı oturdub»
Soçidə keçirilən Qış Olimpiya Oyunlarının açılış mərasimində Gürcüstanın separatçı Abxaziya və Cənubi Osetiya bölgələrindəki qondarma rejimlərin rəhbərləri Ankvab və Tibilov lojada Azərbaycan və Rusiya prezidentlərilə yanaşı oturdulub. “Virtualaz.org”un məlumatına görə, bu faktı Gürcüstan mediası üzə çıxarıb. Gürcüstanın ictimai telekanalı olan “Kanal 1″in jurnalistinin açılış mərasiminin teletranslyasiyasından əldə etdiyi foto bunu təsdiqləyir.
Gürcüstan Milli Olimpiya Komitəsindən isə bildiriblər ki, separatçı liderlər açılış mərasiminə rəsmən dəvət edilmiş qonaqların siyahısında yer almayıb.
Telekanal əməkdaşının qeydə aldığı və keyfiyyəti aşağı olan kadrda Azərbaycanın dövlət başçısını və ondan bir az aralıda oturmuş Qazaxıstan prezidentini seçmək olur, lakin Vladimir Putinin özünü bu kadrda görmək mümkün deyil.
