Cəmil Həsənli: «Bu Vətən, bu torpaq sizindir, onu azad etməyə sizlər qadirsiniz!»
2011-ci il fevralın 4-də bir neçə gəncin təsis etdiyi “NIDA” Vətəndaş Hərəkatının üç yaşı bir neçə gün əvvəl tamam olsa da, onlar bunu dünən Vətəndəş Həmrəyliyi Partiyasının (VHP) qərargahında qeyd etdilər. Amma NIDA-çılar tək deyildi, tədbirdə onlarla yanaşı, bir sıra başqa gənclər təşkilatlarının təmsilçiləri, Milli Şura üzvləri, siyasi partiya liderləri və digər ictimai-siyasi fəallar iştirak edirdi.
Dövlət himninin oxunmasıyla başlayan tədbirin aparıcısı “NIDA”nın Idarə Heyətinin üzvü Nicat Məmmədbəyli idi. O, ilk çıxışçı kimi sözü Idarə Heyətinin başqa bir üzvü Aygün Pəncəliyevaya verdi.
Aygün Pəncəliyeva çıxışında “NIDA”nın fəaliyyəti haqda danışdı: “NIDA”nın fəaliyyəti müxtəlif istiqamətlərdədir. Gənclər universitetlərdə görmədikləri təhsili “NIDA”da görürlər. Çünki bizim tədris mərkəzimiz var, orada müxtəlif maarifləndirici tədbirlərimiz olur. Digər fəaliyyət istiqamətimiz isə küçə aksiyaları ilə bağlıdır. Bura divar yazılarını, fləşmobları aid edə bilərik”.
Aygün Pəncəliyevanın çıxışından sonra “NIDA”nın fəaliyyətinə dair video-çarx nümayiş olundu. Daha sonra tədbirin qonaqları fikirlərini bölüşdülər.
NIDA-çıların çiynindəki ağır yük
VHP Ali Məclisinin sədri Rafiq Manaflı “NIDA”çıları təbrik etdi: “Siz çiyninizə dövlətin müdafiə olunması, Azərbaycan milli dəyərlərinin, mədəniyyətinin gələcək nəsillərə ötürülməsi kimi ağır yük götürmüsüz və onu daşıyırsız. ”NIDA” sizin üçün məktəb olub, burada öz hüquqlarınızı müdafiə etmək bacarığına yiyələnmisiniz”.
“Zülm daimi ola bilməz”
Milli Şuranın sədri Cəmil Həsənli çıxışa başlayarkən səslənən alqışlara maraqlı qarşılış verdi: “Sizin bu cür davranışınızı görəndə istər-istəməz, adamın ürəyindən bunu demək keçir:
Bu zaldan eşidilir NIDAsı məmləkətin,
Kürdəxanıdan gəlir, sədası məmləkətin”.
Cəmil Həsənli Azərbaycan gəncliyinin hələ Xalq Cümhuriyyəti dönəmindəki mübarizəsindən, fədakarlıqlarından danışdı: “On minlərlə Azərbaycan gənci öz həyatını istiqlal ideyası uğrunda qurban verdi. Bu gün onların davamçıları sizlərsiniz. Bu vətən bizimdir, onun qurtuluşu sizin çiyninizdədir və bu, mütləq olacaq. Zülm daimi ola bilməz. Diktatorluq iddiasına düşənlər tarixin kiçik bir məsafəsində özləri üçün qəhrəmanlıq fəlsəfəsi yaratmaq istəyirlər. Tarix o diktatorlardan çox görüb. Onların hamısı gəncliyin əlilə arxivə göndərilib. Azərbaycanda da belə olacaq. Bu vətən, bu torpaq sizindir. Onu azad etməyə sizlər qadirsiniz!”.
“NIDA”nın filmi Brüsseldə
Tədbirin aparıcısı Nicat Məmmədbəyli növbəti çıxışçıya söz verməmişdən əvvəl NIDA-çı gənclərə şad xəbər verdi. Bildirdi ki, bir müddət əvvəl çəkdikləri “5 fəsil” sənədli filmi Brüsseldə film festivalına dəvət alıb.
Repressiyaların ön cəbhəsində dayanan qəhrəmanlar
Müsavat Partiyasının başqanı Isa Qəmbər də çıxışına NIDA-çıları təbrik etməklə başladı: “NIDA-çılar hakimiyyətin repressiyaların ön cəbhəsində dayanan qəhrəmandılar. Siz fəaliyyətinizə görə hər cür təriflərə layiqsiniz. Həm meydan mübarizəsinin önündə gedən bir təşkilatsız, həm cəmiyyətdə gələcəyə inam yaratmaq sahəsində önəmli işlər görürsünüz. Əsas odur ki, siz ölkədəki status-kvonu dəyişmək üçün yaranmısınız. Çünki xalq bunu istəyir. Inanıram ki, ”NIDA” zamanın önündə gedən bir mübarizə dəstəsi kimi, hədəflərinə nail olacaq. Biz birlikdə ölkədə köklü dəyişikliklərə nail ola biləcəyik”.
Daha sonra NIDA-çı gənclərin 3 yaş münasibətilə çəkdikləri video-çarx nümayiş etdirildi.
