“Todays Zaman”ın müxbiri ilə bağlı deportasiya qərarı Ərdoğanın başağrısına çevrildi
Artıq bu gün günorta saatlarında Mahir Zeynalov öz həyat yoldaşı ilə birlikdə Bakıya gəlib.
4 ildir ki, Türkiyədə işləyən azərbaycanlı jurnalistin bu ölkədə məskunlaşmaq haqqı var idi. Özü açıqlama verməkdən imtina etsə də, Mahir Zeynalovun deportasiya olunmasının əsl səbəblərindən biri kimi tvitterdə yazdığı statsusu göstərilirsə, digər səbəb kimi onun nurçular cərəyanının üzvü olması ehtimal edilir.
***
Türkiyə hökuməti “Todays Zaman”ın azərbaycanlı müxbiri Mahir Zeynalovu ölkədən deportasiya etmək qərarı verib. Türkiyə mətbuatı yazır ki, buna səbəb M.Zeynalovun tvitter səhifəsində yazdığı fikirlər olub.
“Türk hakimlər polisə “Əl-Qaidə” ilə bağlantısı olan şəxsləri həbs etmə qərarı verdi, Ərdoğanın təyin etdiyi polis rəisləri isə buna əməl etmədi”, – deyə Zeynalov tvit atıb.
Bundan sonra Daxili İşlər Nazirliyi Zeynalovun ölkədən deportasiya edilməsini istəyib. 4 ildir Türkiyədə çalışan Zeynalov 15 ay əvvəl Türkiyə vətəndaşı ilə evlənib.
“Todays Zaman”ın məlumatına görə, Mahir Zeynalovun deportasiya edilməsinə səbəb kimi dövlət və hökümət rəhbərləri əleyhinə yalan açıqlamalar verməsi göstərilir.
Ərdoğan da Zeynalov haqda, “təhqir, xalqı kin və düşmənçiliyə sövq etmə və alçaltma” ittihamları ilə məhkəməyə müraciət edib.
Zeynalov ötən həftə polis idarəsinə gedərək ittihamlarla bağlı ifadə verib. Zeynalovun deportasiya edilməsinə səbəb kimi ikinci tviti də – “Ərdoğanın təyin etdiyi şəxslər əməliyyatların qarşısını aldığından, “Əl-Qaidə”nin Türkiyədəki adamları qaçdı” göstərilib.
Zeynalov isə ifadəsində həmin fikirləri mediyadan oxuduğunu və əlavə şərh vermədən yazdığını bildirib.
Mahir Zeynalov Türkiyədən deportasiya edilməsinə öz tvitter səhifəsində yazdığı qısa fikirləri ilə münasibət bildirib: “Yüzlərlə milyon başın fəda olduğu müqəddəs bir həqiqətə başımız fəda. Dünyanı başımıza yıxsanız da, bu müqəddəs vəzifədən vaz keçməyəcəm” (virtualaz.org).
Mahir Zeynalovla bağlı deportasiya qərarına ATƏT-in media azadlığı üzrə komissarı Dunya Miyatoviç etiraz edib. “Jurnalist Mahir Zeynalovun tənqidi yazılarına görə deportasiyası Türkiyədə media azadlığının təhlükəli durumunu göstərir”, deyə onun yaydığı bəyanatda bildirilir.
“Söz azadlığı yalnız hakimiyyətdəkilərin münasib saydığı bəyanatlardan ibarət deyil. Bu hüququ məhdudlaşdırmaq Türkiyədə mediaya nəzarətini daha da sərtləşdirəcək. Zeynalovun deportasiyası və böhtana görə ittihamlar onun hərəkətlərinə uyğun sanksiyalar deyil. Ümid edirəm ki, Zeynalov dərhal buraxılacaq və ona qarşı ittihamlar ləğv olunacaq”, – deyə Miyatoviç bəyan edib.
CHP sədri Kamal Kılıçdaroğlu da olaya münasibət bildirib. O, qatıldığı tədbirlərdən birində çıxışı zamanı jurnalistlə bağlı deportasiya qərarına görə Ərdoğanı tənqid edərək “diktator” adlandırıb. “Media xalqın mənafeyini müdafiə edir. Hörmətli baş nazir bəyənmədiyi bir tvitə görə jurnalisti deportasiya etdirirsə, burada senzura var. Belə demokratiya olmaz. Dünənə qədər bir diktatordan bəhs edirdik, indi saxtakar bir diktatordan bəhs edirik…”.
