Bu məsələnin ictimailəşməsindən qəzəblənən nazir hirsini jurnalistin üstünə töküb
Nəqliyyat naziri Ziya Məmmədov böyük qardaşı Nəriman Məmmədovu “Azəryolservis”in rəhbəri Cavid Qurbanovun müşaviri təyin edib. Bu barədə məlumatı “Qafqazinfo” yayıb. Nəriman Məmmədov “MMC 85″ adlı qurumun rəhbəri olub və nazirin əmri ilə vəzifəsindən azad olunub.
“Azadlıq” qəzetinə Ziya Məmmədovun bu yerdəyişməsi ilə bağlı maraqlı məlumat daxil olub. Məlumatda bildirilir ki, Nəriman Məmmədovun rəhbərlik etdiyi qurumun işi iri tonnajlı maşınlar üçün nəzərdə tutulan tərəzilərə nəzarət etməkdir. Hələ bir neçə il əvvəl Nəqliyyat Nazirliyinin rəhbərliyi yolların qısa müddətdə dağılmasını iri tonnajlı maşınların artıq yük götürmələri ilə izah etmişdilər. Bunun qarşısını almaq üçün ölkəyə xüsusi tərəzilər gətirilmişdi. Lakin bununla da yol dağıntılarının qarşısını almaq mümkün olmadı. Deməli, Nəriman Məmmədov işinin öhdəsindən gələ bilməyib. Ya da Nəqliyyat Nazirliyinin rəhbərliyi yol dağıntılarının səbəbləri barədə yalan danışıb. Məlumatlarda deyilir ki, Ziya Məmmədov da düşdüyü vəziyyətin fərqindədir. Ona görə də məsələ böyüməmiş qardaşının yerini dəyişməyi qərara alıb. Nazir bununla həm də məsuliyyəti öz üzərindən atıb.
Bu arada Virtualaz.org məlumat yayıb ki, Ziya Məmmədov qardaşının yerini dəyişmək məsələsinin ictimaləşməsindən əsəbiləşib.
O “Unikal” qəzeti əməkdaşının nazirin bu addımının səbəbini öyrənmək istəyən əməkdaşına sərt cavab verib.
Sayt həmin danışığın mətnini təqdim edib:
– Alo, salam, Ziya müəllim…
– Salam. Kimdir danışan?
– Ziya müəllim, Sizi “Unikal” qəzetindən narahat edirik, bir mövzuyla bağlı…
– Eşidirəm.
– Bu gün qardaşınız Nəriman Məmmədovun işdən azad olunması xəbəri yayılıb, bununla bağlı fikirlərinizi öyrənmək istərdik…
– Əvvəla, qardaşımı işdən azad eləməmişəm, onun vəzifəsini dəyişmişəm, bunların sizə dəxli var?
– Deyilənə görə, o, Dövlət Dəmir Yolunda işlədiyi dövrdə də işində verdiyi nöqsanlara görə vəzifəsindən uzaqlaşdırılmışdı, bu gün də…
– Kişini işdən də çıxardarlar, yeni işə də qoyarlar, kişinin işdə nöqsanları da olar… Bunun sizə nə dəxli… Mənim bu nömrəmə niyə zəng eləmisiniz?
– Ziya müəllim, Sizlə başqa heç cür əlaqə saxlamaq olmur axı.
– Daha bu nömrəyə zəng eləməyin!
