Elton Məmmədov: «Müvafiq icra hakimiyyətinin rəhbəri necə məsləhət görürsə, o cür də kadr islahatları aparır»
Nəqliyyat naziri Ziya Məmmədov qardaşını işdən çıxarıb. “Qafqazinfo”nun məlumatına görə, bir neçə gün əvvəl nazir qardaşı ilə bağlı əmr verib. Əmrdə bildirilir ki, Nəqliyyat Nazirliyinin tərkibində fəaliyyət göstərən “MMC 85″ adlı qurumun rəhbəri Nəriman Məmmədov vəzifəsindən azad olunsun.
Bir neçə gün əvvəl nazirin qardaşının evində partlayış olmuşdu.
Ziya Məmmədovun digər qardaşı, deputat Elton Məmmədov məsələyə münasibət bildirib. O, AzNews.az-a açıqlamasında bildirib ki, Nəriman Məmmədov xeyli müddətdir ki, həmin vəzifədə çalışıb və onun işdən azad olunmasında qeyri-adi heç nə yoxdur: “Məgər o işdən azad oluna bilməz? Nəqliyyat naziri Ziya Məmmədovun qardaşı olduğuna görə, Nəriman Məmmədov daimi olaraq tutduğu vəzifədə çalışmalıdır? Belə fikirlə razı deyiləm.
Nəriman Məmmədov işdən azad edilibsə, yaxud da digər işə keçibsə, burada cinayət tərkibli bir əməli yoxdur axı… Bu normal haldır. Ola bilsin ki, Nəriman Məmmədov öz xahişi və yaş həddi ilə əlaqədar olaraq, başqa işə keçib. Kiminsə adını kiməsə görə hallandırmaqla cəmiyyətdə müəyyən qeyri-normal fikir yaradılır. Bu cür xəbərlərin yayılmasını mənfi qiymətləndirirəm”.
Deputat deyib ki, Ziya Məmmədov öz qardaşını işindən azad etməyib, sadəcə bir işdən digərinə keçirdib: “Nəriman müəllim başqa işə keçirilib. Müvafiq icra hakimiyyətinin rəhbəri necə məsləhət görürsə, o cür də kadr islahatları aparır. Bu cür hallara kimsənin müdaxilə edib, yaxud da təhlil etməsi, bunu ictimaiyyətə başqa yöndə çatdırmaq cəhdləri düzgün mövqe deyil. Belə xəbərləri işə müdaxilə kimi qiymətləndirirəm. Bu, yolverilməzdir”.
O, qardaşlar arasında münasibətlərə də toxunub: “Bizim aramızda münasibət çox yüksək səviyyədədir. Arzu edərdim ki, bütün Azərbaycanda qardaş və bacılar bizim kimi mehriban olsun”.
