Rüstəm Ömərov AGBankın ona məxsus 9 mənzili mənimsədiyini söyləyir
Rüstəm Ömərova məxsus 14 mənzilin AGBank tərəfindən mənimsənilməsi haqda məlumat vermişdik. Bu məsələnin üstündən xeyli vaxt keçsə də vətəndaş hələ də mülkiyyətini geri ala bilmir.
Belə ki, 18.09.2007-ci il tarixdə Ömərov Rüstəm alqı-satqı müqavilələri əsasında “ANT” inşaat MMC-dən 1kv metri 1500 manatdan 1498 kv metr ümumi sahəsi olan 14 mənzil alıb. 3 oktyabr 2007-ci il tarixdə o “Azəri Gaz Bank”-dan 500000 AZN kredit götürüb və ANT-dən aldığı dəyəri 1517655 manat olan 9 mənzilini AGBanka girov qoyub. O dövrdə mənzillərə dair mülkiyyət hüququ haqqında şəhadətnaməsinin olmadığına görə Bank həmin mənzilləri bankın kredit şöbəsinin müdiri Müşviq Həmidlinin adına rəsmiləşdirir. Kredit tam ödənildikdən sonra isə mənzillər geri qaytarılmalı idi.
13.12.2012-ci il tarixdə 16/4301 nömrəli məktubu ilə AGBank Rüstəm Ömərovun borcu olmadığını və kredit borcunun ödənilməsinin icra olunduğunu bildirmişdi. 28.12.2012-ci il tarixdə Rüstəm Ömərov AGBankdan mənzillərin qaytarılmasını xahiş edib. Lakin 18.01.2013-cü il tarixdə AGBank krediti girovsuz verdiyini və mənzilləri girov şəkilində almadığını bildirərək mənzillərin qaytarılmasından imtina edib.
Sonra Rüstəm Ömərova məlum olur ki, 2010-cu ildə bankın kredit şöbəsinin müdiri M.Həmidli Bakı şəhər Yasamal rayon məhkəməsinə müraciət edərək R. Ömərovun girov qoyulmuş mənzillərinə dair onun mülkiyyət hüququnun tanınması və ona təhvil verilməsi barədə “ANT MMC”-yə qarşı iddia ərizəsi yazıb. Iddiasında M.Həmidli qeyd etmişdir ki, həmin mənzilləri o “ANT MMC”-dən alqı-satqı müqavilələri əsasında almış, pulunu ödəmişdir və cavabdeh onun mənzillərini təhvil vermir. Beləliklə məhkəmə 03.03.2011-ci il tarixdə onun iddiasını təmin edir. Daha sonra Yasamal rayon məhkəmsinin qərarından Apelyasiya şikayəti verilir və R.Ömərovun 18.09.2007-il tarixdə bu mənzilləri “ANT MMC”-dən aldığı təsdiqini tapır. Bakı Apelyasiya Məhkəməsi hesab etmişdir ki, iddiaçı M.Həmidli ilə “ANT MMC” arasında bağlanmış alqı-satqı əqdləri yalan əqdlər xarakteri daşıyır və R.Ömərovla -AGBank arasındakı girov müqaviləsini pərdələmək məqsədi daşıyır. Məhkəmə bildirmişdi ki, M. Həmidli bu mənzillərin mülkiyyətçisi kimi tanına bilməz. Beləliklə, Yasamal rayon məhkəmsinin 03.03.2011-ci il tarixli qətnaməsi ləğv olunur.
Sonradan məlum olur ki, girov vaxtı həmin mənzillər başqa şəxslərə satılmışdı. Beləliklə AGBank mənzillərin həqiqi dəyərində R.Ömərova ziyan yetirmişdi.
Azərbaycan Respublikası Mülki Məcəlləsinin 285.3-cü maddəsinə əsasən “girov saxlayan girov predmetinin ona verildiyi zaman hansı məbləğdə qiymətləndirilməyindən asılı olmayaraq, girov predmetinin itirilməsinə görə onun həqiqi dəyəri məbləğində, zədələnməsinə görə isə, dəyərinin azaldığı məbləğdə məsuliyyət daşıyır”.
R.Ömərov Bakı şəhər Yasamal rayon məhkəməsinə ərizə ilə müraciət edərək girov qoyduğu 9 mənzilin həqiqi dəyərinin məbləğini (1517655manat) AGBankdan alıb ona qaytarmasını tələb edib.
R.Ömərov bildirir ki, məhkəmə sənədlərin əslinin təqdim edilməməsini, AGBank tərəfindən ona ziyan vurulmasının sübut olunmadığını əsas gətirərək, 07 noyabr 2011-ci il tarixli Apelyasiya məhkəməsinin qətnaməsini təhrif edib. O, bildirir ki, iş üzrə məhkəmələr təzyiqlərə məruz qalıb və ona qarşı qərəzli, əsassız qətnamələr çıxarılıb.
Qeyd edək ki, fevralın 10-u, saat 11:00-da Azərbaycan Respublikası Ali Məhkəməsinin Mülki kollegiyasında R.Ömərovun kassasiya şikayətinə baxılacaq.
