Avroparlamentin deputatı: «Avropa pasportlarına sahib məmur və oliqarxların Ukraynadan çıxmasına imkan vermək olmaz»
Rebekka Harms: «Onlar çirkli pulların yuyulması, vergidən yayınma yolu ilə sərvətə sahib olublar və imakan düşən kimi ölkədən qaçacaqlar»
Ukrayna prezidenti Viktor Yanukoviç növbədənkənar parlament və prezident seçkilərinə hazırdır. Bu barədə Yanukoviçin Ali Radadakı nümayəndəsi Yuri Miroşniçenko deyib. O bildirib ki, yaranmış vəziyyətdə problemlərin həlli ilə bağlı ümumi qərar olmayacaqsa, bu halda ölkədəki siyasi böhranın demokratik yolla həllinin yeganə variantı növbədənkənar seçkilərdir. Yanukoviçin nümayəndəsi problemin zor gücü ilə həllinin istisna olunduğunu bildirib.
Eşton: «Seçkinin vaxtını xalq özü müəyyən etməlidir»
Avropa Birliyinin xarici siyasət və təhlükəsizlik siyasəti üzrə Ali nümayəndəsi, Avropa Komissiyasının vitse-prezidenti Ketrin Eşton bildirib ki, Avropa Birliyi Ukraynada erkən seçkilərin keçirilməsində israr etmir. Sadəcə olaraq seçkilərin azad və ədalətli keçirilməsini istəyir. Seçkinin vaxtına gəlincə, bunu Ukrayna xalqı özü müəyyən etməlidir.
“Qərb ölkələri Ukraynanın daxili işlərinə qarışmağı dayandırmalıdır”. Bunu Rusiya xarici işlər nazirinin insan haqları üzrə səlahiyyətli nümayəndəsi Konstantin Dolqov bildirib: “Avropa Birliyi ölkələri və ABŞ-ın rəsmi şəxsləri Maydanda çıxışları zamanı Ukrayna xalqını “Avropaya çağırışa”, faktiki olaraq qarşıdurmaya, onun gərginləşməsinə səsləyirdilər. Bunu Ukraynanın daxili işlərinə qarışmaqdan başqa bir şey kimi qiymətləndirmək olmaz. Bütün bunlar qərbli siyasətçilərdən eşitdiyimiz demokratik şüarlarla uyğun gəlmir”.
Ukraynaya yardımı ABŞ da təsdiqlədi
ABŞ-ın Avropa Birliyi ilə Ukraynaya maliyyə yardımı paketinin hazırlanması ətrafında danışıqlar apardığını Dövlət Departamentinin mətbuat katibi Cen Psaki də təsdiqləyib(APA): “Hazırda biz danışıqların ilkin mərhələsindəyik. Avropa Birliyi və digər tərəfdaşlarla yeni hökumətin təsdiqlənməsindən sonra, Beynəlxalq Valyuta Fondunun vasitəçiliyi ilə iqtisadiyyatının sağlamlaşdırılması yolunu tutan Ukraynaya mümkün dəstək ətrafında məsləhətləşmələr aparırıq. Bizim istənilən qərarımız Ukraynada cərəyan edən proseslərdən və yeni hökumətlə məsləhətləşmələrimizdən asılıdır”.
Avropalı deputat sərt danışdı
Avropa Parlamentinin deputatı Rebekka Harms Ukraynada fövqəladə vəziyyətin elan olunacağı təqdirdə Avropa Birliyinin hansı addımları atmalı olduğunu açıqlayıb. Deputat bildirib ki, bu halda Avropa Birliyi etirazçılara güc tətbiq edən və AB pasportlarına sahib ukraynalı məmur və oliqarxların ölkədən qaçmasını önləmək üçün tədbir görməlidir: “Yaranmış situasiya böyük narahatlığa əsas yaradır. Oliqarxlar ölkəni tərk edə bilərlər. Onların bir qismi Avropa Birliyi ölkələrinin, məsələn, Avstriyanın pasportuna sahibdir. Ehtimal var ki, onlar ölkədən qaçacaqlar. Avropa Parlamenti Avropa Komissiyasının bu istiqamətdəki zəif mövqeyinə düzəliş etməlidir. Ortada jurnalistlərə, ictimai fəallara qarşı çoxsaylı hücumlar, insanlara qarşı zorakılığı sübut edən nümunələr var. Bunları törədənlərə qarşı viza məhdudiyyəti yaradılmalıdır. Bunu bizdən ukraynalılar istəyir. Sadə insanlar viza ala bilmir. Amma ölkəni dağıdanlar, etirazçılara güc tətbiq edənlər Şengen vizalarına sahibdir. Və ya Avstriya nümunəsində olduğu kimi, hətta pasportları da var. Onlar ölkədən qaça və Avstriyaya gedə bilirlər. Halbuki bu adamlar ölkədəki zorakılığa görə məsuliyyət daşıyırlar».
Harms bildirib ki, Ukraynada neçə adamın Avropa pasportuna sahib olduğunu öyrənəndə dəhşətə gəlib. O qeyd edib ki, Ukraynada təkcə Avstriya pasportuna sahib üç məmur var: «Onlar çirkli pulların yuyulması, vergidən yayınma vasitəsi ilə sərvətə sahib olublar. Və oliqarxa çevriliblər. Məhz bu adamlar ölkədə fövqəladə vəziyyət elan olunan kimi Avropaya qaçacaqlar. Halbuki onlar güc tətbiqinə görə cavabdehlik daşıyırlar. Biz bu adamlara viza məhdudiyyətinin tətbiqini, sadə insanlar üçün isə viza verilməsi qaydalarının liberallaşdırılmasını istəyirik».
