«Həqiqətən də danışıqlarda müəyyən irəliləyişə nail olunacağına ümid yaranan zaman cəbhə xəttində atəşkəs pozulur»
Bir sıra ekspertlər son zamanlar cəbhə bölgəsindəki gərginliyi hərbi əməliyyatların başlaya biləcəyinin anonsu saysalar da, gərginliyi sülhə yaxınlaşmanın əlamətləri kimi qiymətləndirənlər də var. Azərbaycanın xarici işlər naziri Elmar Məmmədyarov cəbhədə baş verənlərə münasibətində bildirib ki, cərəyan edən hadisələr tərəflərin sülhə yaxın olmasının təzahürü sayıla bilər: «Hər dəfə danışıqlar prosesində bir qədər irəliləyiş olanda, belə hallar baş verir. Böyük sülh sazişi üzərində işə nə qədər tez başlanılsa, bu, bir o qədər çox regiona xeyir verəcək”. E,Məmmədyarov APA-ya açıqlamasında qeyd edib ki, Azərbaycan bu il Qarabağ nizamlanmasında irəliləyiş əldə etmək üçün danışıqları davam etdirmək niyyətindədir. Maraqlıdır ki, sülhün məhz indi imzalana biləcəyi ilə bağlı oxşar açıqlama ilə ABŞ-ın Minsk Qrupundakı həmsədri Ceyms Uorlik də çıxış edib. O, bildirib ki, sülhün imzalanması üçün indiki qədər uyğun vaxt olmayıb.
Hər iki açıqlama optimist notlarda verilsə də, hazırkı situasiya və danışıqların gedişatı ilə bağlı Azərbaycan cəmiyyətində olan məlumat tam fərqlidir. Əksinə toplumda hazırda formalaşan fikrə görə, Azərbaycanla Ermənistan arasında hərbi əməliyyatlar istənilən an bərpa oluna bilər.
Politoloq Vəfa Quluzadə hesab edir ki, hazırda Qarabağ probleminin həlli ilə bağlı yaranan situasiya təsadüfi deyil. V.Quluzadə onu təsdiqlədi ki, həqiqətən də danışıqlarda müəyyən irəliləyişə nail olunacağına ümid yaranan zaman cəbhə xəttində atəşkəs pozulur: «Cəbhə xəttindəki atəşkəsin saxlanılması, Ermənistan ordusunun addımlarına Rusiya rəhbərlik edir. Moskva isə Qarabağ probleminin həllində maraqlı deyil. Ona görə Rusiyanın mövqeyini dəyişməmiş danışıqlarda nəyəsə nail olmaq qeyri-mümkündür. Tərəflər problemin həllinə yaxınlaşmaq istəyəndə cəbhə xəttində atəşkəs pozulur, 99-cu ildəki kimi güzəştli sülhün imzalanmasına az qalanda isə Ermənistan parlamentini gülləbaran edilir. Bu bir həqiqətdir və Rusiya öz mövqeyini gizlətmir. Rusiya Qarabağ problemindən həm Qərblə danışıqlarda bir vasitə kimi istifadə edir, həm də Ermənistanla Azərbaycanı problem vasitəsilə nəzarətdə saxlayır».
Böyük dövlətlər arasında razılıq əldə edilməyincə Qarabağ probleminin həllinin mümkün olmadığını deyən V.Quluzadə vurğuladı ki, münaqişənin həllinin tərəflərin üzərinə qoyulması çözümə aparan yol deyil: «Böyük dövlətlər arasında hələlik razılıq yoxdur. Rusiya imperiya mövqelərindən çıxış edir. Rusiyanın Qarabağ probleminə imperialist təsiri qaldıqca münaqişə həll olunmayacaq. Rusiya hazırda Ukraynanı qarışdırmaqla məşğuldur».
Xəyal
