Stastistika Komitəsinin məlumatı dövlət başçısının dediklərini təkzib edir
«Normal indikatorlar olsa, ölkə əhalisinin bəlkə də yarıdan çoxunun yoxsulluq səviyyəsindən aşağı yaşadığı üzə çıxardı»
Regionların sosial-iqtisadi inkişafı Dövlət proqramlarının icrasına həsr olunmuş konfransda dövlət başçısı ənənəvi olaraq iqtisadi inkişafdan danışıb. Ölkədə 1 mln 200 min iş yerinin açıldığını deyən Əliyev onların 900 mininin daimi olduğunu bildirib. Ölkə başçısının sözlərinə görə, yoxsulluq 50 faizdən 5,3 fazə düşüb, işsizlərin sayı 5 faiz təşkil edib.
Maraqlıdır ki, Dövlət Statistika Komitəsinin açıqladığı rəqəmlər Ilham Əliyevin dediklərini təkzib edir. Belə ki, DSK-nin açıqladığı məlumata görə, 2013-cü ilin yanvar-dekabr aylarında ölkə iqtisadiyyatında muzdla çalışan işçilərin orta aylıq nominal əməkhaqqı 423,0 manat olub. Bu isə qiymətlərin gündən günə bahalaşdığı ölkədə o qədər böyük rəqəm sayıla bilməz. Məlumatda o da qeyd olunur ki, muzdla çalışanların təxminən 900 min nəfəri iqtisadiyyatın dövlət bölməsində çalışır.
Ekspertlər isə hesab edir ki, meyarlar düzgün seçilərsə, hesablama düzgün aparılarsa, yoxsulluq və işsizlərin sayı ilə bağlı tamamilə fərqli nəticələr ortaya çıxar. Ancaq ölkədə yoxsulluq həddini hökumətin çox aşağı indikatorlarla müəyyən edib. Azərbaycanda yoxsulluq həddi 100 manat civarındadır. Ekspertlərin sözlərinə görə, Avropa Birliyinin ən kasıb ölkəsi olan Bolqarıstanda yaşayış minimumu, yoxsulluq həddi təqribən 190 avroya yaxındır. Nəzərə almaq lazımdır ki, bu ölkədə qiymətlər Azərbaycandan ucuzdur, valyuta ehtiyatı baxımından kasıbdır. Əgər Azərbaycanda Avropa Birliyinin ən kasıb ölkəsi olan Bolqarıstan səviyyəsində yoxsulluq həddi müəyyən olunsaydı, 4 nəfərli bir ailənin yaşaması üçün minimum 800 avroya yaxın pul qazanmaq lazım olardı. Azərbaycanda hökumət rəqəmlərlə oynayaraq yoxsulluq həddini kağız üzərində aşağı salmaqla məşğuldur. Azərbaycanda köhnədən qalma, çox bərbad, aşağı səviyyədə indikatorlar götürülüb. Buna görə də yoxsulluğu kağız üzərində bu qədər aşağı səviyyədədir. Normal indikatorlar olsa, ölkə əhalisinin bəlkə də yarıdan çoxunun yoxsulluq səviyyəsindən aşağı yaşadığı üzə çıxardı.
Fizzə
