Rəsul Mürsəlov: «Hakimin qərarı ilə, polislin ifadəsi ziddiyyət təşkil edirdi»
AXCP Gənclər Komitəsinin üzvü, həbsdən yeni çıxmış Rəsul Mürsəlov ötən gün növbəti dəfə məhkəmə qarşısına çıxarıldı və inzibati xətalar məcəlləsinin 310.1-cu maddəsilə 200 manat cərimələndi. Baş verənləri Rəsul Mürsəlov “Azadlıq”a belə şərh etdi:
“Mən AXCP-nin qərargahına getmək üçün yolu keçib avtobusa minmək istəyirdim. Bu zaman polis serjantı mənə yaxınlaşdı və yeraltı keçiddən istifadə etmədiyimə görə cərimələnəcəyimi söylədi. Mən isə bildirdim ki, həbsdən yeni çıxmışam, imkanım yoxdur, mümkünsə cərimələməyin. Həbsimin səbəbin öyrəndikdən sonra bildirdilər ki, səni bölməyə aparacağıq. Çünki, hakimiyyət əleyhinə danışmısan. Əvvəlcə məni baş idarəyə apardılar. Orda mənə bildirdilər ki, səni 2 ay həbs cəzası gözləyir. Mən səslənən fikirlərə etirazımı bildirdim. Daha sonra 18-ci polis bölməsinə gətirdilər və 1 saat saxladıqdan sonra, Nərimanov rayon məhkəməsinə apardılar.
Məhkəmədə isə polisə müqavimət göstərdiyimə görə saxlanıldığımı bildirdilər. Hansıki, ifadə verən polis şahidi hakimiyyəti tənqid etdiyimə görə saxlanıldığımı söyləyirdi. Mən hakimə bildirdim ki, sizin qərarınızla, polislərin ifadəsi ziddiyyət təşkil edir. Hakimiyyəti tənqid etmək, polisə müqavimət sayıla bilməz. Nəhayət müşavirə otağından qayıdan hakimlər məni 200 manat cərimə ilə cəzalandırdılar. Mən etirazımı bildirdim və cərimənin həbslə əvəzlənməsini tələb etdim. Hesab edirəm ki, növbəti dəfə mənə qarşı ədalətsiz hökm çıxarıldı”.
Xatırladaq ki, Rəsul Mürsəlov siyasi mövqeyinə görə 2012-ci ilin iyulunda ilyarımlıq həbsə məhkum olunub və yanvarın 25-də həbs müddəti başa çatıb.
