«Həbs olunan fəallar ən qısa zamanda azad ediləcək»
“Ölkə siyasi böhrandan yalnız dinc danışıqlar və siyasi dialoq yolu ilə çıxa bilər”
Ukrayna prezidenti Viktor Yanukoviç ABŞ dövlət katibinin Avropa və Avrasiya məsələləri üzrə köməkçisi Viktoriya Nulandla ölkədəki siyasi böhrandan çıxış yollarını müzakirə edib. Görüş zamanı Yanukoviç Ukraynada konstitusiya islahatının tezliklə keçirilməsinin tərəfdarı olduğunu bəyan edib. Tərəflər qeyd ediblər ki, siyasi nizamlanmanın əsasında iqtidar və müxalifət arasında dialoq durmalıdır. “Ölkə siyasi böhrandan yalnız dinc danışıqlar və siyasi dialoq yolu ilə çıxa bilər”, deyə Ukrayna prezidenti qeyd edib. Yanukoviç ölkədə gərginliyin artmasının qarşısını almaq üçün əlindən gələni edəcəyini vurğulayıb.
Prezident həbs edilən fəalların ən qısa zamanda azad ediləcəyini bildirib. O, hökumətin bu istiqamətdəki tədbirləri sürətləndirmək üçün tədbirlər görəcəyini deyib. Sonda Yanukoviç müxalifətlə dialoqu davam etdirməyə hazır olduğunu da dilə gətirib.
Yanukoviç Avropa Şurasının baş katibi ilə görüşdü
Dialoqla bağlı eyni fikri Ukrayna prezidenti Soçidə Avropa Şurasının baş katibi Torbyorn Yaqlandla görüşü zamanı da dilə gətirib. Yanukoviç bildirib ki, Avropa Şurasının Ukraynadakı hadisələri diqqətdə saxlamasını yüksək qiymətləndirir: «Hesab edirəm ki, bu diqqət ölkədə yaranmış siyasi böhrandan çıxmağa kömək edəcək. Sizin ötən ilin dekabrında məlum olaylara reaksiyanızı və Ukraynaya səfərinizi də yüksək qiymətləndiririk».
Prezident son vaxtlar Ukrayna hökumətinin bir sıra vacib addımlar atdığını da xatırladıb: «16 yanvarda qəbul edilmiş qanunverici aktlar dəyişdirildi. Həmçinin son etiraz aksiyalarında müxtəlif cinayətlər törətmiş şəxslərin azad edilməsi ilə bağlı amnistiya aktı qəbul edildi. Biz müxalifətlə konstruktiv danışıqların davam etdirilməsinə tərəfdarıq. Bu yolla siyasi böhrandan çıxış yolunu tapmaq olar».
“Kiyevdəki partlayış terrora hazırlıq ola bilərdi”
Ukrayna Daxili İşlər Nazirliyi fevralın 6-da Kiyevin mərkəzində baş vermiş partlayışla bağlı rəsmi məlumat yayıb. Məlumata görə, hüquq-mühafizə orqanları “Maydan qərargah”ının yerləşdiyi Həmkarlar Evində partlayışın partlayıcı qurğu hazırlanan zamanı baş verdiyini istisna etmir: «Radikal qruplaşmalar yenidən sabitliyi pozmaq istəyir və onlar hətta terror aktını törətməkdən çəkinməyəcək. Əlimizdə olan operativ məlumat və partlayışın baş verdiyi Həmkarlar Evindəki son hadisələr bunu sübut edir”.
Ukrayna prezidenti BMT baş katibinə təşəkkür etdi
Soçi Qış Olimpiadasının açılışında iştirak etmək üçün Rusiyada səfərdə olan Ukrayna prezidenti Viktor Yanukoviç və BMT baş katibi Pan Gi Mun arasında görüş olub. Ukrayna prezidentinin mətbuat xidmətindən verilən məlumata görə, görüşdə Ukraynada hazırkı vəziyyət və bu məsələnin həlli istiqamətində birgə əməkdaşlıq məsələsi müzakirə olunub. V.Yanukoviç BMT baş katibinə ölkədəki vəziyyəti diqqətdə saxladığına görə təşəkkürünü bildirib. O qeyd edib ki, Ukrayna BMT-nin təşəbbüslərinə diqqətlə yanaşır: “Ukrayna hökuməti bütün addımları atacaq ki, münaqişənin eskalasiyası baş verməsin. Son vaxtlar biz Ukraynadakı siyasi vəziyyətin sülh yolu ilə çözülməsi prosesində vacib addımlar atmışıq”.
Kiyev beynəlxalq təşkilatlardan yardım istəyəcək
Kiyev ölkədə siyasi böhranla nəticələnmiş hadisələrin araşdırılmasına beynəlxalq təşkilatları cəlb etmək niyyətindədir. Bu barədə Ukrayna prezidenti administrasiyasının rəhbərinin birinci müavini Andrey Portnov Avropa Şurasının insan haqları üzrə komissarı Nils Muyjniekslə görüşü zamanı bildirib:
“Ukraynadakı hadisələrin araşdırılmasında beynəlxalq təşkilatların nüfuzlu rəhbərləri tərəfindən bizə yardım göstərilməsi ilə bağlı təşəbbüs irəli sürürük. Bizim rəsmi mövqe ondan ibarətdir ki, biz bu böhranın məhz araşdırılması və nizamlanmasına yardım göstərilməsini xahiş edirik”. Portnov qeyd edib ki, ədalətli qiymət həm hüquq mühafizə orqanlarının, həm də etirazçıların hərəkətlərinə verilməlidir. Portnov Muyjnieksi iqtidar və müxalifət arasındakı danışıqların gedişatı barədə məlumatlandırıb.
