Azərbaycanda maliyyə amnistiyası ilə bağlı xüsusi qərar layihəsinin hazırlanması istiqamətində iş aparılır. APA-nın məlumatına görə, bunu vergilər naziri Fazil Məmmədov bəyan edib. Qeyd edək ki, söhbət ölkədə ümumi gəlirlər bəyannamə sisteminə keçid prosesi çərçivəsində qeyri-qanuni, vergidən yayınma yolu ilə əldə edilmiş və gizlədilmiş əmlakın və gəlirlərin leqallaşdırılmasından gedir. Belə ki, F.Məmmədovun sözlərinə görə, amnistiya olmadan ümumi bəyannamə sisteminə keçmək olmaz. Nazirin fikrincə, bu və digər səbəblərə görə, əmlak və digər sərvətlərin leqallaşdırılması üçün müvafiq amnistiya sistemini tətbiq etmək zərurəti var. Eyni zamanda F.Məmmədov bildirib ki, amnistiya barədə qərarın nə vaxt veriləcəyi hələ dəqiq məlum deyil.
Məhəmməd Talıblı: «İndiki halda bu addım daha çox korrupsioner məmurların maraqlarına yarayır»
Iqtisadi Təhlil Institutunun rəhbəri Məhəmməd Talıblının sözlərinə görə, Azərbaycanda maliyyə amnistisiyasının pozetiv tərəfləri olsa da, indiki halda bu addım daha çox korrupsioner məmurların maraqlarına yarayır: «vergi ödənişi ilə bağlı sahibkarların problem yaşadığı gündəmdə osaydı, o zaman maliyyə amnistiyasını başa düşmək olardı. Çünki vergilərin bağışlanması və digər bu tipli addımlar dünya təcrübəsində olub: «Adətən maliyyə amnistiyası o zaman baş verir ki, hökumət dəyişikliyi baş verir və yeni komanda iqtisadi siyasətin fərqli istiqamətlərini elan edir. Ölkənin maliyyə sistemindən kənara axının baş verməsinin qarşısının alınması üçün belə addımlar atılır. İndiki halda atılan addımlar bu məqəsədə xidmət edə bilmir. Çünki ölkədən kifayət qədər böyük pullar çıxarılaraq off-şor zonalara yerləşdirilir. Eyni zamanda ölkə də xeyli sayda xarici investisiya cəlb edə bilir. Ona görə hazırkı qarşıq bir zamanda bu addımın atılması anlaşılmır. Nəzərə almaq lazımdır ki, maliyyə amnistisiyası daha çox məmur kapitalının ölkədə leqal biznesin çiçəklənməsinə gətirib çıxarmasına hesablanıb. Bu məmurların bineslə məşğul olmaq qadağasını müəyyən dərəcədə leqallaşdırır».
Maliyyə amnistisyası verilən ölkələrin də təcrübəsinə nəzər salan M.Talıblı vurğuladı ki, çirkli kapital sahiblərinin vəsaitləri vergiyə cəlb edilməklə leqallaşdırılır. Bu baxımdan əslində maliyyə amnistiyası məmurların ölkə daxilində biznes imkanlarının genişlənməsi deyil, büdcənin əlavə gəlirlər əldə etməsidir.
Oqtan Haqverdiyev: «Maliyyə amnistiyası üçün müddət də müəyyənləşdirilməlidir»
İqtisadçı Oqtay Haqverdiyev isə bildirdi ki, Azərbaycanda maliyyə amnistiyasının tətbiqi ilə bağlı məsələ zaman-zaman qalxıb. Qazaxıstanda maliyyə amnistiyası elan edildikdən sonra 90-cı illərin sonunda oxşar məsələnin Azərbaycanda da gündəmə gəldiyini deyən O.Haqverdiyev vurğuladı ki, məqsəd qeyri-qanuni əldə olunan vəsaitlərin, əmlakın leqallaşdırılmasına hesablanmışdı: «Əgər bu maliyyə xaricdə idisə, həmin vəsaitin Azərbaycana gətirilməsi üçün imkan yaradılmalı idi. Amma bu layihə Milli Məclisdən keçmədi. Düşünürəm ki, hazırda bu layihənin yenidən gündəmə gətirib, reallaşdırmaq lazımdır. Amma maliyyə amnistiyası üçün müddət də müəyyənləşdirilməlidir. Bu müddət sonsuzluğa qədər ola bilməz. Maksimum bir il müddət bu məqsəd üçün kifayətdir».
Vahid Əhmədov: «Maliyyə amnistiyasının tətbiq olunmasının vaxtı çoxdan çatıb»
Uzun müddətdir ki, maliyyə amnistiyasının tətbiq olunması ilə bağlı müzakirələr aparıldığını deyən Milli Məclisin İqtisadi siyasət komitəsinin üzvü, millət vəkili Vahid Əhmədov modern.az-a açıqlamasında bildirib ki, büdcə müzakirələri zamanı da məsələ dəfələrlə qaldırılıb: “Maliyyə amnistiyasının tətbiq olunması məsələsi çoxdan müzakirə olunurdu. Biz də büdcə müzakirələri zamanı amnistiyanın vacibliyini dəfələrlə qaldırdıq. Artıq maliyyə amnistiyasının vaxtı gəlib çatıb. Yəni ölkə vətəndaşlarının maliyyə vəsaitlərini xaricə aparmasını bu vasitə ilə dayandırmaq lazımdır. Kimlər necə qazanıb, qazanmayıb bu artıq başqa məsələdir. Əsas odur ki, maliyyə amnistiyasının tətbiq olunmasının vaxtı çoxdan çatıb, hətta bu müddət çoxdan keçib”.
Xəyal
