Bakıdakı məktəb tikintiləri və yenidən qurulması prosesi yenidən Təhsil Nazirliyinə həvalə edilir
Baş nazir Təhsil Nazirliyinin təsərrüfat hesablı Əsaslı Tikinti və Təchizat Idarəsinin yaradılması barədə qərar verib. Bu barədə Lent.az-a Nazirlər Kabinetindən məlumat verilib. Qərara əsasən, həmçinin NK-in 2011-ci il 15 iyul tarixli 118 nömrəli qərarı ilə təsdiq edilmiş “Azərbaycan Respublikası Təhsil Nazirliyinin strukturuna daxil olmayan tabeliyindəki qurumların Siyahısı”nda dəyişiklik edib.
Dəyişikliyə əsasən Təhsil Nazirliyinin təsərrüfat hesablı Əsaslı Tikinti Idarəsinin bazasında Təhsil Nazirliyinin təsərrüfat hesablı Əsaslı Tikinti və Təchizat Idarəsi yaradılıb.
Təhsil Nazirliyinin strukturuna daxil olmayan tabeliyindəki qurumların siyahısının “Təsərrüfat hesablı təşkilatlar” bölməsində “Əsaslı Tikinti Idarəsi” sözləri “Əsaslı Tikinti və Təchizat Idarəsi” sözləri ilə əvəz edilib.
Iki əvvəl paytaxtdakı məktəb tikintiləri və yenidən qurulması prosesindəki qanunsuzluqlarla bağlı Baş prokuror yanında Korrupsiyaya qarşı Mübarizə Idarəsi tərəfindən araşdırılmalara başlanmışdı. Idarədə bir neçə fakt üzrə cinayət işi başlanmış və Əsaslı Tikinti Idarəsinin rəisi, sabiq təhsil naziri Misir Mərdanovun yaxın qohumu Allahverdi Dəmirov vəzifəsindən azad edilərək istintaqa cəlb olunmuşdu. Paytaxtdakı məktəb tikintisi və yenidən qurulması işi Bakı Şəhər Icra Hakimiyyətinə tapşırılmışdı. Faktiki olaraq Təhsil Nazirliyinin sözügedən idarəsinin fəaliyyətinə son verilmişdi.
Mikayıl Cabbarov təhsil naziri təyin olunandan sonra isə belə məlumatlar yayıldı ki, bu iş yenidən Təhsil Nazirliyinə həvalə olunacaq. Nazirlər Kabinetinin bu qərarı məlumatların əsassız olmadığını göstərir. Güman ki, Misir Mərdanovun dövründə Təhsil Nazirliyindən alınaraq Bakı Şəhər Icra Hakimiyyətinə verilən uşaq bağçaları da geri qaytarılacaq.
