Vahid Məhərrəmov: «Azərbaycan özünü əsas kənd təsərrüfatı, ərzaq məhsullarıyla təmin edə bilmir»
Bugünlərdə keçirilən müşavirədə dövlət başçısı Ilham Əliyev deyib ki, Azərbaycan artıq özünün kənd təsərrüfatı məhsullarını xaricə ixrac edir və gələcəkdə bu, daha da böyük rəqəmlərlə ölçüləcək: “Son illərdə biz özümüzü əsas ərzaq məhsulları ilə böyük dərəcədə təmin edə bilmişik. Ancaq hələ ki, buna tam şəkildə nail olmamışıq. Ət və ət məhsullarının özünütəminetmə səviyyəsi 94 faizdir, quş əti 92 faizdir. Bax, bu sahədə çox böyük irəliləyiş olub. Ona görə ki, Sahibkarlığa Kömək Milli Fondunun xəttilə quş fabriklərinin yaradılmasına böyük kreditlər verilib.
Özümüzü yumurta ilə 96,5 faiz, süd və süd məhsulları ilə 75 faiz, taxılla 65 faiz, üzümlə 94 faiz, kartofla 98 faiz, bostan məhsulları ilə 100 faiz təmin edirik. Meyvə və giləmeyvə 126 faiz, yəni böyük ixrac potensialımız da var. Tərəvəz 100 faiz, duz 72 faiz, şəkər və şəkərdən hazırlanan məhsullar 174 faiz – bu, ən böyük ixrac potensialımızdır, – bitki yağları və marqarin 70 faiz, kərə yağı 50 faizdir”.
Kənd təsərrüfatı sahəsi üzrə ekspert Vahid Məhərrəmov isə dövlət başçısının səsləndirdiyi rəqəmlərin doğru olduğunu düşünmür. Ekspertin fikrincə, ölkəni iqtisadi cəhətdən qüdrətli göstərmək üçün hökumət belə bəyanatlar verir: “Əslində, ortaya qoyulan şişirdilmiş rəqəmlərdir. Müxtəlif tədbirlərdə belə bəyanatların səsləndirilməsi beynəlxalq qurumlara ölkədəki islahatların yaxşı nəticə verdiyini nümayiş etdirmək məqsədi daşıyır. Azərbaycan özünü əsas kənd təsərrüfatı, ərzaq məhsullarıyla təmin edə bilmir. Ərzaq buğdasının idxaldan asılılığı 100 faizdir. Son vaxtlar ət idxalı artıb və xüsusilə də diri kəsim üçün xaricdən mal-qara gətirilir. Həmin diri mal-qara Azərbaycanda kəsimə getdiyi, emal edildiyi üçün daxili istehsal kimi göstərilir. Ölkə özünün süd təminatını ödəyirsə, niyə keçən ilə nisbətən idxal olunan süd 35,5 faizdir?! Idxal keçən ilə nisbətən ciddi şəkildə artıb. Həmçinin diri mal-qaranın idxalı 47 faiz, buğda ununun idxalı 194 faiz, buğda idxalı isə 16 faiz artıb. Bunlar da insanın həyatında ciddi yer tutan əsas kənd təsərrüfatı məhsullarıdır”.
Ekspert digər problem kimi, hökumətin məsələlərə səhv yanaşmasını göstərir. Hökumət minimum ərzaq normasını sivil norma kimi təqdim edir. Əslində isə insanın illik ət istehlakı 80 kiloqramdan çox olmalıdır, lakin hökumət bunu 30 kq. müəyyən edib. Yumurta istehlakı 3 milyard ədəd olmalıdır. Halbuki, istehsal 1 milyard 200 milyondur. Yəni, bu, insanın fizioloji təminatını müəyyən edən norma deyil. Eyni zamanda, gündəlik qəbul etdiyimiz kalori də çox aşağıdır: “Bunu ört-basdır etmək üçün hökumət həqiqəti gizlədir. Elə təqdim edilir ki, guya, Azərbaycan əhalisi normal, sivil və təminatlı həyat sürür”.
Nigar
