İran prezidenti Həsən Ruhani Türkiyədə rüşvət əməliyyatı zamanı həbs edilən iş adamı Rza Zərrabın iranlı ortağı Babək Zəncani haqqında açıqlama verib.
“Nə üçün bu qədər neft və pulun bir adama verildiyini anlamaqda çətinlik çəkirəm”, – deyə o, dövlət televiziyasındakı çıxışında bildirib. Ruhani söhbət mövzusu olan rəqəmin çox böyük – ölkənin bir aylıq gəlirinə bərabər olduğunu qeyd edib.
“Bu şəxs pulların bu bankda, o biri bankda olduğunu deyirdi. Aparılan ətraflı araşdırmada onun tamamilə yalan dediyini anladıq. Deyilənlərin düz olmadığını anlayanda birinci köməkçimdən rüşvət məsələlərinin üzərinə getməsini istədim”, – deyə İran prezidenti əlavə edib.
Xatırladaq ki, Zencani Ruhaninin rüşvətlə mübarizə təlimatından sonra dekabrın 30-da həbs edilib.