NIDA-çıların yaratdığı nümunələr
Filmin nümayişindən sonra isə çıxış üçün söz səbəbkarlara üzərində “NIDA-3″ yazılmış tort hədiyyə edən Azərbaycan Xalq Cəbhəsi Partiyasının (AXCP) sədri Əli Kərimliyə verildi. AXCP sədri də çıxışına NIDA-çıları təbrik etməklə başladı: ”Ilk növbədə, hələ də hökumətin girovunda olan qəhrəman NIDA-çıları təbrik edirəm. Siz cəmiyyətə çox yaxşı bir mesajla gəldiniz. Azadlıq ideyalarını yaymaq, maarifçilik aparmaq, mübarizədə öndə olmaq mesajlarını verdiniz. Hazırda isə dostlarınız, gənc NIDA-çılar bir ildir ki, məhbəsdə girovluqda ikən, necə rəşadətli olmağın, necə qürurlu olmağın, məhbəsdə də mübarizəni necə aparmağın nümunəsini yaradır. Azərbaycan gəncliyinə daha bir nümunə verirlər. Hesab edirəm ki, gördüyünüz işlər mütləq nəticəsini verəcək. Sizin çevrəniz böyüyür. Müstəqil gəncləri, vətəndaş cəmiyyətini siyasətə cəlb etmək baxımından gördüyünüz işlər çox təqdirəlayiqdir. Əlbəttə, partiyalı gənclər də çox çalışır ki, gəncliyi siyasətə cəlb etsinlər. Amma hökumət qoxusundan çalışır ki, müstəqil gənclər siyasətdən, ictimai həyatdan uzaqda olsunlar. Siz bu tilsimi sındırdınız. Siyasi meydana atılmağınızla, öz varlığınızı ortaya qoymaqla, bir mesaj verdiniz. Azərbaycanda dəyişikliklər qaçılmazdır. Dəyişiklik mütləq baş tutacaq. Onun hərəkətverici qüvvəsi isə Azərbaycan gəncliyi olacaq. Azərbaycan gəncliyi daha yaxşı həyata layiqdir. Eyni zamanda, Azərbaycan gəncliyi indiki vəziyyəti dəyişmək iqtidarındadır. Sizə bu işdə uğurlar arzulayıram”.
Hakimiyyətin “NIDA”ya qarşı dözümsüzlüyü
REAL Hərəkatının Idarə Heyətinin üzvü Natiq Cəfərli də NIDA-çıları təbrik etdi: “NIDA meydanda doğuldu. Meydanda yürüməyə başladı. Artıq 2 yaşı olanda hakimiyyət dözmədi və repressiyalara başladı. Amma biz inanırıq ki, tezliklə həbsdəki NIDA-çılar azadlığa çıxacaq və NIDA-nı daha da yüksəklərə qaldıracaqlar”.
NIDA-çılara üzrxahlıq
Tanınmış hüquqşünas Aslan Ismayılov NIDA-çı gənclərə təşəkkür etdi: “Tam səmimi deyirəm, sizə paxıllığım tutur. Kaş 30 il gec doğulaydım, sizlərlə belə mənalı bir ömür sürərdim. Öz adımdan, yaşlı nəslin nümayəndəsi kimi, sizlərdən üzr istəyirəm ki, bizlər sizə bu yükü verdik. Siz bu gün elmlə, yaradıcılıqla məşğul olmaq əvəzinə, çirkabı təmizləməklə məşğulsunuz. Buna görə bizi bağışlayın. Sizə uğurlar arzulayıram”.
“Sizlərlə qürur duyuram!”
Həbsxanada olan NIDA-çı gənclərdən bir neçəsinin valideynləri də tədbirdə iştirak edirdi. Zaur Qurbanlının anası Səkinə xanım çıxışında əvvəlcə Kürdəxanıya – oğlu da daxil olmaqla, istintaq təcridxanasında olan vicdan məhbuslarına salamlarını çatdırdı: “Zaur tutulandan mən də NIDA-çıyam. Başda həbsdəki 8 gənc olmaqla, hamınızla qürur duyuram. Arzu edirəm ki, vətənimizə, millətimizə layiqli gənclər olasınız”.
Səkinə Qurbanova az sonra yenidən mikrofonu götürərək, NIDA-çı gənclərə bir iradı olduğunu bildirdi. Vicdan məhbusunun anası NIDA-çı gənclərin məhkəməsinə az adamın gəlməsindən gileyləndi. O, hər kəsdən gənclərin məhkəməsində iştirak etməyi xahiş etdi. Məhkəmə zalında, məhkəmə binasının qarşısında olmaqla, həbsdəki gənclərə mənəvi dəstəyin vacibliyini vurğuladı.
“Hamınız mənim üçün Şahinsiniz!”
Azərbaycandakı vicdan məhbuslarından ən gəncinin, həbs olunarkən cəmi 17 yaşı olan NIDA-çı Şahin Novruzlunun atası Ibrahim Novruzlu da çıxış etdi: “NIDA-nın 3 yaşı olmasına NIDA-çılar qədər mən də sevinirəm. Onların bütün xoş günlərində mən də xoşbəxt oluram. Sizin hamınız mənim üçün Şahinsiniz. Sizin tutduğunuz yol çox gözəl yoldur, demokratik yoldur. Hamınızla fəxr edirəm!”
***
“NIDA”nın Idarə Heyətinin üzvü Sura Ağaverdiyeva həbsdəki gənclərin təbrik məktubunu oxudu.
Idarə Heyətinin digər üzvü Ülvi Həsənli qonaqları “NIDA”nın yeni saytı ilə tanış etdi.
Daha sonra fotoqraf Cahangir Yusif, həbsdəki NIDA-çıların hüquqlarını müdafiə edən vəkillər Fəxrəddin Mehdiyev, Xalid Bağırov, REAL-ın üzvü Erkin Qədirli çıxış edərək, gəncləri təbrik etdilər.
Bəyim Həsənli
