«Ukrayna hadisələri gələcəyini müəyyən etmək istəyən ölkələri, xüsusən də Azərbaycanı ilhamlandıracaq»
Gürcüstanın sabiq prezidenti Mixail Saakaşvilinin Ukraynada baş verənlərlə bağlı səsləndirdiyi fikirlər maraq doğurur. Ukraynadakı proseslərin qələbəsinin Rusiyanın imperiya kimi çöküşünün əsasını qoyacağını düşünən Saakaşvili Kiyevdəki proseslərin Azərbaycana da təsirsiz ötüşməyəcəyini dyeib. Saakaşvili əminliklə bəyan edib ki, Ukraynadadkı hadisələr bütün dünyaya öz təsirini göstərərcək: “Gürcüstanla müqayisədə Ukrayna çox böyük ölkədir. Bu baxımdan Ukraynada baş verənlər bir təcrübədir. Burada baş verən hadisələr öz gələcəyini müəyyən etmək istəyən ölkələri, xüsusən də Azərbaycanı, Moldovanı, Ermənistanı ilhamlandıracaq. Bu hadislər eyni zamanda, Rusiyadakı bir sıra qüvvələrə də təsir edəcək”.
M.Saakaşvili onu da əlavə edib ki, gələcəkdə tarixi yazanlar deyəcəklər ki, Rusiya imperiyası öz mövcudluğunu Kiyevin Maydanında başa vurdu və bu belə də olacaq: «Xalq mütləq qələbə çalacaq, mən əminəm ki, yaxşı gün və gələcək bütün xalqları birləşdirəcək. Bu doğrudan da həqiqətdir. Tarixçilər nə vaxtsa Rusiya imperiyasının süquta enəcəyi haqda yazacaqlar. Özü də imperiyanın bu “faciəli süqutunu” Maydanın qələbəsilə bağlayacaqlar. Xalqlar gələcəyə inanır və bilir ki, onların gələcəyi bütün xalqların birləşməyindədir”.
Vəfa Quluzadə: «Azərbaycan mütləq Avropaya inteqrasiya edəcək və demokratikləşəcək»
Saakaşvilinin səsləndirdiyi fikirlərlə razı olduğunu bildirən politoloq Vəfa Quluzadə vurğuladı ki, çünki hazırda Rusiya bir imperiya kimi süqutunu yaşamaqdadır. Rusiyanın iqtisadiyyatında inkişafın getmədiyini deyən V.Quluzadə vurğuladı ki, Kreml impeiya siyasətini işə salmağa məcbur idi: «Rusiya həmişə qərbdən geri olub. Avropa ölkələri həmişə resurslarından yararlanaraq inkişafa can atıblar. Rusiya isə imperiyanı genişləndirmək vasitəsilə yaşamağa çalışıb. Rusiya uzun müddət ətrafında yaşayan kiçik xalqları işğal edərək imperiyasına daxil edib. Amma bütün bunlara baxmayaraq inkişafa nail ola bilməyib. Hazırda Rusiya bəyan edir ki, onlara heç kim çata bilməz. Mən bu fikirlə razıyam. Çünki Rusiya qabağa doğru deyil, arxaya doğru qaçır. Bu qaçış da Ukraynanı yenidən iişğal etməyə hesablanıb. Ukrayna çox böyük ərazidir, böyük xalqdır. Rusiya sadəcə olaraq Ukrayna vasitəsilə Avropanı təhdid etmək istəyir. Əgər Rusiya Ukraynanı ram edə bilsə, bunun ardınca Azərbaycan və Moldova gələcək. Lakin mən inanmıram ki, Rusiya Ukraynanı ram edə biləcək».
Rusiyanın Ukraynaya qarşı apardığı təbliğat kampaniyasının bir nəticə vermədiyini deyən V.Quluzadə bildirdi ki, Rusiyanın Ukrayna demokratlarına faşist damğasını vurmağa cəhd etməsi bir nəticə vermir. Məqsəd Ukraynanı Qərbin gözündən salmaqdır. Amma Avropa ilə sərhəddə olan Ukraynanı Qərb yaxşı tanıyır. Tərəqqinin heç zaman məğlub olmadığını deyən V.Quluzadə Ukraynadakı proseslərin də qələbə ilə nəticələnəcəyinə və bu hadisələrin Azərbaycan daxil olmaqla post sovet ölkələrinə təsir edəcəyinə əmindir: «Azərbaycan, Moldova, Qazaxıstan kimi dövlətlər mütləq Avropaya inteqrasiya edəcək və demokratikləşəcək. Bu prosesin qarşısını almaq olmaz. Əvvəlki dövrdə sovetləşməni güc yolu ilə tətbiq etmək təhlükəsi var idi. Hazırkı dövrdə bu keçərli deyil. Çünki Azərbaycan müstəqil dövlətdir».
Xəyal
