Putin Yanukoviç hökumətinə daha 2 milyard ayıra bilər
Avropa Birliyi Şurası 28 ölkənin xarici işlər nazirinin iştirakı ilə Ukraynadakı son olayları müzakirəyə çıxarıb. Ukrayna mətbuatına məlumat verən avropalı diplomat bildirib ki, nazirlər Yanukoviç hakimiyyətinə sanksiyaların tətbiqi barədə qərar qəbul etməyiblər. Bunun əvəzində Polşa xarici işlər naziri Radoslav Sikorskinin təklifi əsasında Kiyev üçün avrointeqrasiya perspektivi müzakirə olunub.
Mənbənin sözlərinə görə, polşalı nazirin təklifi ilə bağlı Avropa ölkələrindən yalnız Almaniya və Fransa ehtiyatlı mövqedən çıxış edib: “Ukrayna ilə Avropa Birliyi arasında Assosiasiya sazişinin imzalanması məsələsi də müzakirə olundu. Amma Kiyev üçün avrointeqrasiya perspektivi müzakirə olunarkən tam fərqli məqamların üzərində dayanıldı”.
Ali Rada buraxılma ərəfəsində
Ukrayna Prezident Administrasiyası ölkə parlamentini buraxmaq üçün iki layihə hazırlayıb. Bu məlumatı Prezident Administrasiyasına istinadən “Ukraynskya Pravda” qəzeti yayıb. Buna səbəb müxalifətin yeni Konstitusiya aktı hazırlamasıdır. Hazırlanan hər iki variantin hüquqi sxemi bir-birindən fərqlənsə də, prezidentə parlamenti buraxıb, növbədənkənar parlament seçkiləri çağırmaq hüququ verir.
Ali Radanın sədri Vladimir Rıbak bildirib ki, əgər Konstitusiyaya dəyişiklərin mətni tam hazır olsa, gələn həftə parlamentin növbədənkənar iclası keçirilə bilər. Yeni sənədlə bağlı hakim Regionlar Partiyasından başqa parlamentdə təmsil olunan bütün partiyaların fraksiyaları təklif verə bilər.
Yanukoviçlə Putin yeni hökumətin tərkibini müzakirə etdi
Dünən Ukrayna prezidenti Viktor Yanukoviçlə Rusiya prezidenti Vladimir Putin Soçidə növbəti dəfə bir araya gəliblər. Prezidentlər budəfəki görüşlərində Ukraynada formalaşdırılacaq yeni hökumətin tərkibini müzakirə ediblər. Yanukoviç Putinə yeni hökumətdə kimi görmək istədiyini açıqlayıb və Rusiya prezidentini əmin edib ki, ölkədəki vəziyyət hakimiyyətin nəzarəti altındadır. Məlumatlara görə, Putin Yanukoviçin bu dediyinə əmin olsa, Ukraynaya 2 milyard dollarlıq yeni maliyyə yardımı ayıracaq.
