“Azərbaycan xalqının böyük əksəriyyəti, xüsusilə də bütün mədəniyyət işçiləri qarşıdan gələn prezident seçkilərində Azərbaycan Prezidenti Cənab Ilham Əliyevə səs verəcək, ölkəmizin gələcəyi təmin olunacaq”. Belə buyurmuşdu, muğam ustası Alim Qasımov.
Üstündən çox keçməyib, cəmi bir neçə ay öncənin söhbətidir. Bəli, Alim Qasımovun kimi dəstəkləməsi, kimə səs verməsi onun şəxsi işidir, bizim və ya başqalarının bu seçimə irad haqqı yoxdur. Hətta sənət yoldaşlarının adından danışmasının da yaxından-uzaqdan xalqla heç bir bağlılığı yoxdur. Çoxunun üstündə xalq adı olsa da, aşağı-yuxarı bu təbəqənin də məsələyə münasibəti aydındır, fərqli düşünmələri istisna olunur. Etirazı olanlar var idisə, Alim müəllimin sarsılmaz əminliyinə kölgə sala bilərdilər. Amma istənilən halda, dəyərli sənətkarımıza bütöv bir xalqın adından danışmaq haqqını kimin, hansı qüvvənin tanımasından məlumatısızıq.
Hər halda sizə xalq artisti adı verilib, xalqın adından danışmaq haqqı yox. Bu haqq, yalnız xalqın özünə məxsusdur ki, uzun illərdir onun danışdığını görmürük. Yalnız seçkiyə bir neçə gün qalmış Ilhamədən tutmuş, (soyadı məlum deyil) Alim Qasımova kimi bütün artistlərin meydan sulaması onu deməyə əsas verir ki, xalq danışmasa da, əməlində səs-küylüdür, nə etməli olduğunu yaxşı bilir.
Bu arada dəyərli sənətkarımız yenidən səsini ucaldıb. Amma bu dəfə hansısa konsert salonundan, kiminsə təbliğat marafonundan deyil, zülmətə qərq olmuş evinin divarları arasından. Bəli, iki cüt qara, mənfi 2 dərəcə tempuratura əsir düşən yüz minlərin arasında, Alim Qasımov, ailəsi də var. Amma, deyəsən, sənətkarın səbrimi, dözümümü çatmayıb, qalxıb kimlərisə səriştəsizlikdə ittiham edib, hadisəni biabırçılıq kimi dəyərləndirib. Böyük sənətkar, lütfən, çox da uzağa getməyin, bunu ana təbiətin şəxsinizə qarşı sayğısızlığı kimi dəyərləndirin. Lap elə hesab edin ki, uca yaradan verdiyi səsin qarşılığında, sizi imtahana çəkmək haqqından istifadə edir. Onsuz da bərkə düşsəz, belə də olacaq. Əks halda, səsinizə gələn bütün məkanlar qapadılar, ən yaxşı halda evinizdən eşidilərsiz. Artıq gecdir, xalqla aranızda xeyli məsafə var. Sükanı belə də saxlayın, hətta imkan düşdükcə uazqlaşmaqda davam edin. Cəmi bir gün yaşadıqlarınızın min qat artığını 20 ildir yaşayan yüzminlərə çatmanız mümkünsüzdür. Xalqa, “sən yaxşı yaşayırsan, heç bir problemin yoxdur” demək qədər asan deyil etiraz etmək, ölkənin problemlərini qabartmaq. Bu ölkə təkcə qazı kəsilənlərin, işığı söndürülənlərin ölkəsi deyil, həm də bu qazın nə olduğunu bilməyənlərin, işığı ayda bir yol görənlərin ölkəsidir. Görəsən böyük sənətkar əksəriyyətin adından danışanda heç fərqinə vardımı ki, o əksəriyyət illərdir qürbətdə çörək davası döyür, seçki onun həyatında sonuncu problemidir? Bəs dəyərli Alim müəllim bu sətirləri tarixə həkk etdirdiyi vaxt bilirdimi ki, bu ölkədə büdcənin sökülməsi hesabına regionların sosial-iqtisadi inkişafı adına 2 proqram reallaşdırılıb ki, onun işıq, qaz, su, yol, hətta iş problemi olmasın? Bəs üçüncü, 2014-2016-cı illəri əhatə edəcək proqramın təkcə Azərbaycanın deyil, bütün ətraf ölkələrin inkişafında əhəmiyyətli irəliləyişə səbəb olacağını necə, düşünmüşdümü? Məhz Alim müəllimin seçki öncəsi verdiyi müsahibədən belə anlaşılır ki, daha ölkəmizin inikişafa-filana heç bir ehtiyacı yoxdur, zirvədəyik. Bütün sahələr üzrə təminatımız heç vaxt olmayan kimidir. Bundan sonra yalnız region ölkələrinin inkişafı haqqında proqramların icrasına başlamaq lazım gələcək. Şəkk edənlər, aşağıdakı ünvana daxil olmaqla, Alim Qasımovun qazsızlığın, susuzluğun, işıqsılığın, işsizliyin mümkünsüzlüyü haqqında sarsılmaz inamına şahidlik edə bilərlər.
