ARDNŞ-nin Nazirlər Kabinetinə müraciəti bu ehtimalı gücləndirir
ARDNŞ (Azərbaycan Respublikası Dövlət Neft Şirkəti) ölkə hökumətinə AI-95 benzininin istehsalını dayandırmaq və tam şəkildə AI-92 benzininin istehsalına keçməklə bağlı təkliflə müraciət edib. “Trend” agentliyinin məlumatına görə, bunu fevralın11-də jurnalistlərə ARDNŞ-nin prezidenti Rövnəq Abdullayev bildirib.
Azərbaycan Nazirlər Kabinetinin qərarı ilə 92 və 95 oktan ədədli mühərrik benzini markalarının idxalı müvafiq olaraq gömrük rüsumundan azad edilib. Qərara əsasən, rüsum dərəcələri 15 faizdən sıfıra endirilib.
Nazirlər Kabinetinin digər qərarı ilə bu markadan olan benzinlərin idxalı üzrə aksiz dərəcələri 1 tona görə 250-dən 1 dollaradək azaldılıb. Qərar 2014-cü il iyunun 1-dək qüvvədədir.
Azərbaycanda neft məhsullarının qiymətləri Tarif Şurası tərəfindən müəyyən edilir. Tarif Şurasının qərarı ilə 2013-cü il dekabrın 3-dən benzinin pərakəndə qiyməti artırıb.
Belə ki, AI-95 benzininin pərakəndə satış qiyməti 1 litr üçün 80 qəpik, AI-92 və AI-80 markalı avtomobil benzininin pərakəndə satış qiyməti 1 litr üçün 70 qəpik müəyyən edilib.
Buna qədər 1 litr AI-95 markalı benzinin qiyməti 60 qəpik, AI-92 və AI-80 markalı benzinlərinin hər birinin qiyməti isə 55 qəpik təşkil edib. Azərbaycanda buna qədər yanacağın qiymətləri 2007-ci ildə dəyişmişdi.
Iqtisadçı ekspert Samir Əliyev bildirib ki, AI 95 markalı benzinin idxalı onun qiymətinin bahalaşmasına gətirib çıxara bilər. Samir Əliyev bu barədə öz “facebook” səhifəsində yazıb: “ARDNŞ prezidenti Rövnəq Abdullayevin AI 95 markalı benzinin ölkədə istehsalının dayandırılması və idxal edilməsi ilə bağlı fikirlərində bir TƏHLÜKƏLI məqam diqqətimi cəlb etdi. Əvvəlcə, qeyd edim ki, bu açıqlama avtokreditlərin dayandırılmasının benzin istehlakı ilə bağlı olması fikrimizi bir daha sübut etdi. Təhlükə isə ondan ibarətdir ki, AI 95 markalı benzinin idxalı onun qiymətinin bahalaşmasına gətirib çıxara bilər. Çünki Tarif Şurası bildiyiniz kimi Azərbaycanda istehsal olunan yanacağın qiymətini tənzimləyir. AI 95 markalı benzin isə idxal olunarsa deməli Tarif Şurası onun qiymətini tənzimləməyəcək. Necə ki, AI 98 markalı benzində bunu görürük.
Rövnəq Abdullayevin təklifi qəbul edilərsə, AI 95 markalı benzinin bahalaşması üçün hökumətin əlində şans olacaq”..
ARDNŞ-nin mətbuat xidmətinin rəhbəri Nizaməddin Piriyev isə “Azadlıq”a açıqlamasında bildirdi ki, qiymətlərin qalxacağı ilə bağlı proqnoz verə bilməzlər: “Biz sadəcə olaraq Nazirlər Kobinetinə müraciət etmişik ki, tələbatı ödəməkdən ötrü, zavodda yenidənqurma işi aparmaq üçün bizi 95 oktanlı benzinin istehsalından azad etsinlər və biz 92 oktanlı benzin istehsal edək. Bu sadəcə müraciətdi və hələ ki, bu müraciətə cavab verilməyib. Bunun əsasında uzaqgörən proqnozlar vermək, perspektivlər hesablamaq bizim işimiz deyil. Qiymətin qalxıb-qalxmayacağını hökumət müəyyənləşdirir”.
Akif
