Samir Əliyev: «Prosedurlar ictimaiyyətə açıqlanmalıdır»
«Əks halda həmin müəssisələr ucuz qiymətə satıla bilər»
Rabitə və Informasiya Texnologiyaları Nazirliyi özəlləşdiriləcək iki dövlət rabitə müəssisəsinin – “Aztelekom” IB və “Bakı Telefon Rabitəsi” IB-nin qiymətləndirilməsinə başlayıb. Trend-in məlumatına görə, bu barədə jurnalistlərə nazir Əli Abbasov bildirib. Abbasovun sözlərinə görə, dövlət operatorlarının infrastrukturunun təhlili məqsədi ilə məsləhət şirkətləri dəvət edilib: “Özəlləşdirmənin başlanmasına qədər müəssisələr vahid açıq səhmdar cəmiyyətdə birləşdiriləcəklər”.
Rabitə bazarında inhisarçı mövqeyə malik bu müəssisələrin birləşməsi və özəlləşdirilməsi bu sektora nə vəd edir?
Iqtisadçı-ekspert Samir Əliyev mobil telefon bazarından fərqli olaraq stasionar telefon bazarında rəqabətin yox dərəcəsində olduğunu deyir. Bu iki şirkətin birləşməsi bir tərəfdən maya dəyərinin, xərclərin azalmasına gətirib çıxaracaq. Paralel vəzifələr ixtisar olunacaq. Digər tərəfdən daha böyük inhisarçı mövqeyə malik inhisarçı şirkətin yaranmasına gətirib çıxaracaq. Hazırda da telefonun çəkilməsindən tutmuş digər məsələlərə qədər bu sahədə problemlər qalmaqdadır.
Ekspert hesab edir ki, bu şirkətlərin özəlləşdirilməsi hər bir halda şəffaf aparılmalıdır. Prosedurlar ictimaiyyətə açıqlanmalıdır. Nəzərə almaq lazımdır ki, bu iki şirkət bu vaxta qədər işləyib və kifayət qədər gəlirə malikdir. Işləməyən müəssisələr kimi ucuz qiymətə satıla bilməz. Deməli bu şirkətlərin özəlləşdirmədə dəyəri də işləməyən zavodun dəyərindən çoxdur. Ona görə də onların özəlləşdirilməsi üçün şəffaflıq vacib şərtlərdən biridir. Əks halda həmin müəssisələr ucuz qiymətə satıla bilər. Azərbaycanda bu tipli təcrübələr artıq mövcuddur.
Fizzə