Azarov təkzib etdi: «Avstriya pasportum yoxdur»
Aydın məsələdir ki, Rebekka Harms açıqlamasında tez-tez Avstriyanı misal göstərməklə əsasən Ukraynanın keçmiş baş naziri Nikolay Azarova işarə edib. Çünki Azarov tutduğu vəzifədən azad olunduqdan dərhal sonra xüsusi təyyarə Avstriyaya getmişdi. Mətbuat Azarovun oğlunun yanında Vyanada olduğu və orada uzun müddət qalacağını yazmışdı. Lakin dünən axşam saatlarında keçmiş baş nazir özünün «Facebook» səhifəsində barəsində çıxan xəbərləri təkzib edib: «Mən heç vaxt hər hansı Avropa ölkəsinə mənə pasport verilməsi üçün müraciət etməmişəm. Ona görə bəyan edirəm ki, mediada haqqımda yayılan xəbərlər həqiqətə uyğun deyil».
Keçmiş baş nazirin mətbuat katibi də yayılan xəbərləri yalanlayıb: «Nikolay Azarovun Avstriya vətəndaşı olması, həmçinin onun bu ölkədə əmlaka sahib olması barədə xəbərlər yalandır».
Azarov eyni zamanda Rebekka Harmsa müraciət edərək ondan ya təkzib, ya da üzrxahlıq etməyi tələb edib. Əks halda barəsində verdiyi yalan açıqlamalara görə onu məhkəməyə verəcəyini bildirib.
Avstriya mətbuatı: «Keçmiş baş nazir Kiyevə qayıdıb»
Avstriya mətbuatı isə dünən məlumat yayıb ki, Ukraynanın keçmiş baş naziri fevralın 2-də bu ölkəni tərk edib: «Məlumatı verən mənbə əminliklə bildirib ki, Azarov artıq Avstriyada deyil. Keçmiş baş nazir bazar günü Avstriyanı tərk edərək Kiyev istiqamətinə yollanıb».
Ali Radada nəticəsiz Konstitusiyaya müzakirələri
Ukrayna Ali Radasının parlament fraksiyaları arasında Konstitusiyaya düzəliş edilməsi ilə bağlı mübahisələr dünən də davam edib. Dünənki iclasda müxalifət 2004-cü ilin Konstitusiyasına qayıtmağı yenidən tələb edib. Söhbət, prezidentin səlahiyyətlərinin parlament və hökumətlə bölüşdürülməsindən gedir. Müxalifət bunu ölkədə yaranmış siyasi böhrandan yeganə çıxış yolu hesab etdiyini bəyan edib. Hakim Regionlar Partiyası isə müxalifətin bu tələbi ilə razılaşmayaraq köhnə Konstitusiyaya qayıdışı faktiki olaraq qeyri-mümkün sayıb. Müxalifətdən olan deputatlar dəyişikliyə nail olmayana qədər parlamentdəki fəaliyyətlərinə başlamayacaqlarını bəyan ediblər.
Beləliklə, günün birinci yarısında keçirilən müzakirələr zamanı heç bir nəticə əldə olunmayıb və parlamentin sədri saat 16-ya qədər fasilə elan edib. Fasilədən sonrakı iclasda da məsələ ilə bağlı heç bir irəliləyiş olmayıb.
Kliçko ilə Yanukoviç arasında təkbətək görüş
Fasilə zamanı müxalif «UDAR» Partiyasının lideri Vitali Kliçko bildirib ki, əgər parlamentdə Konstitusiya dəyişikliyi ilə bağlı ortaq məxrəcə gəlmək mümkün olmasa, məsələni birbaşa Yanukoviçlə müzakirə edəcək: «Çünki qərarları qəbul edən və bütün hakimiyyəti əlində saxlayan şəxs odur».
Bu açıqlamadan sonra Kliçko prezidentlə görüşmək üçün onun iqamətgahına yollanıb. Səhhəti ilə əlaqədar bir neçə gün əvvəl məzuniyyətə çıxan Ukrayna prezidenti Viktor Yanukoviç işə çıxdığı üçün Kliçkonu qəbul edib. Görüşdən sonra jurnalistlərə açıqlama verən müxalifət lideri bildirib ki, Yanukoviç Ukraynada yaranmış siyasi böhranı həll etməkdə maraqlı deyil: «Bu gün prezidentlə görüşdüm və başa düşdüm ki, o, böhranın real həllini istəmir. Yanukoviç bildirdi ki, Konstitusiyaya dəyişiklik çox vaxt aparacaq».
Timoşenko silahdaşlarına mesaj göndərdi
Ukraynanın həbsdə olan keçmiş baş naziri Yuliya Timoşenko lideri olduğu «Batkivşina» fraksiyasına məktub göndərərək onları 2004-cü il Konstitusiyasına qayıtmaq təşəbbüsündən geri çəkilməyə çağırıb. Timoşenko bildirib ki, müxalifət Yanukoviçlə bütün danışıqları dayandırmalı və növbədənkənar seçkilərə hazırlaşmalıdır. Keçmiş baş nazir məktubun detalları barədə mətbuata məlumat verməməyi tapşırıb. Timoşenkonun bu məktubu «Batkivşina»da birmənalı qarşılanmayıb. Partiya bu təklifin həqiqətən də Timoşenkoya məxsus olub-olmadığını araşdıracağını bildirib.
Gültəkin
